CLICK HERE FOR BLOGGER TEMPLATES AND MYSPACE LAYOUTS

الثلاثاء، 24 مارس، 2009

لا مؤخذة


لا مؤخذة يا جماعة الموضوع المرة دى غريب
وانا عن نفسى عايزة اكتبة عشان لما ارجع مصر
ويجيلى زهايمر ابقى اقراه ومنساش
مع التاريخ كمان عشان ابقى اعرف الاختراع دة وصل مصر امتى
وبعد قد اية من استخدامة وانتشارة هنا

هو يمكن يكون وصل فعلا خلال السنتين اللى انا قعدتهم هنا
مش عارفة ابقوا قولولى

طبعا عايزين تعرفوا بتكلم عن اية ؟
طيب شفتوا الصورة اللى فوق دى
ايوة عايزة اتكلم عن الحمام اللى فوق دا
واللى فى الصورة دى



دا اكثر من حمام وحل مشاكل كتير لناس كتير
يعنى مثلا الامهات فى الشتاء مش بتقدر تعلم ابنائها التحكم فى دخول الحمام
عشان الجو برد والماية باردة والحمام نفسة بارد

الحمام فية كل دا حتى كمان ممكن تسمع موسيقى وانت فى الحمام
هو مش ممكن هو انت فعلا بتسمع موسيقى وانت فى الحمام

الحمامات فى اليابان منتشرة فى كل مكان وبشكل اكبر من مصر بكتير
الحمام حجمة صغير بس رغم كدا مريح جدا

هو هنا فى فكل مول او محل او حتى فى الشارع
حمامات للسيدات ودا عادى وحمامات للرجالة ودا برضو عادى ومكان للتدخين ودا برضو احتمال يكون عادى
و حمام للاطفال فية زى سرير صغير كدا عشان الاطفال البيبيهات ودا كان اول مرة اشوفة كان هنا فى اليابان
وحمامات صغيرة عشان الاطفال بعد سن سنتين
وحمامات تانية للذوى الاحتياجات الخاصة ودا بقى برضو اول مرة اشوفة فى اليابان

مش عارفة اتكلم فى الموضوع ازاى
:)

بس خلينا نبداء
دا معناه ان كل اللى فات دا مقدمة
اعتبروها مقدمة وتعريف

المهم انا هتكلم عن حمام ذوى الاحتياجات الخاصة لانه جامع لكل الحاجات اللى عايزة اقولها والموجودة فى باقى الحمامات



الباب بيتفتح لوحدة بزرار كدا فى الجنب ومضاء بأخضر او احمر حسب اذا كان فى حد بيستعمل الحمام او لا
الحنفية بتشتغل لوحدها لما بتحط ايدك تحتها وتبطل لما تشيل ايدك
التواليت نفسة مش بارد
الماية دافية فى موسيقى شغالة بتدوس على زرايرعشان تعدل درجة حرارة الماية والتواليت
وزرار اصلا بتدوس علية عشان الماية تطلعلك

يعنى الحكاية كلها عبارة عن يد جنب الحمام
او لوحة معلقة على الحائط لو الحمام قريب من الحائك
فيها 4 زراير بتتظبط منهم كل الحاجات دى
واخيرا لما تقوم الحمام بينضف نفسة بنفسة بس برضو فى ورقم على الحائط
فيها رسومات تشرح لك ازاى انت تنظف قاعدة الحمام قبل ما تقعد
او بعد ما تخلص منعاً لتناقل الامراض

اللسان اللى فى الصورة دى بيطلع وبعد كدا بيدخل تانى لما حضرتك تقوم
ودا برضو منعاً لانتقال الامراض وساعات مش بيكون موجود اصلا


نسيت اقول ان حمام ذوى الاحتياجات الخاصة
دا مش معناه الناس اللى فاقدة حاسة من حواسها او عندها قصور بس
لا دا كمان للاطفال والحوامل وكبار السن
وفية زراير جوة لكل حاجة حتى فى لوحة مكتوبه بطريقة برايل
وفى زرار عشان لو حد حصلة حاجة يدوس علية
وتيجى ممرضة او عامل من المكان اللى فية الحمام
يساعدوة ودا للناس المريضة طبعا

