CLICK HERE FOR BLOGGER TEMPLATES AND MYSPACE LAYOUTS

الاثنين، 21 مارس، 2011

الميكرويف لف وكان هيقع عليا بس لحقته :)


يوم عادى ممل جدا بلف فى الفيس بوك وتويتر ومستنية صلاة الجمعة فى مصر
عشان اشوف هيحصل اية على امل وتفكير كالعادة
سوما فى المدرسة سمسم فى الشغل وخلاص على وصول اهم
وانا قمت اتوضاء عشان العصر واجهز الاكل
اها لازم بالتفصيل الممل اليوم دا لازم يبقى فى الذاكره

الاكل متولع علية النار الشفاط شغال انا بتوضاء جمبهم اهو
واذ فجأتن الاقى صوت الازاز بيخبط فى بعض والمياة والغاز والشفاط وقفوا
جريت على الموبيل وقولت لسمسم الحق زلزال ضخم قالى اها انا وسوما فى العربية وجاين
وقفلت وانا مرعوبة ولسة بحط الموبيل وهتحرك واذ فجأتن برضو ولا كان اللى فات دا كان زلزال
جة بقى زلزال على حق فتح الدوليب ونزل اللى فيها ووقع كل الازايز
زيت وماية وكل الكوبيات والاطباق والاكل اللى كان على النار وكل حاجة
وانا اتسمرت فى مكانى تحت التلاجة اللى فوقها الميكرويف واذا بى فجأتن برضو
الاقى الميكرويف بيلف وهيقع عليا سندتة بأيدى وانا عينى بتلف تشوف البيت
واللى بيحصل ومش مستوعبة وودنى بتسمع اصوات التكسير
مفكرتش انزل زى منا سامعة الناس بتجرى فى الشارع وعلى السلم
الزلزال هدى شوية لمدة دقيقة رنيت تانى على سمسم ملقتش شبكة (دا مبيحصلش كتير هناك )
وهوب صحى تانى الزلزال بس كونت سبت الميكرويف وقعدت رجلى مكنتش شيلانى من الرعب والقلق
بس سوما وسمسم جم وسوما قعدت تحت التربيزة اللى كانت اتحركت بكرسيها
ومفيش ثوانى وجة زلزال تانى قوى رحنا اخدنا بعضنا ونزلنا الشارع قعدنا نلف شوية
وبين كل خطوة وخطوة نلاقى زلزال ورغم اننا ماشين الا اننا حسينا بيه
وفجأتن برضو السما غيمت واليابانين كل واحد قدام بيته واقف بشنطة الخطر ورديوا
هم عارفين ان فى زلزال هيحصل خلال ال 10 سنين الحالين ابتداء من 2006 وجاهزين
ولو كانت اقتصرت على زلزال كانت هتخلص بسرعة يمكن توابع يوم ولا اتنين
وخساير مصنع وكام عربية ويمكن ناس كبيرة تتوفى بسبب حاجات ضخمة تكون وقعت عليهم حصلت قبل كدا
بس الكارثة الحالية تكمن فى التسونامى هو دا اللى مكنوش عارفينه
وهم شعب روتينى بيتخض بسرعة لو حصلتله مفاجئة ومكنش عامل حسابة
دا لو احنا فى محل والبائعة كلمتنا كلمة وقولنلها مش فاهمين
بتحتاس وتتخض فما بلكم بتسونامى بقى وحرايق ماتو من الرعب والخضة اكتر ما ماتو من الزلزال

المهم رجعت البيت اتطمنت بالناس على الفيس بوك وطمنت ماما واتطمنت منها
وهوب عاشر حصل زلزال رحت نزلت تحت التربيزة لحد مخلصت الفيس بوك والناس والاطمئنانات
ونزلنا تانى بس الجو كان برد فأخدنا العربية ولفينا شوية واحنا هنموت من القلق على باقى العرب اللى هنا
ومفيش شبكة نتكلم ونسأل بس لقينا الاشارات بعضها واقف والنور قاطع فقولنا نرجع احسن
فى حد مصري قريب مننا اسهل حد نتطمن عليه وقد كان وبرضو لقيت هناك مفاجئة بس حلوة المرة دى
لقيت عائلة سوريا وعائلة سودانية وعائلة فلسطينية هناك عندهم اتطمنا على بعض وكل واحد روح بيته
واحنا لسة مرعوبين واليابانين بيطمنونا اكتر وكل الاخبار بتقول فى كارثة تانى فى الطريق كل واحد يعمل احتياطاتة

