CLICK HERE FOR BLOGGER TEMPLATES AND MYSPACE LAYOUTS

الأربعاء، 3 فبراير 2010

كفاية نكد بقى يا بلوجرية



بما ان النكد هو سيد الموقف قررت انى اقتلة واستريح :)
وقتلت نكدى وعايشة من غير نكد يا هووو

فى اية يا بشر لية كم الحزن والكأبة دا كله
هى الدنيا فيها كام سنة والسنة فيها كام يوم
واليوم فى كام ساعة عشان نضيعهم فى الحزن

وتخيلوا معايا ان الحزن تسلل لحد ما وصل لعالمنا الافتراضى
خلينى اسمية افتراضى لانة كام ساعة فى اليوم بنقعد فية بس مش طول اليوم
تخيلوا ان حتى الكام ساعة ترفيه يتقلبوا نكد

طب بلاش شغل محاضرات
خلينى اقولكم على وصفة سهلة
وصفة هايلة :)

تعالى فى نص ساعة وقت فراغ فى يومك
واختار مكان هادى واعمل كوباية نسكافية
محدش يقول مبحبش النسكافية خليها يانسون كركادية
اى حاجة بتحبها المهم تكون دافية
وكمان المهم تكون انت اللى عاملها
ومتنسوش ترتبو الحاجات بعد ما تخلصوا
مش هنسيب ماما او اخوتنا يتدبسوا فيها وننكد عليهم


تمام كدا خد الكوباية وروح المكان اللى انت اخترتة
وياحبذا لو كان جنبك موسيقى هادية سولو كمان
ولا زى ما تكون بتحب اغنية سكالانس على رأى ايهاب صالح فى اف ام
او فى حب مصر منير حماقى عمرو دياب عمر خيرت زى ما تحب الاختيارات متعددة

غمض عنيك واشرب واستمتع بالاغنية او الموسيقى وعيش
نص ساعة بس هتحس بعدها انك تعبت وعملت لنفسك حاجة
بدل محنا عمالين طول اليوم نضايق فيها ونكئبها كدا

سيب كل حاجة على ربنا
متفكرش غير لما تخلص الحاجة اللى بتشربها
وفكر بهدوء وبورقة وقلم
قول لنفسك ان الحلو بيعدى والوحش بيعدى
وكل اللى بيجيبة ربنا خير هو العالم بالغيب مش احنا
وان نصيبك هتخدوا مش اكتر ولا اقل من اللى ربنا كتبهولك

متزعلش من حاجة ولا من حد خليك متسامح ولو مقدرتش وجهو
ولو مقدرتش يبقى ابعد نهائى عن الشخص اللى مضايقك لحد ما تهدى وتفكر
الحل بيجى من عند ربنا مش لازم نستعجلة
الايام خير دواء لحياتنا واللى بيحصل فيها

لو مغترب مسيرك هترجع اكنك راكب الطيارة بس الوقت طول شوية
استمتع بوقتك وشوف اماكن جديدة متستناش العودة لانك كل ما هتستناها رحلتك هتطول

لو حد غالى عليك مريض ادعيلة متكتئبش وتحزن
مش بأيدك شئ كل شئ بيد ربنا سبحانة وتعالى ادعيه بصدق هيستجب لك ان شاء الله

لو مسؤليات الحياة والاخبار مضيقاك
روح اقراء تاريخ وشوف اجددنا حصل لهم اية
وعملوا اية وعاشوا ازاى وادينا اهو جينا بعدهم وعايشين
حصل اية فى الدنيا الاكتئاب محللهمش مشاكلهم بالعكس دا زودها
ولما عملوا اللى عليهم وتفائلوا واتكلوا على الله نجحوا

توكلوا على الله من جواكم , اسعوا لحياة افضل
بس متكتئبوش فكروا نفسكم ان الحلو بيعدى والوحش بيعدى
وكلها بتبقى ذكريات مهما كانت قسوتها
بصو للناس اللى بتحبكم وبتخاف عليكم

صالحوا نفسكم وادوها من مجهدكم ووقتكم
شكلى طولت عليكم بس حقيقى انا زعلانة
لانى شايفة معظم المدونين لو مش كلهم مكتئبين
وبعدو عن التدوين وال اية اجازة ال
لا معندناش اجازات مش مصرح بيها
كله يتفائل الحياة وحدة ولازم نعيشها كويس
ونرضى نفسنا ونسعدها مادمنا مش بنسئ لحد ومادامت فى طاعة الله

ملحوظة / فى ناس ليها استيل معين
وطرق اخرى للخروج من الاكتئاب
ياريت يكون فى اقتراحات من السادة الزوار

و فى ناس مينفعش معاها اى كلام
ولا اى افكار للخروج من الاكتئاب
ودول بقولهم بلاش تقروا الموضوع خالص
نيهاهاهاهاها نفسى اضحك الضحكة دى من زمان