طبعا فى حمامات عادية زى عندنا لوحدها كدا من غير حاجة
وفى حمامات احدث الغطاء بيترفع لوحدوا اول ما تقرب من الحمام مثلا
ولسة فى تطويرات اكتر وتجارب شغالة عشان يتم فصل الحمامات عن الصرف الصحى تمام
وتكون فى اجهزة تعيد تنظيف مياة المرحاض تانى وتصلح تانى للاستخدام فى الحمام



بس خلاص خلصت وعايزة اعرف رأيكم فى الموضوع
ومرة تانية لا مؤخذة يا جماعة بس بجد الموضوع ظاهرة تستحق التفكير فيها
نظرا للحلول اللى لقاها الحمام لكبار السن والحوامل وذوى الاحتياجات الخاصة والاطفال


الاثنين، 16 مارس، 2009

احنا احسن طبعا حد يقدر يعترض




هحكيلكم الفرق بين حاجة بسيطة جدا
وهى المرور بينا وبين بلد زى اليابان
طبعا احنا و كالعادة افضل من غيرنا بكتير

يعنى تلاقى عندنا فى مصر الشوارع نظيفة
وكل 5 متر فى صندوق قمامة
ومش صندوق واحد عشان الامانة
دول 4 واحد للورق وواحد للبلاستكات
وواحد للصفائح والكانز والكلام دا وواحد للزجاج

والمرور منظم جدا
والاشارات شغالة لوحدها
ومفيش عسكرى مرورى واقف بيعديك والاشارة حمراء
والناس بتستخدم الاشارات يمين وشمال
ومحدش بيكسر على حد ولا حاجة

وتلاقى الناس بتحترم قواعد المرور
وكلة لابس الحزام
ومحدش بيتكلم فى الموبيل
ولو حد كسر الاشارة او عمل خطاء بسيط بيتعاقب وبيدفع غرامة كبيرة
وكمان الرخصة بتاعتة بيتخصم منها نقط يعنى الرخصة 7 بوينت
يتخصم منها نقطة او اتنين او 3 حسب حجم المخالفة
لغاية لما نقط الرخصة تخلص فحضرتك تروح تطلع رخصة تانية
ودا طبعا صعب جدا عندنا يعنى ممكن تحاول مرة واتنين وتلاتة واربعة عشان تأخد الرخصة
ودا برضو طبعا عشان احنا بنحافظ على اروح البشر والناس قيمتها غالية جدا
ومينفعش تموت فى حوادث مرور اللى هى مش بتحصل كتير عندنا

تلاقى الموصلات نظيفة والسائقين محترمين جدا
وكل واحد لابس الزى الرسمى لشغلة
واول ما تركب يشغلك العداد
او فى ثمن واحد ثابت للتذكرة
وتقعد وانت عارف المواصلة هتقف فى كام محطة وانت محطتك رقم كام
وعارف انك هتدفع الفلوس فى ماكينة صغيرة جنب السائق وانت نازل

وكمان لما تيجى تمون العربية تلاقى محطة البنزين نظيفة وفى عامل او اتنين بالكتير شغالين فيها
بيعملوا كل حاجة من التموين لكل العربيات اللى واقفة لغاية لما بيحسبوك على الكونتر
او لما يدخلوا عربيتك ماكينة الغسل او تنظيف المحطة والمحافظة على تنفيذ القواعد
يعنى محدش بيستخدم موبيل ولا بيولع سيجارة جوة البنزينة
وكمان قدامك اختيار لو حبيت تمون لنفسك فى تلكفة وقدرها 2 ين مثلا بتتشال من كل لتر
اقصد 2 قرش :) ين اية بس حد قال ين خالص


فى لكل محل او عمارة او بيت باركينج للعربيات وللعجل كمان
ومحدش بيركن فى الشارع خالص ودى تعتبر مخالفة
اللى بيركن فى الشارع لازم يكون لوقت قصير ويكون فى حد فى العربية
ومشغل الانتظار

