CLICK HERE FOR BLOGGER TEMPLATES AND MYSPACE LAYOUTS

الجمعة، 22 مايو، 2009

الكمامات

الكمامات


فى هوجة انفلونزا الخنازير والكلام دا و انتشرها فى اليابان عن طريق طلبة مدارس ثانوى
كان فى مباريات كورة بينهم واتعدوا من بعض يعنى اماكن مزدحمة

قلت خلاص لازم نلبس كمامات حتى سومة وطبعا هى كانت فكراها مناديل وفرحانة بيها
بس اتضايقت لما فضلت على وشها فترة

هى مفيدة صحيح بس بتضايق فى الكلام والتنفس خاصة لما تتلبس فترة طويلة
المهم هنا ثقافة الكمامات عادى يعنى لو حد عندة برد لازم يلبس كمامة عشان ميعديش حد
او لو حد خارج ومش عايز يتعدى بيلبسها عادى

المشكلة مش فى اليابان
ومش فى الكمامات لان مش هى اللى هتمنع المرض بس اهو نعمل اللى علينا

اللى حصل انى كلمت اخواتى فى مصر قلت لهم الامتحانات اوشكت
وهترجعوا تانى للمدرسة والكلية
فياريت تلبسوا كمامات قالوا اوكى وخلص الموضوع

بعدها بيومين الموضوع والاخبار زادت وكنت بكلمهم تانى قلت لهم ها جبتوا كمامات
طبعا قالوا لا طيب لية ؟ انتوا مش خايفين تتعدوا

راحوا قالوا الناس هتتريق علينا
يعنى اية ؟
تعدوا ولا الناس تتريق عليكم ؟
اللى يتريق يتريق المهم فى الاخر تفضلوا كويسين
وانتوا لو رديتوا وقلتوا كدا افضل من المرض هم هيسكتوا
ويمكن يعملوا زيكم

وخلصت معاهم وانا متأكدة انهم مش هيلبسوا كمامات
بس الموضوع فضل فى دماغى
والمرة دى الثقافة ثقافة شعب

عايزة اعرف كل واحد هيعلق
انت ممكن تلبس كمامة عادى وانت نازل الشغل ؟
وانتى نازلة الكلية ؟
وانت بتعمل شوبينج ؟
وانتى مع اصحابك ؟

انا عن نفسى هعلم بنتى تخاف من المرض حتى لو برد
تاخد بالها من نفسها تعمل اللى عليها فى المحافظة على صحتها
والباقى على ربنا بس كلام الناس مش بيجنبنا المرض وانتقال العدوى

مين فيكم ممكن يستخدم كمامة لو جالة برد وعاش حياتة عادى ؟
ومين فيكم فعلا بيلبسها للوقاية خارج البيت
بعد ما سمع عن مرض انفلونزا الخنازير والطيور واى مرض تانى
طيب لو شفتم حد لابس كمامة هل هتتريقوا علية حتى لو فى عقلكم ؟

بجد مستنية اسمع رأيكم ؟

الأحد، 10 مايو، 2009

انفلونزا الخنازير جت اليابان

انفلونزا الخنازير جت اليابان
ربنا يبعدها عن مصر


هم هنا عندهم الة فى المطار
بيقيسوا بيها على درجة حرارة كل اللى داخلين اليابان

ولقوا 3 مصابين رسمى
و49 حالة مشتبة فيهم
والطيارة اللى لقوا فيها المصابين جاية من كندا باين

بس رغم كل دا لسة فى حالة امان لان هم مسيطرين شوية على المرض
ومفيش مريض بيدخل ولو حد مشتبة فية حتى بيتعزل
بس المشكلة هل فترة انتقال المرض من الخنزير للانسان فعلا انتهت ولا لسة ممكن تحصل
وهل ممكن المصاب فى بداية المرض تكون درجة حرارتة مش عالية وبكدا ميعرفوش انه مريض



شكلها هتبقى ايام جميلة ان شاء الله


يارب .. ارحمنا و احفظنا
و احفظ لنا اوطاننا
و لا تحرمنا الصحة
و قدم ما فيه الخير لنا و لكل امتك

