CLICK HERE FOR BLOGGER TEMPLATES AND MYSPACE LAYOUTS

الثلاثاء، 18 أغسطس، 2009

رحنا البحر

رحنا البحر

رحنا الويك اند دا واللى فات وكنت عايزة اعمل بوست
بس قلت استنى لما نروح تانى مرة كمان اللى هى كانت امبارح دى

الاسبوع اللى فات رحنا اكواريم قبل ما نروح البحر
وبعيدا عن انى انا وسومة بنحب الماية والسمك والبحر والكلام دا
المكان كان رهيب

كان فية اسماك قرش كبيرة وصغيرة واسماك غريبة معرفهاش
والاجمل ان كان فى نيمو الاب والابن دول عجبو سومة طبعا
وكور مطاطية فيها انواع اسماك مختلفة جبت اتنين للذكرى
واليابانين الاذكياء حطين نيمو وجمبوا قنديل البحر ورغم انى مش بفهم يابانى كويس
الا انى سمعت كل الامهات بيقولوا نفس الجملة اللى بقلها لسومة
بصى دا نيمو ودا باباه ودى دورى وكل ابطال الكارتون



الاسماك كتير وفى وراهم اماكن ممكن ندخل فيها ونتصور
كل الاكواريم كان على المحيط وفى جزء من المحيط محاط بصخور
فية شعاب مرجانية وسمك دا اكتر حاجة عجبتنى بعد عرض الدولفين اللى دخلناه مرتين

لان عرض واحد لا يكفى اصلا الصف طويل جدا ولافف يمكن 4 مرات والكل بيدخل بس بنظام
ولو عايز تدخل وتلاقى مكان تقعد فيه اقف فى الصف قبل العرض بساعة وبرضو هتدخل تدور على كرسى
الماية كالعادة زرقاء تماما
الدولفين باين وكان معاه حوت كمان وبيعوم عند الزجاج قريب مننا ويعملوا حركات قبل العرض
احنا كنا قاعدين فى اول صف بعد ما قعدنا فى الصف ساعة ونص
الملحوظة اللى اخدت بالى منها ان فى 2 حوت و4 دولفين وكل عرض فى 3 غير العرض اللى قبلة
مع مدربين مختلفين وكل دولفين او حوت معاه المدربه بتاعة

اول العرض بيوزعوا شيت صغير دا لاول صفين
عشان ميتبهدلوش ماية لما الحوت نط برة الماية وينزل تانى
الدولفين كان صغير شوية مكنش بيرش ماية كتير بس الحوت كان ضخم
ومرة منطش كويس المدربة مدتلوش سمك يأكلة فعمل الحركة اعنف من العادى ونط ورش ماية كتير

بينطوا كمان يلمسوا الكور اللى متعلقة فى السقف بحبل مرة بديلهم ومرة بوشهم
فى كمان فقرة فى العرض الحوت بيلزق فى الزجاج نحيتنا وينزل يجيب ماية ويرشها علينا ودى اقرب ماية بتوصل



المدربات بينزلوا معاهم الماية ويقفول على وشهم والدلفين يزقهم فى الماية بسرعة عالية يعنى يادوب يتشافو
ا وبعدين بيغطسوا والدولفين يطلع يدفعهم فى الهواء وينط معاهم
ام الحوت فأستاذ بينام على ضهروا والمدربة تقف علية ويعوم بيها ببطئ فى الحوض

طلعنا رحنا البحر بس يادوب ساعتين مش كتير الوقت كان فات فى الاكواريم
ومنها اخدنا القرار بالرحلة بتاعت امبارح يوم مخصوص للبحر وقد كان
والاطفال طبعا كانوا سعداء جدا

التحضير الطبيعى للرحلة قبلها بيوم ويوم شوبينج
ونوم متأخر وسفر ساعة ونص او ساعتين عقبال ما نوصل للمحيط والشواطئ
الفرق بين الرحلة دى واللى قبلها كان فى الطريق على الطريق السريع
كان فى اجمل مشهد ممكن الواحد يشوفة جبال ومرتفعات كتير خضراء تمام وفى اسفلها بيوت مزارعين واراضى خضراء مزروعة
وفى وسطهم نفق متقطع عشان تقدر تشوف الجمال الطبيعى دا الطريق فى حضن جبل اخضر
طبعا صورت بس الصور مش مظبوطة لانة طريق سريع ومن العربية والازاز مقفول :(
الاغرب والاجمل مكنش انى اشوف الطريق فى وسط الجبل من بعيد ولا انى اعدى فيه
الاجمل كان لما الانفاق انتهت وطلعنا من اخر نفق على كبرى ومنه كنا عند قمة الاشجار وشايفين كل البيوت والجبال جنب بعض بجد منظر خرافى سبحان الخالق على جمال الطبيعة اللى لقى ناس بتفكر وتعرف تستخدمه صح


المرة دى وصلنا على 10 الصبح والاطفال مش بيستنوا بيجروا بهدومهم فى الماية
بس المرة دى الموج كان عالى رغم حاجز الامواج واضطروا يستنوا
يعنى البحر المتوسط موجة عالى فمابالكم المحيط بقى الشط والرملة هم الشاطئ
لان لو انت واقف عليهم الموجة هتيجى توصل لنصفك واحيانا ممكن تسحبك لجوة معاها
وهى محملة بقدر من الرمال يكفى لبناء برجين من كتر قوتها ولانها بتبتدى من الشط اساسا