الناس بقى اللى بتسوق عربيات بتحترم الناس اللى بتعدى الشارع
والناس اللى بتعدى دى بتعدى بس فى اشارات المشاة وبس
ومحدش بيعدى من نص الشارع
ولا حد يقول لحد اى كلمة مش كويسة
وتلاقى فى خطوط صفراء اللون فى الارض
وبارزة وموجودة على كل رصيف عشان الناس اللى فاقدة البصر تمشى عليها
موع وجود صفارة مميزة لما الاشارة تقفل او تفتح عشان يقدرو يعدو الشارع

تلاقى الناس محترمة ومش بتقول اى كلام يضر بسمع غيرهم
ومفيش كلكسات طبعا لانها بتعمل دوشة
وبعدين احنا مش محتاجينها لان كل واحد ماشى فى الحارة بتاعتة
وعلى السرعة اللى مكتوبة على الارض

محدش يقولى فين السرعات دى
يعنى انتوا عديتوا كل الكلام اللى فات دا وجين تمسكوا فى دى
عدوها زى ما بنعدى حاجات كتير

ملحوظة / فى صور بعدستى
وفى صور من النت
بس بتنظبق على اللى عايزة اقولة بالضبط

الخميس، 12 مارس، 2009

لية منعملش زيهم

لية منعملش زيهم



النهاردة غظونى اوى
لا مش النهاردة دا على طول
هو انا مش بتغاظ منهم عشان هم مسيحيين
ولا عشان هم بيدعو لدينهم لا ابدا انا بحترم دا جدا
انا بتغاظ من كترهم ومن انهم على طول بيجولنا تقريبا كل اسبوع مرة
وعلشان اسلوبهم واحد

هقولكم من الاول وانتوا احكموا

انا قاعدة فى البيت وفى حالى والاقى جرس الباب بيرن وحد بيتكلم كلام كتير باليابانى برة

انا ارد بالكلمة الوحيدة اللى عارفاة باليابانى بتتقال فى الوقت دا

وهى هااااااااى
يعنى نعم بالعربى

هتستغبروا لما تعرفوا ان اييييييييياه بكسر الالف الاولنية يعنى لا
:)

نرجع للموضوع عشان كدا هندخل فى درس عن اللغة اليابانية وانا معرفش غير الكلمتين دول
والبس طرحة وروح افتح الباب الاقى 2
بيبشروا للمسيحية

يبتدو يتكلموا ويقولوا
كونيتى وا
ودى تحية بعد الظهر
اقول بنفاذ صبر لانى خلاص عرفت من شكلهم هم مين
كونيتى وا

يقوم واحد منهم يقولى
بتتكلمى انجليزى

اقولوا
yes

يقولى
طيب اية هى لغتك او جنسيتك

اقولوا
لغتى العربى وجنسيتى مصرية

يقوم مطلع مجلة صغيرة مكتوب فيها بالعربى
هل تريد ان يحل السلام فى العالم ؟
هل تريد ان تعرف ماذا سيحدث بعد الموت ؟
ماذا تعرف عن الخالق ؟

واسئلة من النوع دا بقى
اقولهم انا عارفة اجابة الاسئلة دى
يذبهلوا وكأنهم مش مصدقينى
وكأن محدش يعرفها غيرهم

يتجهلوا اللى انا قلتوا
ويطلعولى مجلة من اللى معاهم دى بس بالعربى ويدوهانى
يكون فيها الاجابة على الاسئلة اياها

ومعاها بقى اسئلة تانية اذا كنت عايز تعرف اكتر فى الدين
واذا كنت عايز تعلن انضمامك للمسيحية

انا بأخد المجلة واقولهم انا مقتنعة بالدين بتاعى
وشكرا

بقفل وانا قمة فى الغيظ
من اسلوبهم
بتغاظ من نفس الكلام اللى بيتكرر كل مرة بيجوا فيها
بتغاظ من اصرارهم دول بقالهم سنتين ونص بيجولنا كل شهر 3 مرات تقريبا
وكل مرة اتنين غير بعض
وكل مرة بقولهم نفس الكلام