واخيرا فى اليوم دا انا قعدت افكر و انا بحمد ربنا ان بلادنا امنة ومفيهاش الرعب دا
تلحق كوباية ولا تلاجة من انها تقع عليك وانك تلحق تسندها فى ثوانى مرعبة
من عجز التفكير وفقر اللسان وجحوظ العين فى اذبهلال وانك تنقذ حياتك فى ثانية
ساعات مش بنقدر نتحكم فيها لا اله الا الله قادر على كل شئ ولنا حديث اخر وتكمله لاسبوع الدمار اللى عشناه دا
عودة مزلزلة بس ضرورية

شكر لكل الناس الل سألت عليا
ام احلى بنات
ايوشا
كل الطيبة
صبصب
ليدى اللى مش عايزة تكبر
سارة
عادل
سالى
ليس فقيرا من يحب
محمد غالية
محاسن صابر
محمد عرفة
موناليزا
نور
دعاء عويضة
نورهاتى
فتافيت

Mohamed mak
حروف
مورا موى
استاذ عمرو
لو حولت انقل الاسامى من الفيس بوك مش هعرف لان فى ناس معرفهاش اصلا سألت بجد كانوا صبرى فى الاسبوع دا ومعرفش من غير سؤالهم كنت هعمل اية كل حد سأل وكل حد جيت على بالة ومعرفش ولا لحق يسأل كل حد دعالى الف الف الف شكر متحرمش من اجمل صحبة رغم فقر علاقاتى بيهم الا ان تأثيرهم مهم جدا فى حياتى الف شكر ربنا ميحرمنيش منكم يا ورود بلوجر كله

ونكمل البوست اللى جى ان شاء الله

الأحد، 26 ديسمبر، 2010

هو الاحساس بيها مش بيتغير لية ( فى القلب اسمك )

فى القلب اسمك
هو الاحساس بيها مش بيتغير لية ؟


البوست دا كتبتة من زمان من سنة
اتنين او تلاتة اه من زمان مش بقولكم
بس لسة نفس الاحساس قاعد ومربع كمان
يارب متحرمناش من الاحساس بيها ابدا


الأربعاء، 3 فبراير، 2010

كفاية نكد بقى يا بلوجرية



بما ان النكد هو سيد الموقف قررت انى اقتلة واستريح :)
وقتلت نكدى وعايشة من غير نكد يا هووو

فى اية يا بشر لية كم الحزن والكأبة دا كله
هى الدنيا فيها كام سنة والسنة فيها كام يوم
واليوم فى كام ساعة عشان نضيعهم فى الحزن

وتخيلوا معايا ان الحزن تسلل لحد ما وصل لعالمنا الافتراضى
خلينى اسمية افتراضى لانة كام ساعة فى اليوم بنقعد فية بس مش طول اليوم
تخيلوا ان حتى الكام ساعة ترفيه يتقلبوا نكد

طب بلاش شغل محاضرات
خلينى اقولكم على وصفة سهلة
وصفة هايلة :)

تعالى فى نص ساعة وقت فراغ فى يومك
واختار مكان هادى واعمل كوباية نسكافية
محدش يقول مبحبش النسكافية خليها يانسون كركادية
اى حاجة بتحبها المهم تكون دافية
وكمان المهم تكون انت اللى عاملها
ومتنسوش ترتبو الحاجات بعد ما تخلصوا
مش هنسيب ماما او اخوتنا يتدبسوا فيها وننكد عليهم


تمام كدا خد الكوباية وروح المكان اللى انت اخترتة
وياحبذا لو كان جنبك موسيقى هادية سولو كمان
ولا زى ما تكون بتحب اغنية سكالانس على رأى ايهاب صالح فى اف ام
او فى حب مصر منير حماقى عمرو دياب عمر خيرت زى ما تحب الاختيارات متعددة

غمض عنيك واشرب واستمتع بالاغنية او الموسيقى وعيش
نص ساعة بس هتحس بعدها انك تعبت وعملت لنفسك حاجة
بدل محنا عمالين طول اليوم نضايق فيها ونكئبها كدا

سيب كل حاجة على ربنا
متفكرش غير لما تخلص الحاجة اللى بتشربها
وفكر بهدوء وبورقة وقلم
قول لنفسك ان الحلو بيعدى والوحش بيعدى
وكل اللى بيجيبة ربنا خير هو العالم بالغيب مش احنا
وان نصيبك هتخدوا مش اكتر ولا اقل من اللى ربنا كتبهولك

متزعلش من حاجة ولا من حد خليك متسامح ولو مقدرتش وجهو
ولو مقدرتش يبقى ابعد نهائى عن الشخص اللى مضايقك لحد ما تهدى وتفكر
الحل بيجى من عند ربنا مش لازم نستعجلة
الايام خير دواء لحياتنا واللى بيحصل فيها

لو مغترب مسيرك هترجع اكنك راكب الطيارة بس الوقت طول شوية
استمتع بوقتك وشوف اماكن جديدة متستناش العودة لانك كل ما هتستناها رحلتك هتطول