اهداء
لستيتة ولدودو الرومانسية
وفاتيما وصبصب لليدى وخواطر شابة
لبسمة انور ولعادل واحمد اسماء واحلام
واحمد ابو العلا وميمايا وبنت مصررحيل
لوجين وكفاية طيبة ومنوش وسوبيا سووول
نوارة وايمان بنات افكارى بينجا وفراشة ووردة وشيما
فشكول وعمرو ومصرية وحسام غانم محمد غالية
وكل اللى هيعدى من هنا

الموسيقى مش الاغنية يا شباب لان الاغنية
تكئب اصلا بس الموسيقى مناسبة اوى للشتاء
ولمج النسكافية



20 التعليقات:

القدر و انا يقول...

نونو
فينك يا قمر من زمان
قلقت عليك لما اتاخر البوست بتاعك
دعوتك جميلة وفى وقتها
ربنا يكفينا شر الاكتئاب
مرض العصر
ولا بد من الخروج منه وعدم الاستسلام
قبلاتى لسومة

خواطر شابة يقول...

عزيزتي انا سأعمل بنصيحتك هذا المساء ان شاء الله وبما اني لست من محبي النيسكافيه سأشرب ماج ليبتون على انغام هذه الموسيقى الجميلة التي اخترتها واكيد ثأثير ذلك سيكون طيب بعد يوم عمل طويل
نصائحك عملية وسهلة التطبيق فقط ينبغي ان تتوافر الارادة
تحياتي لك عزيزتي وتسلمي على هذا الاختيار الجميل

adel يقول...

الله علي الكلام
:):)
معلم من اليابان

طب ما تجيبلي اسماء او مزيكا ياباني زي عمرو خيرت و كده
مزكاتيه بقي :)

طب لو تعرفيلي الراجل ده شغله موجود ولا لا
Michio Mamiya
ده اللي عمل مزيكا فيلم
Hotaru No Haka 1988 (Grave of the Fireflies)
فيلم ياباني ملوش حل
بس كله نكد :)):))
ههههههههههههه

adel يقول...

علي فكرة المزيكا وهمية
لو عمرو غنها كده لوحدها علي المزيكا دي هتبقي مش طبيعية

احساس طفلة محبة للرومانسية بس واقعية يقول...

القدر وانا

دا مرض مزمن حيث انه عندما يصيب الاسرة المصرية تنتقل العدوى حتى للاطفال انا بكرة الاكتئاب مقدرش اقولك مش بعانى منه احيانا بس بحاول اتخلص منه بكل الطرق مش بستسلمله ابدا عشان عرفاه مزمن :)

فقلت وانا كدا محاربة اكتئابى وقبل ما يتعافى احارب مع المدونين اكتئابهم وحزنهم اللى غرقانين فيه دا

ربنا يبعدة عن الكل :)
انا الحمد لله بخير بس فى حالة بيات شتوى جنب الدفاية عشان كدا بظهر واختفى مع اشاعة الشمس :)

دمتى بكل خير
بيسعدنى اوى مرورك
وتعليقك غالى عليا

احساس طفلة محبة للرومانسية بس واقعية يقول...

خواطر شابة
بصى ليبتون ينسون نعناع اى ان كان المهم حاجة دافية وشوية استرخاء بدون تفكير وعلى ضمنتى طبعا زى ما قولتى المهم يكون فى نية وارادة للتخلص من كل ما هو محزن وكئيب من افكار واحداث

نورتينى ويارب فى سعادة دائما

احساس طفلة محبة للرومانسية بس واقعية يقول...

عادل

اهو مش انا مش بقالى 3 سنين وشوية فى
اليابان بس ولا اعرف اى فيلم
ولا كارتون يابانى :)

عشان الامانة هو كارتون واحد مدبلج
وحتى لسة مشفتهوش

وهو مالة يعنى عمر خيرت و عمرو اسماعيل زى الفل موسيقى بتهدى اجدع اعصاب متعصبة

وموسيقى مروان انور بجد تجنن انا تقريبا من اول الشتاء وانا مبسمعش غيرة مهدئ قوى للاعصاب بشكل غريب
سعيدة انها عجبتك

منورنى دائما

akeedba7ebha يقول...

حلو كلامك اوى
وشكرا اوى اوى للنصايح دى الى مش للبروجريه وبس لا للحياه عامه ولكل الفئات فعلا

احساس طفلة محبة للرومانسية بس واقعية يقول...

اكيد بحبها

يارب بجد اكون افدت حد ولا ساعدت حد انه يخرج من الاكتئاب ولا حتى يهدى من روح الحزن والافكار جواه لانهم فعلا مرض قاتل

شكرا لمرورك

لجين أبو الدهب يقول...