بتغاظ من اننا مش بنعمل زيهم
بتغاظ من انهم بينقوا الاجانب ويرحولهم
بتغاظ من اتقانهم لشغلهم وان عندهم مجلات بلغات مختلفة

لدرجة ان النهاردة زوجى هو اللى فتح الباب ورد عليهم
وبعد ما مشيوا

زوجى قال احنا نكتب على الباب
ان الجماعة دول مش مرحب بيهم
وشوية اقولوا لا احنا نقول
الجماعة دول مش مرحب بيهم عشان احنا مقتنعين بديننا
يقوم زوجى يقول لا احنا نكهرب الجرس

بجد بقى
الجماعة دول بيعملوا شغلهم بجد
وبيدعو لدينهم بأتقان رهيب

مع ان احنا اللى مفروض نعمل كدا

الناس دول على قد ما غاظونى
على قد ما خلونى افكر
لية منعملش زيهم
لية منفهمش دينا كويس وندعو الناس لية
وتكون مهنة لينا يتبناها رجل اعمال من اللى بيشتروا عربيات من الذهب
وبيبنوا بيوت 40 اوضة
اهو يشغل الشباب خريجى الجامعات فى حاجة مفيدة
ويأخد هو وهم اجر عظيم
لية منطلعش مجلات بكل اللغات
ونعرف الناس كلها دينا بيدعو لاية
نعرفهم معنى التسامح
نعرفهم قيمة إلمرأة
وحقها اللى ايدهولها ربنا
نعرفهم معنى السلام
نعرفهم الراحة النفسية والرضا والنظام
نعلمهم الاخلاق السليمة

نعرفهم ان للكون خالق
واحد احد

ديننا بسم الله مشاء الله
معروف للعالم كلوا انة دين تسامح وسلام
وواخدين عنوا فكرة جميلة اوى
:(
حتى المسلمين نفسهم عارفين دينهم كويس جدا
والعالم العربى عالم منظم وراقى ومبدع وفى علماء كتير
ودولنا نظيفة والناس بتبتسم فى وشوش بعض والدول العربية بتحترم بعض
وكل مسلم محافظ على عباداته
:(

