CLICK HERE FOR BLOGGER TEMPLATES AND MYSPACE LAYOUTS

الاثنين، 9 نوفمبر، 2009

هى مش دى وردة الجزائرية برضو


هى مش دى وردة الجزائرية اللى بتقول حلوة بلادى وتقصد بيها مصر
مش ايامها برضو كانت بتغنى للجنود والحرب والنصر
ما هم كانوا بيحبونا اهو واحنا كل اللى عايز يحقق نجاح بيجى عندنا
وبلدنا بتشيل من الحبايب الف مش مئات من ايام زمان

طيب هو اية اللى حصل لية كل دا بقى حروب لسنين نقف فيها جنب بعض
وماتش كورة 90 دقيقة خلانا نشتم فى بعض
اعتقد دا ان دل على شئ فهو بيدل على عقول البشر اللى عايشيين دلوقتى فى البلدين
وباقى العالم العربى اللى بقينا فية وعلى رأى سمسم بس متقوليش عربى
عارفة ان مش الكل بيشتم وبيكره الطرف الاخر وشفت بعينى ناس عايزة فريقها يفوز
وفى نفس الوقت مستعدة تقعد تتفرج علي الماتش مع الطرف الاخر
اللى عايز الفريق التانى يفوز وبكل هزار وضحك عادى جدا
والاتنين ميقلوش شئ فى حماسهم وارادتهم ان فريقهم يفوز
ولا هو لازم نتخانق يعنى او لازم نكون برة البلدين ونتجمع فى مكان محايد
عشان منهنش بعض ونتريق ونضايق بعض

بس انا عندى حل وسط بس محتاج اللى يفهمه
كل واحد يروح يشوف هدف محدد فى حياته يكون مفيد لية وللاخرين
كل واحد يشوف حال بلاده وصل لاية بسبب تفكيرة السلبى بسبب الكره اللى جوانا
وبعد كدا يجى يشجع ويشوف اسلوبة هيختلف ازاى
عشان عقلة هيكون عارف ماتش كورة لا يستحق كل دا
وان فى اشياء كتير اهم لا تستحق انها تموت وتضيع عشان ماتش كورة

وعاشت مصر والجزائر والعروبة
عاش جمال عبد الناصر وعبد الحليم حافظ وشادية والسادات ووردة
وعاش العرب اللى فى ليلة اصبحوا ملايين تحارب
( بعض )
وربنا يرحم الجميع

انا شخصيا نفسى مصر تكسب مش عشان حاجة ولا كأس عالم
ولا اى حاجة هو يعنى احنا هناخد كأس العالم مثلا
انا عايزة مصر تفوز عشان انا مصرية
واى حاجة فيها اسم مصر اتمنى تكون فيها بلدى افضل
واكيد اى حد جزائرى برضو عايز بلدة افضل

ياريت كل حد يعدى يقول هو مهتم بالماتش قد اية ونسبة تعصبة وصلت لفين ؟
وتفتكروا لية بيحصل كدا وهل الماتش يستاهل فعلا وانا اللى مش فاهمه ؟

الجمعة، 30 أكتوبر، 2009

البحيرات فى اليابان

البحيرات فى اليابان




المرة دى كانت خروجة بسيطة جدا لمكان انا شخصيا بحبة
بحيرة من 4 بحيرات قريبة من بيتنا منهم 3 بنروحلهم مشى
بيأخدو من 10 دقائق لربع ساعة تقريبا وواحدة بعيدة شوية محتاجة العربية
فيها اية البحيرات دى ؟
فيها سمك عادى واية الغيرطبيعى فى دا
اقولكم
السمك دا ممنوع صيدة لانه سمك زينة بس حجمة كبير
وملون اصفر احمر ابيض برتقالى ورصاصى او لون السمك الطبيعى
وفى كمان سلاحف وبط
وفى كمان محل بيبع اكل السمك للاطفال عشان يأكلوا السمك
ومفيش مانع البط يجى يأكل هو كمان والمنظر بيبقى يجنن
وهم بيتخانقوا على الاكل وبيخطفوة من بق بعض
المكان مفتوح وحولية جنينة فيها العاب للاطفال اى حد ممكن يروح فى اى وقت
كمان فى الشتاء يبقى سطح البحيرة عليه تلج خفيف كدا
وبيكون ممتع للكبار قبل الصغار واخرة مرة رحنا سومة كانت مستمتعة جدا
لدرجة ان فى 2 يابانين وقفوا جمبنا يصوروا السمك لانة كان كتير وظاهر اوى



