CLICK HERE FOR BLOGGER TEMPLATES AND MYSPACE LAYOUTS

الأحد، 19 أبريل، 2009

حفلة شواء BBQ بارب كيو

حفلة شواء

دا جبل منظرة تحفة من قريب لسة مطلعتوش بس لينا كلام لما اطلعة ان شاء الله


نتكلم بقى فى رحلة اول مبارح
سبت وحد ويك اند والخروج فية بيكتر

كان شعار الرحلة دى هنروح الجنينة ونشبك ايدينا والشموسة طلة طلة وبتندة علينا

وكالعادة سومة حفظتها وفضلت يومين قبلها اى حد يسألها هنروح فين تغنى على طول :)

الخروجة كانت يوم السبت بس بما انها شوى يعنى محتاجة تحضير قبلها بيوم

فيوم الجمعة تبلت الفراخ وصبعت الكفتة وحضرت البسكويتات والشيكولاتات والمصاصات

والكور بما اننا رايحين الجنينة

وزى ما هو الحال فى رحلة بنطلعها الساعة 8 الصبح انا بنام الساعة 6 بلحق ساعتين نوم بالعافية

ويوم السبت بقى صحينا و سمسم نزل يحط الحاجات فى العربية وسومة بتلبس واخدت الكور ووراة على طول

وانا حصلتهم وروحنا بارك تحفة بجد الزرع منتشر فى كل مكان وفى لعب كتير للاطفال

و كان فى بحيرة صغير والماية قليلة جدا فيها سمك ملون وسمك بيستخبى تحت التراب


وكائن غريب بينط فوق الماية اقرب لحشرة منة لسمكة


وفى مكان للشوى وكان معانا مصريين وعرب كتير

البارك دا لو كان عارف اللى هيحصل فية كان رفض انه يتبنى ولا يتزرع اساسا

العيال بقوا بيطلعوا على الالعاب بالعكس يعنى الزحليق طول عمرها من فوق لتحت

لا دول بيطلعوا من تحت لفوق بدون اى خوف من الحد اللى نازل بالشكل الطبيعى

لا وكمان بيبصولوا على ان هو اللى غلطان ومفروض يوسعلهم

طبعا سومة الاول كانت خايفة شوية بس بعد فترة حاولت تعمل زيهم

وطبعا بدون اى شك شلتها وطلعنا برة الالعاب خالص لحسن تقع ولا توقع حد

دى سومة وعمر الثنائى المتعب والطريق اللى جنبهم دا

عشان وهم طالعين نزلين لو حصل حاجة لقدر الله وقعوا ميتجرحوش

ولما تمشى علية تحس انه مليان هواء مش مجرد مفروض على الارض


المهم بعد كدا خرجنا برة البارك خالص وروحنا موول قريب لان الجو كان حر جدا

ولفينا شوية طبعا كل دا والرجالة بتشوى خلاص بقى احنا دورنا نتبل ونأكل


هم بيشوى هناااااك اهم

اللى فى النص دا ملناش دعوة بية بس خلصنا لفينا فى المول وطلعنا تانى على البارك اتغدينا

وانطلقنا لمكان عجب سومة اوى كلة سمك وفرشات


كان فى سمك غريب اول مرة اشوفة صغير وبطنة مدورة كدا وكان فية سمك البهلوان اللى فى كارتون نيمو

والفراشات الونها كتير حتى اسود خالص طبعا الفرشات دى محنطة بس السمك كان صاحى



وبعدها طلعنا اخر جولة فى البارك

و كان فى كمان تماثيل لحيونات تعلوب ودب وقنفد دول برضو عجبوا سومة وطلعت فوقهم كتير

كل دا وانا بلف وراها وهى مش راضية تهدى

طيب هى عندها 3 سنين مش تراعى فرق السن اللى بينا :)

تعبتنى جدا وجت على الساعة 3 كالعادة ونامت تماما مصحيتش غير باليل الساعة 11


هى هناااااااااك اهى مع القنفد


البنت والولد دول كانوا بيلعبوا مع بعض
وكان شكلهم عاجبنى بس عقبال ما جيت اصورهم كانوا هيمشوا خلاص



والبنوتة دى شكلها كان كيوت خالص عجبنى ثقتها بنفسها
وهى فاردة دراعتها كدا بكل ثقة على عجلة واحدة فى ممر زى كدا