بجد الموضوع كبير جدا جدا
ويتقال فية كلام كتير
وعايزة اسمع رأيكم


الأحد، 8 مارس، 2009

عيادة دكتور الأسنان



دكتور الأسنان صعب جدا صح

اه وانا كمان مش بحبهم

مؤلمة جدا طبعا محدش يقدر يقول غير كدا

طلعت اجهزة جديدة او مطلعتش

برضو الاسنان هى الاسنان والألم بتاعها هو الألم بتاعها

دا كان رأى قبل ما اروح عيادة دكتور أسنان من كام يوم

العيادة هى اللى فى الصورة اللى فوق دى

ودا بس المكان اللى فى موظفة الاستقبال واللى بيقعد فية المرضى

وخلينا نقول من البداية

ان العيادة دى طبعا فى اليابان

مش فى بلدنا خالص بتاتا البتة

استحالة طبعا تلاقى حاجة كدا عندنا

ولو فى مش هتكون بالشكل الكامل المتكامل المثالى دا

مش عشان العيادة شيك جدا جدا وجميلة جدا جدا

ولا لانها اشبة بقصر صغي
ر

خلتنى احب ان اسنانى توجعنى عشان اروح هناك

لالالالا مش للدرجادى


بس عشان التعامل هناك مختلف عن بلدنا من احترام المواعيد

لعدم وجود ممرض ملوش علاقة بالتمريض

بيدخلك الاول لو كان يعرفك او ليك مصلحة معاك

ولا لان فى اهتمام براحتك و
احترام لأدميتك

ودى مفيش اى مقارنة بينها وبين بلدنا اصلا

اولا وانت داخل كدا تلاقى زى مكتبة صغيرة


هى بيتحط فيها الجزم

بس مش جزامة لالالا هى مكتبة

مش عشان هى حلوة اوى


لا عشان حوليها فى براويز وفوقها فى تحف

هناك بقى بتغير الجزمة بتاعتك بشبشب

عشان متبهدلش الارض بالجزمة بتاعتك


تطلع تلاقى انترية شيك جدا وفى فازات ورود وصور وتحف

مكتبة فيها مجلات مترتبة كويس

والاضائة هايلة


طبعا تكون متصل بالتليفون وتأخد ميعاد


وتروح على معادك وبالدقيقة والثانية

تلاقى الممرضة بتنادى على اسمك

طبعا ساعتها تكون اصلا نسيت انت جى هنا لية

تدخل تلاقى الكرسى بتاعك وقداموا بلكونة

او شباك صغير كدا بيطل على زرع

وفوقوا فى برواز عبارة عن نصيحة


وتبتدى ساعتها تعرف انت هنا لية


الاطفال بقى ليهم معاملة تانية خالص

لان ليهم مكان رائع يلعبوا فية قبل ما يدخلوا للدكتور


المكان تحفة من الديكور بتاع المكان او اللعب اللى فية او الستاير

كل حاجة جميلة حتى النتيجة والساعة عليهم شخصيات ديزنى الكارتونية

وبعد ما يدخلوا للدكتور

بيكون فى ممرضة معاها لعب وتقعد تلاعبهم

دا طبعا خوفا من ان الطفل يتألم

خلع الاسنان هو هو والاجهزة هى هى الادوات هى هى

بس الجو المحيط هايل جدا يخليك تنسى الم أسنانك

طبعا لسة الم الاسنان لا يحتمل وربنا يبعدو عنا

وكفاية زيارة صغيرة كل فترة للمتابعة وبس



الأربعاء، 4 مارس، 2009

الاهلى فى اليابان رجع المرة دى خسران


السلام عليكــم ورحمـة الله وبركاتــة ،،



البوست دا انا كتبتوا من كام شهر كدا لما الاهلى كان هنا

ولما عملت المدونة لقيت انه انسب موضوع ممكن ابتدى بية

والبوست دا اهداء خاص لعاشقة وغلبانة ولكل الاهلوية على النت

انا مش زمالكوية ولا اسمعلاوية خالص على فكرة

هاهاهاهاهاهاهاهاهاهاهاهاهاهاهاهاها

انا بس بشجع مصر فى كأس الامم الافريقيا

ما هو بصراحة يا جماعة

ظاهرة اللون الاحمر انتشرت جدا بدرجة مبالغ فيها وبقت حاجة تغيظ

نيجى للموضوع بقى

معرفش لية كان سهل الاقى عنوان لبوست

رغم انى مكنتش لقية عبارة تشجيعية اشجع بيها الاهلى لما رحنا الماتش بتاعوا

اصل بما اننا فى اليابان ودا ماتش الاهلى وصعب ان يكون فى ماتش قريب مننا ومنروحش

فقررنا اننا نروح اول ماتش للاهلى امام فريق مكسيكى اسمو بتشوكا

014.gif