الأربعاء، 21 أكتوبر، 2009

انا والحشرات بوست بدون صور

انا والحشرات بوست بدون صور


قلت خلاص هيرتاح بالى من الحشرات
ايون من اكتر العيوب اللى بكره اليابان عشانها كل صيف
ومن بداية شهر يوليو كدا ولشهر اكتوبر تقريبا انا بعيش فى رعب
لان دا موسم الحشرات مش حشرات زى مصر طبعا طول السنة
ولا حتى نوع الحشرات يعنى متسمعش هنا عن فئران ولا ذباب
بحجم وكميات نوع الحشرات دى فى مصر
لان حشرات اليابان مش بتظهر من عدم النظافة لا ابدا ابسلوتلى على رأي ستيتة
دى ليها اسباب اخرى اهمها مساحة الزرع والشجر والغابات اللى فى وسط اكبر الطرق فى اليابان
واللى احيانا بتكون غابات حقيقية بصعب المرور منها

ثانيا البيوت فى اليابان وعشان الزلالزل هى مقسمة لانواع
بيوت من حديد وبيوت من طوب عادى زى عندنا وبيوت من خشب
واهى دى اللى من الخشب دى اللى منتشرة ومسببالى تعب نفسى
لانهم ببساطة بيحطوا اعمدة خشب ويركبوا عليها البيت
اللى هو حيطة خفيفة اوى ابلكاش اعتقد
او يعنى خشب خفيف جدا وفوقية ورق حائط
ببساطة عشان تتخيلوا بيت من الخشب لازم اقولكم ان البيوت فى اليابان
يحتاج الانسان يقعد فيها سنتين وبعدين يجدد
لانها مش هتستحمل اكتر من كدا الحيطان بتتغير
والارضية والسقف وكل حاجة قابلة للتغير بسهولة وفى كام يوم
لانها بتستهلك بسرعة وبسهولة فى كام شهر

يعنى بيئة فيها بيوت خشب وغابات لازم يكون فيها حشرات
ممكن نكون احنا بنترعب منها بس اليابانين لا
دول بيعلموا الاطفال يلعبوا معاهم
واشهر الحشرات اللى بتظهر فى موسم الصيف
من نص يوليو لنص سبتمبر او اكتوبر كدا حشرة السيمى
ودى حشرة غريبة ومقززة بتطير وليها ديل صغير وشبة الصورصار كدا
دى الحشرة الواحدة منها بتعيش لمدة اسبوع تقريبا او 10 ايام
ومش قادرة اقولكم في منها قد اية قول ملايين و مليارات
وطول النهار ايئ ايئ ايئ ايئ دا صوتها شبة الصويت شوية
وعالى جدا لدرجة انك لو بتكلم حد فى التليفون ممكن يسمعة حتى لو انت جوة البيت

طبعا فى غير السيمى ناموس وحشرات اخرى صغيرة جدا ممكن متشفهاش اصلا
بس انا شفت اثرها عند سوما لانها عندها حساسية من الحشرات
واى حاجة تقرصها او خلينا نقول اى خروجة ليها فى خلال شهور الصيف
ينتج عنها حساسية مزمنة لمدة ايام

انا دورى فى كل دا هو الانهيار اى نعم انهيار
لانى بترعب من انى اشوف حشرة او اموتها حتى لو حجمها صغير
بحاول لانى احيانا كتير بكون لوحدى بس اصلا انا كمان عندى حساسية من الحشرات
مش بسبب قرصاتها لا بسبب خوفى منها حساسية عصبية يعنى

واخيرا وليس باخر فى البلد دى
اليابان فيها مميزات كتير بس مع الحشرات لا
لانهم مش بيحاولوا يقوموها مع انهم يقدروا
بجانب ان مفيش مبيد قوى وفعال زى عندنا عشان يقتل اى حشرة
فى موبيدات بس مش فعالة يعنى لازم تشوف الحشرة وبعدين ترش عليها مبيد
ومفيش مانع بعد كدا لو قتلتها انت لانى معتقدش انها هتموت برضو :(

للترفيه رغم انها حقيقة
حشرات اليابان قوية بدنيا لان البيئة اللى عايشة فيها بيئة صحية