ملحوظة/ اعتذر عن الرد على تعليقات البوست اللى فات
ان شاء الله هرد عليها قريب
بس مكنتش عاملة حساب البوست دا

الثلاثاء، 5 مايو، 2009

ستيتة اللى عادتنى , المبنى وقع خلاص

ستيتة اللى عدتنى


كح كح كح كح كح كح كح كح كح كح
كح اية دا انا مش بكح اصلا

اتشى اتشى اتشو تشى اتشو
ايوة كدا صح

وستيتة هى اللى عدتنى محدش غيرها فى ارض البلوج كان عند برد اليومين اللى فاتو دول
كدا برضو يا ستوتة
هاهاهاهاهاهاهاهاهاهاهاهاهاهاهاهاها

عايزة اعتذر عشان اتأخرت فى الرد على التعليقات فى بوست اللى فات وكمان فى احساس طفلة
بس ربنا يبعد عنكم الانفلونزا فى وسط الانفلوزانات الخطيرة اللى حولينا دى
وان شاء الله النهاردة هنزل بوست جديد هنا وهناك


نيجى للبوست اللى هنا

المبنى وقع خلاص




مرة كنت قاعدة انا و سمسم وبنتبادل المعلومات
وطبعا كالعادة انا بقول المعلومة وهو بيكملهالى ويدينى عليها معلومة هدية

فجة الكلام عن اليابانين وازاى اتعاملوا مع المواد الكيماوية واهتموا بصحة الشعب
لانهم اكتشفوا بعد الحرب العالمية واللى حصلهم فيها
ان عندهم تشوهات فى العظام وامراض غريبة ابتدت تظهر

وازاى المصانع واصحابها تعاونوا مع الحكومة
عشان فاهمين اضرار التصنيع والمواد الكيماوية

راح سمسم قالى ان فى الجامعة هنا فى معامل الكمياء فى زى خزانات
بتترمى فيها نتائج التجارب والمواد الكيماوية اللى مش هتستخدم تانى
وبعد ما الخزانات تتملى بيأخدوها على مكان قريب من الجامعة
بتعالج فية المواد دى

بعد كدا معرفش بيعملوا فيها اية بس المهم انها مش بتترمى فى الماية عادى ونرجع نشربها تانى

ايوة ما دا اللى بيحصل عندنا فى مصر فى ثانوى او فى الجامعة
اى مواد اضافية مش ليها استخدام بتترمى فى الحوض مع الماية

وطبعا عشان اعرف ضررها قد اية سمسم صدمنى
وقالى ان مرة مبنى الكمياء فى الكلية فى مصر من مكان الصرف وقع مستحملش

يعنى الحجارة مستحملتش اللى احنا بنشربة ليل ونهار
وابتدى يطلع على الشعب وانتشرت الامراض
اللى كانت من 5 او 10 سنين منعرفش عنها حاجة

يعنى هنخسر اية لما نستخدم حاجة تترمى فيها المواد الكيماوية دى
وبعدها تعالج او حتى تترمى فى اى مكان الصحراء عندنا واسعة
معرفش ممكن تضرنا وهى فى الصحراء ولا لا
بس نشوفلها اى مكان هنخسراية يعنى شوية وقت وتفكير
وفلوس اقل من اللى ادفعت فى فرح هيفاء وهبى
بس هنكسب كتير
هنكسب صحتنا وصحة اولادنا
هنكسب تعود على النظام والنظافة
هنكون بنقدر قيمة الانسان
واكيد دا هينعكس على تفكير الشعب


ملحوظة / طبعا كنت عايزة اجبلكم صور الخزانات

بس انا مش بروح الجامعة مع انها مفتوحة لاى حد
:)
وملهاش ابواب ولا حدود تحسها جزء من البلد
بس انا كمان معرفش مبنى معمل الكمياء فين
فان شاء الله يعنى متفقدوش الامل
لما سمسم يكون مش مشغول وعندة وقت هيصورها
وهبقى اضيفها ان شاء الله

تحديث / الصورة بتاعت الخزان جت بس شكلها كدا من على النت
مش مشكلة المهم ان الخزانات صورتها اهى
يعنى عادية مش اعجاز ولا مستحيل ولا حاجة