احنا مش اهلويا صحيح بس الشعور بأن مصريين برة بلدنا

مفروض نشجع اى فريق جى من مصر مش لازم الفريق بتاعنا اللى بنشجعوا

حتى لو كان الفريق اللى جى دا الاهلى

الانتماء للوطن بقى

27.gif

المهم ابتدينا ندور على عبارات تشجعية

لان بما اننا اصلا مش اهلوية مكناش نعرف اى حاجة عنها

وابتديت اسمع المفتش كرومبو على نجوم اف ام

لا قطن ولا كتان الاهلى فى اليابان

36_1_13.gif

وحاولت اخترع اى عبارة تشجعية بس معرفتش

وفى الاخر استقريت على اهلى اهلى او او

وحفظتها لسومة بنتى وجبتلها كاب احمر

36_2_3.jpg

كفاية عليها عشان متبقاش اهلوية لما تكبر

36_1_30.gif


وجة يوم الماتش

واول ما دخلنا المنطقة اللى قبل بوابات الاستاد لقينا عدد لا بأس بة من المصريين

وطول ما الواحد ماشى عمال يشوف اعلام مصر والاهلى

وعمال يسمع اصوات بتتكلم عربى وكلمة السلام عليكم بتترد حولينا

دا فى حد ذاتوا كان اجمل من الماتش والتشجيع وكل الكلام دا

ابتدى الماتش وكنا عمالين بقى نشجع والاهلى جاب هدفين

ابو تريكة جاب الهدف الاول وفلافيو جاب الهدف التانى

واصوات المصريين ابتديت تعلى ابو تريكة ابو تريكة واهلى اهلى

051.gif



وكان المشجعين بتوع بتشوكا ورانا بيشجعوا برضو معرفش لية

مع انهم مهزومين

بس فهمنا فى الشوط التانى لما جابو جونين واتعدلوا مع الاهلى

ولعبوا شوطين اضافيين وفازو وطبعا الكل عارف النتيجة

خلاص بقى فقدنا الامل فى فوز الاهلى

فأنقصمنا نصفين نص بيشجع باتشوكا مع المشجعين اللى كانوا ورانا

ونص بيشجع باقى الفرق اللى فى مصر كلها الزمالك والمصرى والاسماعيلى وكل الفرق اللى نعرفها

هاهاهاهاهاهاهاهاهاهاهاهاهاهاها

mht61C(1).gif

معرفش لية بس اصلا متنسوش احنا مش اهلوية ومعندناش انتماء

هاهاهاهاهاهاهاهاهاهاهاهاها

طبعا الاهلوية هيجروا ورانا ويقولوا انتو السبب

36_1_28.gif

بس لا خالص دا حتى الاهلوية نفسهم اللى كانوا قليلين بس قالبين الاستاد وصوتهم عالى سكتوا

الماتش كان ظريف رغم خسارة الاهلى

دا حتى كان فى يابانين كانوا بيشجعو الاهلى

ورسمين على وشهم ومعاهم اعلام كبيرة

وكمان قبلنا ناس مصريين من كل اليابان

و ناس جين من مصر مخصوص عشان يشجعوا الاهلى

معرفتش اية يعنى اللى يخليهم يستحملوا 12 ساعة طيارين جاى

و 15 فى الرجوع لمصر واكل حرام واكل حلال وكل الكلام دا

عشان يحضروا 3 مباريات للاهلى ما يشوفوهم فى التلفيزيون وخلاص

هو صحيح كان الساعة 7 الصبح بتوقيت مصر بس برضو ارحم من عذاب السفر عشان اسبوع ولا اثين مع الاهلى

طبعا مكررنهاش تانى هو ماتش واحد بتاع باتشوكا دا

والباقى فى الكمبيوتر



ملحوظة على جنب / محدش من الاهلوية يزعل انا حاولت بس اكتب الموضوع بشكل ظريف

الثلاثاء، 3 مارس، 2009

يوميات مش فارقة

السلام عليكم ورحمة الله وبركاتة

يوميات مش فارقة


مش فارقة عشان الغربة مفيش حاجة فيها بتفرق

يعنى خلاص مادام اتغربت يبقى تستحمل بقى

هتعيش فى دنيا تانية غير اللى انت متعود عليها

هتعيشها بسلبياتها وايجابياتها وسلطتها وبابا غنوجها

سواء بتحب السلطة او لا

يعنى بالظبط زى ما الواحد يروح يشترى بطيخة

يا تطلع حلوة ويأكلها يا تطلع وحشة وبرضو هيأكلها

وفى الحلتين هو خلاص دفع تمنها

ومن موقعى هذا وحيث انى مغتربة

وبشوف حاجات كتير هنا بتختلف عن بلدنا

قررت انى اكتب المواقف اللى بتقابلنى

وبما ان دا اول بوست

يبقى سمعنى اغنية شرين مشربتش من نيلها

video