طبعا مفيش صور رغم ان فى كتير من تصوير سمسم طبعا مش انا
بس انا اصلا مقدرتش اشوفها عشان اقدر انشرها
بس للى عايز صورممكن يعمل سيرش فى جوجل على الكلمة دى
japanese semi
بس خلاص

الجمعة، 9 أكتوبر، 2009

هم كدا واحنا كدا

البوست المرة دى طويل يا شباب معلش استحملوة من وجهه نظرى انه مهم شوية
وبيبين الحياة فى اليابان اكتر بعيدا عن الترفية

هى اليابان نضيفة اوى كدا لية ؟

اقولكم
اليابان نظيفة لسببين فى رايي اولهم ان فى صناديق قمامة فى كل مكان
يعنى لو انت ناوى ترمى حاجة فى الارض مش هترميها وهتلاقى ان صندوق القمامة اقربلك ودا دور الحكومة
ثانيا هم اتربوا على كدا لما كانوا صغيرين كانوا بيلاقوا واحدة واقفة فى الشارع
بتديهم مساكة وجوانتى وكيس يلموا فية اى حاجة تقابلهم ولما يرجعولها الكيس مليان يخدو هدية
ودائما فى ادوات يرمو فيها مستلزماتهم رخيصة الثمن معاهم زى مثلا الطفاية المتنقلة
مش لازم يرمى السيجارة فى الارض او علبة الموز اللى على هيئة صوباع
موز بيتحط جواها عشان تحافظ علية وعشان تخلى القشرة فيها لو مفيش صندوق قمامة قريب منك ودا دور الشعب

هى اليابان بتحترم الاديان ؟
اه جدا غير اى شعب اخر مفيش اصلا سؤال عن الحجاب والاديان
حتى لو هم مستغربين مش بيبان عليهم اكتر شعب بيتاثر فى المشاعر
واكتر شعب مش بيبين مشاعروا وكأنه غير مبالى باختلاف شكلك تمام
ممكن لو اتعرفت على حد يابانى كويس شوية
يسألك الفرق يعنى لية بتلبسى حجاب برة البيت وجواه لا كحب استطلاع
ويتفهم تمام ردك وممكن يتناقش معاكى اكتر بس بايجابية شديدة
غير كدا مفيش اى مشاكل بتواجه حد حتى فى الشغل لو عايزة تشتغلى
يشوفوا امكانياتك اية ولو محتاجينك يشغلوكى بعيدا عن ديانتك وجنسيتك
لو عايزين تعموا مسجد جمعوا فلوس واشتروا ارض وابنوها
او اشتروا بيت مبنى براحتكم زيكم زى اى حد تانى المهم متطلعوش صوت ولا تعملوا دوشة

طيب هم ديانتهم اية ؟
فى يابانين مسلمين وفى يابانين مسيحيين
بس الاغلبية بلا ديانة سماوية فى ديانات تانية غريبة هم معتنقينها
بس فكرهم بصورة عامة انها الديانة حاجة هم حرين فى اختيارها ووقت ما يلاقوا ديانه تعجبهم
بيدخلوا فيها او وقت لما الموضوع دا تتوقف علية حياتهم لكن طول ما الحياة شغالة ممكن يفكروا فية وممكن لا
كان ليا صديقة يابانية يادوب اتعرفت عليا وبعدين هى نزلت مصر
وانا فضلت فى اليابان هى كانت زيارة ورجعت تانى بس على بلد تانية
المهم سألتها انتى ديانتك اية قالتلى بابا وماما ديانتهم كذا بس انا لس مقررتش
هى كانت بتدرس حاجة شبة التاريخ كدا وبتتعرف على الثقافات الاخرى

رمضان فى اليابان عامل ازاى ؟
مختلف يعنى مفيش بتاع قطايف ولا كنافة احنا بنعملهم بنفسنا اختراعات يعنى
زى كل حاجة بنعملها بأيدنا من الالف للياء زى العيش والفول والفلافل وغيرهم
ومفيش اصوات مساجد لان المسجد الوحيد ممنوع صوتة يطلع من جواه لبراه عشان ميزعجش الاخرين
وهو مكرفون بسيط من غرفة الرجال لغرفة السيدات مش اكتر بس فية صلاه وتراويح وصلاه العيد
ولعب بتتوزع على الاطفال وحلويات شرقى ممكن يكون حد لسة راجع من بلدة وجايبها معاه
بنخرج فى العيد خروجة كبيرة مجموعة من العرب والعيد دا كنا جزائرين ومصريين وفلسطنين وسودانين وكان يوم رائع