الله ينور عليكى الصراحة يارومانسية ..

قلتى كل الحالات اللى ممكن الانسان يكتئب منها ويعمل معاها ايه ..

وانتى بس كفاية رجعتك هاتضيع اى اكتئاب ..

منورة ياجميل ..

دمتِ بخير انتى وسومة يارب ..

غير معرف يقول...

بالرغم أنى مش عارفة حاجة نظرا للبعد الشديد اللى أنا كنت فيه
D:

بس بجد تابوست حلو جدا جدا و أنا شخصيا بعمل كدة للخروج من الكآبة بس بدل النسكافيه شاى بلبن فى الشتا و ليمون بالنعناع ساقع فى الصيف



وحشانى أوى يا جميلة

mohamed ghalia يقول...

حمدا لله على السلامة
طبعا حضرتك عارفة طريقتى كويس فى مدونة السعادة

Lady E يقول...

"الايام خير دواء لحياتنا واللى بيحصل فيها"

عندك حق يا احساس طفله

ثانكيو عالاهداء يا قمرايا
وانا نزلت الفيديو ده عندي في المدونة قبل كده
بجد ما شاء الله عزف جميل أوي

وحشاني وتيجي مصر بالسلامة ان شاء الله

فراشة يقول...

كفاية نكد عشان خاطرك بس :)
انا الحمد لله بكتئب صحيح بس يوم واحد بس مش أكتر

لا طريقتك جميلة جدا وانا بعملها بس قبلها بصلي ركعتين وممكن أقرأ سورة ف القرآن واعمل نسكافيه واشربه ف البلكونه وابص للسما والنجوم واكلم ربنا لحد ما ارتاح خالص

دي طريقه من الطرق وأحيانا اقوم العب او اتفرج على صوري وانا صغيوره
او اتفرج ع فيلم بحبه

يعنى بنًوع على حسب نوع النكد
ههههههههه


مش عارفه الاهداء دا ليا ولا فيه فراشه غيري بس مش مهم انا هعتبره ليا :)

MaNoOoSh يقول...

انا معاكي في الدعوة دي
كفاااااااااااااااااااااية نكد

طب تصدقى
والله انا طفشت من النكد لوحدى وبطلت اكتئاب
زهقت منه وطفشته لغاية ما اختفى لوحده


وحشتييييييييييين ومفتقدة كتاباتك جدااااا

شوية قهوة يقول...

كلامك بجد مفيد وجميل كلوه بيعدي بس احنا بنقول الكلام ده وقت الفرح وبس ووقت الاكتئاب بنكون عيشين في الحالة بجد انا لما اكون مديقة احب اشم هوة طبيعي احس ان روحي اتردتلي تاني

بـسـمـــة صـــــلاح يقول...

ازيك يا طفلة بجد وحشاني بس مش عارفه ياترى انتي فكراني

البوست حلو اوي
انا لما بكتئب بتوضا واصلي لربنا ركعتين وادعي في سجودي وابكيله واشكيله
وبعدها اقرا قران ساعتها بس بحس براحه كبير
ربنا يبعد النكد عننا يارب
ويجعل اوقاتنا سعاده
تحيـــ سفيرة السعادة ـــاتي(:
بسومة النعومة

مهموهة أحمد يقول...

احساس طفلة ..........
ايه الحلاوة دي يا باشا
بجد بجد بجد مدونة غاية في الجمال و الروعة
لا كده هتخليني اتغر و اعمل نيولوك انا كمان
انا ناوية ان شاء الله بس في عيد ميلاد مدونتي لما تكمل سنة و هانت ان شا ءالله

عموما يا حبيبتي انا سعيدة اوي اني اتعرفت بيكي
و اتمنى يا رب تدوم متابعتنا لبعض

و اكيد انا ضيفت المدونة عندي في القايمة المهمة لانها تستاهل بجد
و معاكي حق في كل كلمة قولتيها

العمر فيه كام ساعة علشان نقضيها في النكد
بلا نكد بلا كلام فاضي

طنش
تعش
تنتعش
هههههههههههههههههههه
ده شعاري في الحياة


تقبلي مروري الاول و ان شاء الله مش الاخير

خالص حبي و تقديري

شوية قهوة يقول...

مدونتك حلوة اوي ما شاء الله
واقتراحاتك حلوة
بس احيانا مش بيسبونا ناخد الركن الهادي البعيد دا عشان نرتاح
انا لما احب اخرج من الاكتئاب كنت بتعايش معاه اكتر لحد ما يروح لوحدوا يعني مش بعرف اتغلب عليه
تسلم ايدك
تقبلي مروري

momken يقول...

انتى فين من زمان

طيب ارجعى تانى للنكد واكتبى حاجه

طالت الغيبه
لعل المانع خير