لو حد غالى عليك مريض ادعيلة متكتئبش وتحزن
مش بأيدك شئ كل شئ بيد ربنا سبحانة وتعالى ادعيه بصدق هيستجب لك ان شاء الله

لو مسؤليات الحياة والاخبار مضيقاك
روح اقراء تاريخ وشوف اجددنا حصل لهم اية
وعملوا اية وعاشوا ازاى وادينا اهو جينا بعدهم وعايشين
حصل اية فى الدنيا الاكتئاب محللهمش مشاكلهم بالعكس دا زودها
ولما عملوا اللى عليهم وتفائلوا واتكلوا على الله نجحوا

توكلوا على الله من جواكم , اسعوا لحياة افضل
بس متكتئبوش فكروا نفسكم ان الحلو بيعدى والوحش بيعدى
وكلها بتبقى ذكريات مهما كانت قسوتها
بصو للناس اللى بتحبكم وبتخاف عليكم

صالحوا نفسكم وادوها من مجهدكم ووقتكم
شكلى طولت عليكم بس حقيقى انا زعلانة
لانى شايفة معظم المدونين لو مش كلهم مكتئبين
وبعدو عن التدوين وال اية اجازة ال
لا معندناش اجازات مش مصرح بيها
كله يتفائل الحياة وحدة ولازم نعيشها كويس
ونرضى نفسنا ونسعدها مادمنا مش بنسئ لحد ومادامت فى طاعة الله

ملحوظة / فى ناس ليها استيل معين
وطرق اخرى للخروج من الاكتئاب
ياريت يكون فى اقتراحات من السادة الزوار

و فى ناس مينفعش معاها اى كلام
ولا اى افكار للخروج من الاكتئاب
ودول بقولهم بلاش تقروا الموضوع خالص
نيهاهاهاهاها نفسى اضحك الضحكة دى من زمان

اهداء
لستيتة ولدودو الرومانسية
وفاتيما وصبصب لليدى وخواطر شابة
لبسمة انور ولعادل واحمد اسماء واحلام
واحمد ابو العلا وميمايا وبنت مصررحيل
لوجين وكفاية طيبة ومنوش وسوبيا سووول
نوارة وايمان بنات افكارى بينجا وفراشة ووردة وشيما
فشكول وعمرو ومصرية وحسام غانم محمد غالية
وكل اللى هيعدى من هنا

الموسيقى مش الاغنية يا شباب لان الاغنية
تكئب اصلا بس الموسيقى مناسبة اوى للشتاء
ولمج النسكافية



الثلاثاء، 5 يناير، 2010

ستيتة ملكة التدوين , بشمهندش احمد , سفارى


كل سنة وانتم طيبين
2010
سنة جديدة سعيدة عليكم
بالنسبة ليا فيها تحديد مصائر كتير
يارب تكون خير علينا وعليكم
و
تتحقق فيها كل احلامنا و احلامكم

ستيتة


البوست دا كتباه من اسبوع كدا
بس النهاردة ورغم الاجازة الطويلة اللى ادتها لنفسى ومش عارفة اغيرها
لازم ينزل عشان عرفت اية يا شباب
عرفت ان عيد ميلاد دكتورة ستيتة بكره
يعنى عيد ميلاد ملكة التدوين
دكتورينا وحكيمتنا
نصائح من الماظ
رومانسية من الخيال
فكر تانى لاى موضوع مثير للجدل على الساحة
بتدخلك فى دهليز الحدث وتوريك اللى مش شايفة
حد يدخل قلبك على طول من اول تعليق واول بوست تقراهلها
وتبقى مبسوط انك عرفتة وقريتله
حتى لو اختلفت معاه فى الرأى
خالة البعض , ودكتورة البعض , وصديقة البعض
مش هتردد انى اقول عليها سند البعض
فى عالم كنت فكراه افتراضى
لقيتة حقيقة ومن اكبر الحقائق فية بالنسبالى ستيتة
ربنا يسعدك يا ستيتة ويفرح قلبك
وتحققى كل احلامك
وتكونى انتى واسرتك فى احسن حال

بشمهندس احمد

مرة وحد لقيت كل المدونين بينادوا وبيقولوا
البشمهندس احمد اختفى يا رجالة
قلت يمكن غلطوا فى العنوان ولا كان قافل المدونة شوية للتجديدات وفتحها تانى
وبكل ثقة بضغط على اسم مدونتة القيها مقفولة ان ان ااااا
طب لية مشى فى صمت مش يمكن كنا نقدر نقنعة بالبقاء
زى ما عمل مع معظم اللى حصلهم مشاكل فى عالم التدوين وقرروا ينسحبوا
انا بضم صوتى لصوت باقى المدونين يمكن الصوت يعلى وبشمهندس احمد يسمعوا
التدوين دا حريتنا ممكن نأخد منه اجازة بس منسبوش ونهد كيان بنيناه بأفكارنا ونرحل