هطيق ارجع مصر تانى واعيش فيها بعد مستوى الثقافة والاخلاق والنظافة بعد البيئة الانسانية واحترام اداميتى ؟
مش عارفة لما نزلت الاجازة رغم انى كنت مشتاقة جدا لمصر ولاهلى كنت سعيدة لمدة ساعة تقريبا وبعد كدا اتصدمت بأول منظر
وقمامة غير معقولة قدام باب مدرسة :( حاولت اتأقلم وانا شخصيا افرض التغير اللى حصلى على اللى بتعامل معاهم والبيئة حواليا بس احيانا فشلت واحيانا نجحت وقلت يمكن لما استقر اعرف اتصرف احسن واامل دا بس اللى عارفاه بدون شك ان مهما طالت الغربة لازم هرجع لبلدى واهلى لانهم حاجة بتكملنى لا يمكن انفصل عنهم

لية بلدنا كدا واليابان كدا ؟ وكدا دى تختلف عن كدا دى اختلاف نهائى ؟
عشان ثقافة الشعب اليابانى ثقافة متزنة كل الشعب بيتربى على مبداء واحد
عارفين الاطفال كلهم من سن 3 شهور بيتعلموا يعملوا كل حاجة لوحدهم احنا نقول دى مش رحمة بالاطفال وناس بلا مشاعر
اتعامل معاهم وانت تعرف ان دى قمة الرحمة لما تعلم طفلك الاعتماد على النفس واتخاذ قرارات بتخلية مش معقد نفسيا بعد كدا
عشان احنا بنحاول ولما نفشل ونحاول تانى ونفشل بنقول خلاص بقى محنا حاولنا مرتين هم لا بيقوموا ويقعوا 100 مرة ويقولوا لازم ننجح عشان نقدر نعيش بدون اى وسطة ولا كذب ولا نفاق بدون شكوى بس بمجهود ومحاولات رغم انهم مش ازكياء هم بس بيلتزموا بالقوانين الثابتة
عشان هم بيحترموك من غير ما يعرفوك مش بيقولوا واحنا مالنا المهم مصلحتنا تخلص وبينضفوا المكان للى هيجى بعدهم يقعد فيه
يقفوا طوابير اكتر من اللى عندنا بهدوء عشان ميزعجوش اللى وراهم ولا اللى قدامهم
عشان هم عندهم الصح والغلط واضحين اما احنا فالمجتمع منفصل وكل واحد بدماغة وبنقول حرية كلمة بنقولها بدون اى فهم ليها
عشان عندهم وقت الشغل للشغل بس يعنى امانة بيخدوا عليها مرتب يقدروا فى وقت الاجازة يرفهوا بية بدون اى هموم
عشان هم عندهم رصيف 4 متر الناس تمشى علية واحنا معندناش
عشان هم عندهم اشارات مشاه واحنا بنموت وبنرمى نفسنا ونقول بنعدى الشارع
عشان خلال 3 سنين حصل حادثتين فى البلد اللى انا فيها وقصدهم 3000 فى مصر
عشان بيحترموا الكبير فى السن واحتياجاته والصغير وسنة وطفولته واحنا عندنا اطفال شوارع
عشان هم عندهم المطافى كدا

واحنا عندنا المطافى بيفضلوا فى مكانهم من الصبح لبليل لو مكنوش نايمين او بيتكلموا او بيكلوا
عشان هم بيحترموا لغاتهم ولو قعدت سنة تكلمهم انجليزى هيكلموك يابانى برضو لغاية لما تنطق
وقليل اوى اللى يعرف منهم انجليزى وبينطقوة بطريقة غريبة
لكن احنا اللى يعرف عندنا انجليزى هو الافضل والعربى بتاعنا بقى غريب
لان لو خلت عندهم مستشفى اى مستشفى الحكومى زى الخاص زى العيادات
بيشوفوا حالتك الاول بعدين تطلع تدفع وتاخد الدواء مفيش صيداليات ودواء عام وخاطئ ولا حالات بترفضها المستشفايات وهى قادرة تعالجها بس عشان الفلوس اه نسيت التامين الصحى اللى بيخفضلك الفاتورة للضعف برضو فى اى مكان اما الاطفال فالكشف بتاعهم ثابت والحكومة بترجعوا تانى كمان