دى ابداعاتى تصويرية بقى من غير تريقة
:)

اسيبكم مع اخر صورة يا ترى عرفتوا هى اية ؟


طيب اسهلها عليكم هى مش تلاجة ولا ايس بوكس كبير ولا حاجة

هاهاهاهاهاهاهاهاهاهاهاهاها

طيب اسهلها كمان حد شاف مواقف كوميدية او الكاميرا الخفية فى اليابان على يوتيوب

ايوة اهو هو دا الحمام اللى بيكون فى الاماكن البعيدة عن المولات

او الحمامات العامة واللى بيعملوا فية مقالب رهيبة بجد

معرفش كان موجود هنا لية مع ان اقرب حمام مكنش يأخد 10 دقائق مشى

هاهاهاهاهاهاهاهاهاهاهاهاها

:)

بس خلاص ورجعنا البيت بعد ما اليوم خلص وسومة كانت هى كمان خلصت عليا


الأربعاء، 8 أبريل، 2009

الساكورا , 桜

الساكورا




شجرة بها الكثير من الازهار والقليل من اوراق الشجر وربما منعدمة الاوراق
طول السنة الشجرة جافة مفيهاش حتى ورقة شجر


لكن مع بداية شهر فبراير بتبتدى ظهور الساكورا
ولغاية منتصف او اخر شهر ابريل تكون اختفت تمام


الساكورا فى منها انواع كتير واحيانا الوان منها الابيض الصافى ومنها الوردى
واليابان هى الموطن الاصلى للساكورا
واليابانين بيهتموا جدا بالشجرة دى
و بيعملوا حفلة شواء تحت الساكورا
فى الوقت دا وبتسمى بالهانامى hanami



وفى موسم الساكورا اللى هو غالبا من نص مارس لنص ابريل
بتبقى فيه الساكورا ظاهرة والشوارع مغطاه بزهور الساكورا
لانهم بيزرعوا من فى كل مكان وبكميات كبيرة جدا


زهرة الساكورا بتقعد 10 ايام وربم اكثر او اقل
حسب المطر والرياح
وكمان هى اصلا مدة ظهورها قليلة

الساكورا رمز من رموز اليابان
استمتع كثيرا بالمرور بين صفين متوازيين من اشجار الساكورا
واوراقها منثورة تحت قدمى
ليس لها رائحة ولكنها جميلة المنظر


ملحوظة / كل الصور اللى فى البوست بعدستى
ما عادا اول صورة




الأربعاء، 1 أبريل، 2009

يوم فى حديقة حيوانات يابانية

يوم فى حديقة حيوانات يابانية


يوم رائع وبعد اللى سمعتة من اصدقائى
والناس فى مصر عن حديقة الحيونات فى مصر
قلت كويس انى لحقت اروح حديقة حيوانات
بالجمال دا كلة قبل ما ارجع مصر

اصل المكان يجنن وكالعادة زى بقيت كل الاماكن اللى رحتها
الباركينج كبير وفى ناس بتنظم دخول العربيات
وبتركن بسهولة وبتحجز تذكرة وتدخل عادى

لحد هنا تمام وعادى


جمال المكان يخليك طول ما انت ماشى
تقول سبحان الله وتكون نفسك تنطلق وتتفرج وتلف وتشوف كل حاجة
كمان المكان نظيف جدا جدا وفى صناديق قمامة فى كل مكان
زى ما قلتلكم مش صندوق واحد دول 4 وكل واحد مخصص لحاجة

الاول ابتدينا بالخيل وفى خيول صغيرة للاطفال وشكلهم كان يجنن



وبعدها دخلنا على الطيور ودا بقى انا شفت فيهم حاجات كتير معرفهاش
وحوليهم فى ورود شكلها جميل اوى
كل طائر قداموا المعلومات بتاعتة


دخلنا بعد كدا على كلب البحر وعمل عرض كان هايل
كان ليا تعليق لما شفتة قلت هو دا مش كلب
بس عمل عرض يجنن وكل الناس كانت مركزة معاه

بعدها رحنا للقرود ودول عجبوا سومة بنتى اوى
وكان فى منهم 12 نوع وحجم
كانت لما تأكلهم يصقفوا ويمدو ايديهم عايزين تانى
فضلت وقفة عندهم يمكن ساعة مش عايزة تمشى