الاطفال فضلوا المرة دى يقعدوا على الشط اللى هو ابعد ويلعبوا فى امان
لم يكن تام تمام لان الماية كانت بتوصلهم ساعات وخاصة المغرب كدا
دى سومة وهى مستلقية
و دى حاجتنا على البحر وكل حاجة اخدناها معانا شماسى وكراسة وتربيزات
الشط مفيهوش الحاجات دى كل واحد يجيب حاجتة معاه
طيرنا طيارة ورق لفت على الكبار والصغار :)
ولعبنا معاهم احيانا برضو وش بيضحك

واول ما طلعنا من الماية وقلنا نقعد شوية ونتأمل شفنا المنظر دا
ايوة دا واحد معاه الكلب بتاعه نازل يرفه عنو وهو دا اللى كنت بتكلم عنه من بوستين فاتو
لا وفى عوامة كمان مش فاهمة التفكير عند الناس دى ازاى يعنى

كان يوم طفولى جميل وكنا اسر مختلفة الجنسيات مصريين وجزائرين وفلسطنين
وانشئنا المملكة العربية على الشاطئ اليابانى
وقد كان حتى موعد رحيلنا لاننا اتاخرنا ربع ساعة على الباركينج بتاع العربيات وكنا اخر ناس تمشى :)

وروحنا رغم كريم الشمس وكل منا يحمل لون البحر وخاصة الاطفال
اللى قعودهم على الرمله فى الشمس غير لونهم تماما الى الاحمر

ملحوظة / الاضائة سيئة جدا رغم الفلاش
عشان السمك ميتضايقش :)
اه بجد كل سمك مهيئين لية الجو المناسب لية
حتى فى الاضائة
وكل الصور بعدستى الجميلة








الثلاثاء، 11 أغسطس، 2009

انا متابعة صدقونى

تعزية وتهنئة وسؤال وتوضيح وطلب ولقاء والنت و دكتور سنان


توضيح

متابعة معاكم بس الصيف وتوقيته والمواعيد ملخبطة
مشكلتى سومة واحتلالها للجهاز والنت
لانه هو كل حاجة من العاب واغانى وكارتون وتعليم حتى لما جبت جهاز تانى
طلعت وصلة النت مش بتتقسم هى لجهاز واحد :(

تعزية

ليدى البقاء لله مش عارفة اقولك اية بس حاسة بيكى
رمضان قرب ادعى ربنا يرحمه ويغفر له ويعفو عنه
ويلهم قلوبكم الصبر

طلب

مونى وشيمو وبسومة وكل الطيبة نازلين او نزلوا مصر خلاص يابختهم
بس لو سمحتوا محدش يقول فوشى انه نازل مصر تانى
او لو ناويين اوى يعنى انزلوا فى الشتاء وقت الكريسماس وكدا
عشان بيكون حلو فى اليابان اوى فالحكاية متأثرش وتضايقنى
loooooool


لقاء وقد كان

ستوتة عملت لقاء قريت عنه عند كل اللى حضروا تقريبا
ولومت كل اللى فى مصر ومحضروش بس طبعا كل واحد عند ظروفه
انا مستنية اللقاء اللى على النت عشان احضر لو المواعيد اتفقت باذن الله
ونفسى كل الناس تحضر

تهنئة

عاشقة الرومانسية مبروك يا قمر عقبال الليلة الكبيرة وكلنا معاكى بقى المرة دى

سؤال

عاشقة وغلبانة كفاية اكتئاب وحاولى تعملى حاجة جديدة يا بنتى
ولو ساعة كل كام شهر لحسن كدا احنا مفتقدينك وقلقنين عليكى

ميمايا واحمد ربنا يجازيكم خير ويبارك فيكم
بس بلاش تخضونا تانى يا جماعة شوفوا كام واحد قلق

وردة وفراشة وجوجو وسول ومنوش وحشتونى جدا
رغم انى بدخل مدونتكم بس برضو وحشنى

دكتور سنان

فاكرين عيادة دكتور السنان دى اللى حكيت عنها
دا كان يوم ما سومة راحت بس تعمل فحص
انا بقى رحت بدل المرة اتنين ولسة فاضل 3 او 4 مرات تانى
ضرسيين العقل ميلين ورمضان جى وهخلع اول واحد فى اول رمضان
يعنى مكملين لاخر رمضان والحكاية شكلها صعبة
الدكتور اصلا خايف على رأيي سمسم
الناس هنا بتروح للدكتور عشان فى سنة محتاجة تنضيف ولا حاجة
مش ضرسيين مايلين فى فك صغير والجدور ماسكة بعضها
ومحتاج كل ضرس عشان يتخلع من من ساعة لساعتين :(

النت

حكاية النت اللى فى مصر دا الى حد ما فهمتها
وان شاء الله معاكم فى الحملة اللى عاملينها
واعرف منتديات مشاركة فى الحاملة ويارب صوتنا يوصل
ونكون ايجابين يمكن نحقق حاجة فى حياتنا
المهم تتفقوا على يوم وشكل معين ننزل بية البوست
وربنا يسهل

شكرا على كل اللى سأل عليا
واعتذر على عدم المتابعة
رغم انى بحاول