انا اتأثرت قد اية بثقافة الشعب اليابانى الايجابية ؟
الم وحسرة غريبة اوى
لخبطة جامد جدا
اصل انا من مصر ومن الشعب دا
يعنى اصلا كانت مبتفرقش معايا الزحمة ولا الزبالة اللى منتشرة
ولا بتقزز اوى يعنى من الحشرات اللى فى الشارع مادام بيتى نظيف
ولا بتألم لما اسمع عن حالة سرقة الم ووجع جامد كدا
يمكن عشان مجربتش معنى لما تقع حاجة منى فى الشارع لازم القيها
وكانت خلاص بقول الحمد لله
يمكن عشان مشفتش بلد تانية فيها حشرات اه بس مش مضرة بالعكس الاطفال بتتعلم ازاى تلعب بيها
لانها مش ذباب ولا فئران ولا اشياء اخرى بتجى على القمامة
حشرات من نوع تانى بتيجى بس على الزرع والمناطق الخضراء حشرات احنا منعرفهاش لان مش عندنا زرع وخضرة كتير

من كام يوم شفت برنامج خواطر 5 عن اليابان شفت حلقة عن الامانة واتحسرت اوى لما قارن بين المحفظة اللى سبها بقصد فى شوارع اليابان وازى رجعت ولما سبها تانى فى بلد واضح جدا انها مصر ازاى مرجعتلوش
اصلى جربت الاتنين جربت ازاى ابقى عارفة لو وقعت منى حاجة انى هرجع فى نفس الطريق هلقيها زى ما هى
او هلاقيها فى الشرطة لو بلغت عنها وانى هعامل بأحترام وان محدش هيتريق عليا حتى لو اللى وقع منى كان ورقة او اى شئ بسيط

جربت ازاى هم بيخافوا ان الناس تتقزز لما يسيبوا اى قمامة فى الارض ويشيلوا قاذورات الكلاب ازاى بيراعوا مشاعر ناس ميعرفوهمش شفت دا بعينى ولمستة وتطبعت بيه بعد 3 سنين بس عشتهم فى وسط البلد دى وجربت برضو اشوف القمامة فى كل مكان تحت البيوت وقدام المدارس والمستشفيات لمدة 18 سنة والحمد لله تخلصت من المناظر دى وبقيت بحترم الاخرين حتى لو مش بيحترمونى وبقيت بحتفظ بالقمامة وبقيت بقسمها كمان يعنى زجاج لوحدة وبلستك لوحد والباقى لوحدة وهفضل محافظة على العادات دى حتى فى مصر جربت اركب مواصلات محترمة بمواعيد واماكن نظيفة بالثانية بمحطات معرفوه عارفة انا هركب منين وهنزل فين مع لوحة فيها الرقم اللى هدفعة حسب رقم المحطة اللى ركبت منها اللى بسحب ورقتها وانا بركب الباص من غير ما حد يساعدنى او حد طالع يسحب تذكرتين بدل واحدة

ايوووون هحكلكم حكاية ظريفة اوى من سنة كدا نزلنا مصر اجازة لشهر واحد وقررنا نروح البنك فقعدنا نستنى كتير اوى عقبال ما نادو رقمنا وانا مليت من الانتظار فسمسم قرر يحكلى على موقف حصلة لما راح بنك تانى غير اللى احنا فيه لوحدوا
لقى اية بقى لقى اله بيسحب منها رقم واول ما شباك يفضى بتتعرض الارقام بالترتيب
المهم سمسم كان معاه رقم 500 بيبص فى البنك ملقاش كل اللى فى البنك باللى شغالين يكملوا 500 واحد
لا واللى زاد ان الماكنة كان جنبها واحد بيسحب ويديى للناس الارقام طيب لزمة الماكنة اية بقى
هى مش مفروض تحل محل الشخص اللى شغال دا
المهم برضو استنى سمسم ولقى اية لقى ارقام بتظهر على الشباك ومفيش حد بيروح
وبعد فترة كدا حد كان قاعد جنبه قالوا تأخد الرقم دا اللى هو كان 300 وحاجة
على اساس انه اقرب من 500 ودا كان لان الشخص دا ساحب كذا رقم عشان يخلص بدرى
مش فاهمة ازاى بس حتى استخدم التكنولوجيا بقى فيه تدخل يخليها للاسواء