سافارى

من فترة كدا نزلنا رحنا سافارى
الاطفال طبعا كانوا هيتجننو وبيناموا ويصحوا
يحلموا ان فى الويك اند هيروحوا عند الحيوانات

صحينا بدرى كالعادة
بس انا لحقت نمت لى شوية
مش زى باقى الرحلات كنت اتعلمت بقى

الجديد اننا اجرنا عربية كبيرة تحفة بجد كنا 3 اسر
بس عشنا فيها ولا كأنها شقة استديو صغيرة
حتى انه كان متاح اننا نصلى فيها واحنا واقفين
والاطفال قعدوا فى ارض العربية ونامو كمان وهم بيتفرجوا على الكارتون
المشوار كان طويل على الطريق السريع كالعادة بس محسناش بية
صحيح الصحبة بتفرق جدا

الطريق كان ممتع جدا لان البلد اللى كنا ريحنها فى حضن الجبل وكل شوية الجبل بيقرب
وطبعا انا مقضياه تصوير وكل الصور مطلعتش حلوة عشان من ازاز العربية
بس بعد كدا صورناها من ساقية كبيرة تصيب اللى يركبها بالدوخة والرعب واللى بيصور بفقدان التوازن
وطبيعى الصور دى مش تصويرى لانى كنت مرعوبة فوق
دا تصوير سمسم

نرجع للطريق تانى لا كنا وصلنا خلاص
وحجزنا الباص اللى هيدخل عند الحيونات واللى منه هنقدر نأكل الاسد
واحنا كاكبار اصلا كنا رايحين نأكل الاسد :)

بس اول ما ركبنا الراجل سواق الباص ادانا اكل الحمار الوحشى وكدا مدناش لحمة نأكل الاسد
وكنا عاملين نتسأل هو فية اية بس متسألناش كتير عشان ابتدينا نستمتع بالطريق
الحيونات منطلقة واحنا محبوسين مفيش غير شباك صغير وحولية شبك دا اللى نقدر نأكل منة الحيونات
ابتدة الطريق بالحمار الوحشى والزرافة اللى كانو حطينلها اكل فوق الباص عشان تقرب ونشوفها واحنا اكلنا الحمار الوحشى طبعا او بالاخص سومة شفتوا الاطفال اخدين كل المميزات

انطلقنا بعد كدا بقى وخلينا نروح للصور
مش هقعد اقول اسماء حيونات وخلاص
الصور اسهل


بعد كدا نزلنا من الباص فى منطقة فيها
حيونات صغيرة زى الغزال واللامة والسناجب
برضو اسيبكم مع الصور


وفى وسطهم وبدون مقدمات
لقينا النمر والاسد فوق رأسنا على طول يفصلنا عنهم ازاز شفاف

طبعا حطينا ايدنا فى ايد الاسود واتصورنا
وكمان لقيناهم حوالينا بس محبوسين وجبنا اكل واكلناهم


على اساس ان خلاص هنركب الباص ونرجع
بس دا محصلش لان الباص اخدنا لمكان تحفة بجد الاسد كان منطلق بدون حواجز

منظر استحالة يتنسى وكمان وهو قاعد تحت الشجر
وحوالية اللبوئات ولا وهو بيتمشى وسط الباصات
وكانوا حاطين لنا لحوم والمقص الكبير اللى بناكلهم بية قدام الكراسى
فأكلناهم وبجد على قد المتعة على قد الخوف رغم كل الحواجز
تحس قد اية الانسان ضعيف وبيخاف من لا شئ هو صنعة لنفسة
الاسد مفروض مش جعان والعربية متقفلة كويس علينا ورغم كدا كنت خايفة

عدى الاسد وقلنا خلاص بقى هنطلع
لقينا الباص رجع بينا تانى من نفس ذات كل الطريق
بس المرة دى غير باقى كل الحيونات اللى شفناها قبل كدا كان فى الفيل بيرقص
اه بجد عمال يحرك رجلية والزلومة وحقيقى بيرقص
حتى سواق الباص اللى بيقول معلومات قال الفيل بيرقص تانجو :)

بس وطلعنا ورحنا الملاهى اللى فى نفس المكان تقريبا الاطفال لعبو شوية
واحنا صورنا من الساقية المناظر الطبيعية اللى فوق شوية دى
وكان فى برضو حيوانات بسيطة زى الخنزير والحصان


ومنها البارك كان بيقفل الساعة بقت 4 العصر
وكان مفروض نبتدى رحلة العودة ودا اللى حصل
وكالعادة فى نهاية اى بوست
هقولكم كان يوم ممتع
مش بس للاطفال ولينا كمان
اتمنى انه يتكرر
واتمنى اكون نقلته ليكم بصورة كويسة
وتكونوا استمتعتم بيه