بعدها رحنا للزواحف وكان فيهم حاجات مرعبة زى الوطاويط والثعبان
وحاجات مكنتش بعرف هى فين اصلا مكنتش باينة
سواء لان لونها مندمج مع الخلفية او لان حجمها صغير
وكمان كان المكان مغلق ومضلم شوية


والسلحفاة كانت حجمها كبير جدا حتى اكبر من الصورة
وكان معاهم حيوان غريب كان عمال يتخانق مع حيوان من نفس النوع وبيجروا من بعض
بس مكنتش عارفة هو اسمة اية او حتى نوعة
وانا طبعا ثقافتى اصلا المانى :p



بعدها رحنا القسم المرعب الاسد والنمر والدب
النمر كان قاعد فى حالة مش بيعمل حاجة زى ما انتوا شايفين
الاسد شكلوا كان قلقان معرفش من اية بس كان عمال رايح جى فى القفص
لا هو مش قفص دا ازاز غير قابل للكسر باين
والدب كان نايم وعمال يلعب بكورة حديد كبيرة متعلقة فى السقف
كان شكلوا حل


بعدين رحنا للغزالة ودى كانت اكتر حاجة ممتعة لاننا اكلناها
يعنى احنا ادينلها اكل مش احنا اللى اكلنا
شكلهم كان جميل وعجبونى انا شخصيا جدا


والفيل وسيد قشطة كانوا بيقفوا بثقة على اطراف بركة المياة اللى كانت قدمهم
مكنوش خايفين يقعوا ولا حاجة
ودول عجبوا سومة عشان كارتون الفيل هورتون
ومدغشكر


البطريق كان واقف وكأنة تمثال بس لما كان بيعوم تحت الماية
كان شكلوا بيكون جميل لان الماية لونها ازرق وجوة ازاز فكان واضح جدا



بدل الزرافة كان فى اربعة واحنا اللى معندناش ولا زرافة
كنت هقولهم يسلفونا واحدة وكانوا حطينلهم الاكل فى مكان عالى عشان يطولوه
شكلهم كان حلو وكان جنبهم الحمار الوحشى
يمكن عشان مخططين زى بعض


والكائن دا اللى متحركش من اول ما رحنا لغاية لما مشينا


بعد كدا كنا خلصنا الحيونات كلها
فى حاجات مش قلتلكم عليها
زى الخنزير والبط والوز ودول بيكونوا فى مكان مفتوح والاطفال بتأكلهم
وبعد ما يخلصوا فى مكان يغسلوا فية ايدهم

والبجع والطاوس والصقر والبومة اللاما
كلهم كان شكلهم جميل
وكان فى بحيرة فيها بط كمان بنجيب اكل من الماكينة ونأكلهم

المهم اننا خلصنا حديقة الحيونات كلها ولفينها يمكن مرتين
من 10 الصبح لغاية الساعة 2 تقريبا

وبعدها وفى نفس المكان كان فى ملاهى جميلة جدا
وكبيرة كمان اشترينا التذاكر وسومة كانت اصلا تعبت وكانت صاحية بدرى
بس فضلت تلعب يمكن لمدة ساعة وبدون ملل ولا اجهاد
من البوبى للقطة للحصان للفيل كلها حيونات
كانت بتركبها وكل واحد فيهم بيعمل حركة شكل

بعدها فصلت خالص وقررت تنام على الساعة 3
وفضلت لغاية لما خلصنا على الساعة 6 بتأكل رز مع الملايكة

انا قلت كويس عشان مأكلتش غير حاجات بسيطة فى وسط انطلاقها

بس ولفينا فى الملاهى شوية ولعبنا العاب مخيفة ساعات زى القطر السريع دا دمار
والعاب خفيفة زى الالعاب اللى بتتلعب بالكوينز
ودى بنحط العملة ونحرك زرارين كدا شمال ويمين وقدام ووراء
ونمسك بالدبديب او اللعب وساعات بنرمى حلقات وكور


المهم كان يوم ظريف صعب يتنسى لان كمية الجمال اللى فية كانت كتير
جمال الطبيعة مش الجمل العادى دا اصلى مشفتش جمل بيس شفت دا
تقريبا جمل صغير ولا اية ؟

المهم روحنا سعداء باليوم دا جدا
واتمنينا انة يتكرر تاااانى