البوست دا تاعبنى كنت عملاه على انه بوست خفيف
اجاوب فيه على اسألة ناس سألتها واسألة انا ضفتها بس الظاهر المقارنة مش هتنتهى
وكل يوم هتضايق اكتر من اللى قابلوا عارفين انا بكره المقارنة دى
حد عارف سرينا اهرونى بتاعت رافت الهجان هو كان شايف انتقادها لبلدها على انها شبهوا يعنى كره ليها
رغم ان افكارهم كانت مختلفة وبعد كدا فهم انها بتنتقد بلدها عشان عايزاها افضل
مش لانها مش بتحبها اهو انا كدا بالضبط بس بكرة المقارنة
لانها بتخلينى فى صورة اللى مش بيحب بلدة وعايزها وحشة
مع انى بتضايق من المقارنة لانها بتطلع مصر واحشة رغم ان انا بحبها
ونفسى ارجعلها النهاردة قبل بكرة


الثلاثاء، 8 سبتمبر، 2009

راسيرا راسيرا

فى اول المهرجان خالص فى الست دى وفى منها فى المهرجان كتير
بس اول ما دخلنا الطريق اللى فيه المهرجان لقيناها بتدى سومة دول كيس وملقاط كبير اخضر
وجونتى صوف كدا ليه بقى عشان لو قبلت اى قمامى فى الطريق تلمها ولو جابت الكيس مليان وودتة
لمكان محدد كدا واقف فية واحد بيحط كل قمامة فى صندوقها بيصنفها يعنى
ورق وبلستك وزجاج المهم انها لو ودت الكيس مليان بتأخد هاشى هدية ودى العصاية اللى بيأكل بيها اليابانيين
المشكلة ان سومة لبست الجونتى فى عز الصيف ومسكت الملقاط وبعدها ملقتش حاجة فى الارض :)

المهرجان بقى متقسم 2 الاول للفنون ودا في اشكال وشخصيات كرتونية زى اللى فى الصورة دى
والسحرة والمغنيين والمهرجين وناس بتبيع اشكل وفنون مرسومة او تحف من بلاد مختلفة


والنص التانى اللى هو البازار اللى بيتباع فى الاكل والالعاب وصيد سمك الزينة والنيشان وكدا
واكتر حاجة انا بحبها التفاح اللى علية سكر دا
الاختراع دا اللى هو ببساطة ماكينة ثلج وكوبيات وبيترش عليهم شربات بالطعم اللى انت عايزة والشليموة بتكون مقصوصة من جنب من الجوانب زى متكون معلقة كدا الاختراع دا رائع خاصة فى الصيف وفى يوم حر بس اللى حصل ان المهرجان جة فى رمضان ومشترتش منة السنة دى غير 2 بس وقبل ما المهرجان ينتهى بربع ساعة
سمك مشوى وشئ اخر اسلوبة بسيط والناس رايحة جية ماسكة عصاية فيها سمك مشوى
الموز اللى مغطى شيكولاتة وكريما وفى حلويات او بسكويت فى النص بأشكال مختلفة من واحد للتانى
بين قسمين المهرجان فى كبرى الصورة من فوقة تجبرك تصورها رغم انها بسيطة
كمان الجوانب اللى فى الطريق عشان العربيات تركن فيها مؤقتا لو فى اى حاجة تستدعى الوقوف
من فوق شكلها اوضح ميحسش بيها اللى ماشى تحت فى اى حارة من الحارات

فى اخر اليوم بيكون فى الاشكال المضائة دى
الشكل دا ناس هى اللى شيلاه وفى منه كتير وبأشكال مختلفة بيلفوا بيهم طول الطريق رايح جى
وغالبا بيكون عمل تطوعى وبيعتقدوا ان مشاركتهم بتبعد عنهم الارواح الشريرة


نفس الناس اللى بيشيلوا الشكل فى بين كل شكل والتانى ناس معلقة الاف الاجراس فى هدومها وبيوزعوها على الاطفال
ودا لانهم بيعتقدوا ان الاجراس هى اللى بتطرد الارواح الشريرة وبتجيب الخير والارواح الطيبة فى السنة الجديدة
وفى اجراس اكبر متعلقة فى اشكال خشب والناس بتشلها وبتهزها وفوقها بيكون فى اشخاص لبسين هدوم ووشوش وحوش او ناس طيبين وبيرقصوا رقصات غريبة يعنى بيقلدوا الارواح الشريرة والطيبة

نسيت اقولكم رسيرا راسيرا دى حاجة بيقلوها طول ما هم ماشين بالاشكال دى
او بيهزوا الاجراس مش عارفه معناها اية بس بيقعدوا يقولوها بصوت عالى
وللعلم الجزء من المهرجان اللى بيكون فى الرقص والاشكال
بيكون فى شارع رئيسى فى وسط البلد والشارع شغال لغاية قبل المهرجان ما يبداء بساعة
وبعدها بيقفلوة ويفتحوة بعد ما المهرجان يفتح بساعة بس بيشيلوا ويحطوا الاشارات
والانوار اللى فى اشكال ورق اللى باين جزء منها فى الصورة دى

بس كدا خلص المهرجان لمدة يومين بنفس الاحداث
ماعدا الرقصات اليابانية اللى بتكون اول يوم
بتختلف تانى يوم وتكون رقصات مختلفة اسبانية وامريكية وشرقية
ايوووووون شرقية بأغنية لحكيم او مصطفى كامل وموسيقى شرقى
شغالة فى وسط الشارع واحنا بس اللى فهمنها
و لولا ان فى ناس مش بتحب تشوف الاشكال دى فى المدونة وبتضايق
كنت ضفت فيديو لاى سنة من السنين اللى حضرت فيها المهرجان
ونتقابل المهرجان اللى جى لو كنت لسة فى اليابان


الثلاثاء، 18 أغسطس، 2009

رحنا البحر

رحنا البحر

رحنا الويك اند دا واللى فات وكنت عايزة اعمل بوست
بس قلت استنى لما نروح تانى مرة كمان اللى هى كانت امبارح دى

الاسبوع اللى فات رحنا اكواريم قبل ما نروح البحر
وبعيدا عن انى انا وسومة بنحب الماية والسمك والبحر والكلام دا
المكان كان رهيب

كان فية اسماك قرش كبيرة وصغيرة واسماك غريبة معرفهاش
والاجمل ان كان فى نيمو الاب والابن دول عجبو سومة طبعا
وكور مطاطية فيها انواع اسماك مختلفة جبت اتنين للذكرى
واليابانين الاذكياء حطين نيمو وجمبوا قنديل البحر ورغم انى مش بفهم يابانى كويس
الا انى سمعت كل الامهات بيقولوا نفس الجملة اللى بقلها لسومة
بصى دا نيمو ودا باباه ودى دورى وكل ابطال الكارتون



الاسماك كتير وفى وراهم اماكن ممكن ندخل فيها ونتصور
كل الاكواريم كان على المحيط وفى جزء من المحيط محاط بصخور
فية شعاب مرجانية وسمك دا اكتر حاجة عجبتنى بعد عرض الدولفين اللى دخلناه مرتين

لان عرض واحد لا يكفى اصلا الصف طويل جدا ولافف يمكن 4 مرات والكل بيدخل بس بنظام
ولو عايز تدخل وتلاقى مكان تقعد فيه اقف فى الصف قبل العرض بساعة وبرضو هتدخل تدور على كرسى
الماية كالعادة زرقاء تماما
الدولفين باين وكان معاه حوت كمان وبيعوم عند الزجاج قريب مننا ويعملوا حركات قبل العرض
احنا كنا قاعدين فى اول صف بعد ما قعدنا فى الصف ساعة ونص
الملحوظة اللى اخدت بالى منها ان فى 2 حوت و4 دولفين وكل عرض فى 3 غير العرض اللى قبلة
مع مدربين مختلفين وكل دولفين او حوت معاه المدربه بتاعة

اول العرض بيوزعوا شيت صغير دا لاول صفين
عشان ميتبهدلوش ماية لما الحوت نط برة الماية وينزل تانى
الدولفين كان صغير شوية مكنش بيرش ماية كتير بس الحوت كان ضخم
ومرة منطش كويس المدربة مدتلوش سمك يأكلة فعمل الحركة اعنف من العادى ونط ورش ماية كتير

بينطوا كمان يلمسوا الكور اللى متعلقة فى السقف بحبل مرة بديلهم ومرة بوشهم
فى كمان فقرة فى العرض الحوت بيلزق فى الزجاج نحيتنا وينزل يجيب ماية ويرشها علينا ودى اقرب ماية بتوصل



المدربات بينزلوا معاهم الماية ويقفول على وشهم والدلفين يزقهم فى الماية بسرعة عالية يعنى يادوب يتشافو
ا وبعدين بيغطسوا والدولفين يطلع يدفعهم فى الهواء وينط معاهم
ام الحوت فأستاذ بينام على ضهروا والمدربة تقف علية ويعوم بيها ببطئ فى الحوض

طلعنا رحنا البحر بس يادوب ساعتين مش كتير الوقت كان فات فى الاكواريم
ومنها اخدنا القرار بالرحلة بتاعت امبارح يوم مخصوص للبحر وقد كان
والاطفال طبعا كانوا سعداء جدا

التحضير الطبيعى للرحلة قبلها بيوم ويوم شوبينج
ونوم متأخر وسفر ساعة ونص او ساعتين عقبال ما نوصل للمحيط والشواطئ
الفرق بين الرحلة دى واللى قبلها كان فى الطريق على الطريق السريع
كان فى اجمل مشهد ممكن الواحد يشوفة جبال ومرتفعات كتير خضراء تمام وفى اسفلها بيوت مزارعين واراضى خضراء مزروعة
وفى وسطهم نفق متقطع عشان تقدر تشوف الجمال الطبيعى دا الطريق فى حضن جبل اخضر
طبعا صورت بس الصور مش مظبوطة لانة طريق سريع ومن العربية والازاز مقفول :(
الاغرب والاجمل مكنش انى اشوف الطريق فى وسط الجبل من بعيد ولا انى اعدى فيه
الاجمل كان لما الانفاق انتهت وطلعنا من اخر نفق على كبرى ومنه كنا عند قمة الاشجار وشايفين كل البيوت والجبال جنب بعض بجد منظر خرافى سبحان الخالق على جمال الطبيعة اللى لقى ناس بتفكر وتعرف تستخدمه صح


المرة دى وصلنا على 10 الصبح والاطفال مش بيستنوا بيجروا بهدومهم فى الماية
بس المرة دى الموج كان عالى رغم حاجز الامواج واضطروا يستنوا
يعنى البحر المتوسط موجة عالى فمابالكم المحيط بقى الشط والرملة هم الشاطئ
لان لو انت واقف عليهم الموجة هتيجى توصل لنصفك واحيانا ممكن تسحبك لجوة معاها
وهى محملة بقدر من الرمال يكفى لبناء برجين من كتر قوتها ولانها بتبتدى من الشط اساسا

الاطفال فضلوا المرة دى يقعدوا على الشط اللى هو ابعد ويلعبوا فى امان
لم يكن تام تمام لان الماية كانت بتوصلهم ساعات وخاصة المغرب كدا
دى سومة وهى مستلقية
و دى حاجتنا على البحر وكل حاجة اخدناها معانا شماسى وكراسة وتربيزات
الشط مفيهوش الحاجات دى كل واحد يجيب حاجتة معاه
طيرنا طيارة ورق لفت على الكبار والصغار :)
ولعبنا معاهم احيانا برضو وش بيضحك

واول ما طلعنا من الماية وقلنا نقعد شوية ونتأمل شفنا المنظر دا
ايوة دا واحد معاه الكلب بتاعه نازل يرفه عنو وهو دا اللى كنت بتكلم عنه من بوستين فاتو
لا وفى عوامة كمان مش فاهمة التفكير عند الناس دى ازاى يعنى

كان يوم طفولى جميل وكنا اسر مختلفة الجنسيات مصريين وجزائرين وفلسطنين
وانشئنا المملكة العربية على الشاطئ اليابانى
وقد كان حتى موعد رحيلنا لاننا اتاخرنا ربع ساعة على الباركينج بتاع العربيات وكنا اخر ناس تمشى :)

وروحنا رغم كريم الشمس وكل منا يحمل لون البحر وخاصة الاطفال
اللى قعودهم على الرمله فى الشمس غير لونهم تماما الى الاحمر

ملحوظة / الاضائة سيئة جدا رغم الفلاش
عشان السمك ميتضايقش :)
اه بجد كل سمك مهيئين لية الجو المناسب لية
حتى فى الاضائة
وكل الصور بعدستى الجميلة