CLICK HERE FOR BLOGGER TEMPLATES AND MYSPACE LAYOUTS

الاثنين، 21 مارس 2011

الميكرويف لف وكان هيقع عليا بس لحقته :)


يوم عادى ممل جدا بلف فى الفيس بوك وتويتر ومستنية صلاة الجمعة فى مصر
عشان اشوف هيحصل اية على امل وتفكير كالعادة
سوما فى المدرسة سمسم فى الشغل وخلاص على وصول اهم
وانا قمت اتوضاء عشان العصر واجهز الاكل
اها لازم بالتفصيل الممل اليوم دا لازم يبقى فى الذاكره

الاكل متولع علية النار الشفاط شغال انا بتوضاء جمبهم اهو
واذ فجأتن الاقى صوت الازاز بيخبط فى بعض والمياة والغاز والشفاط وقفوا
جريت على الموبيل وقولت لسمسم الحق زلزال ضخم قالى اها انا وسوما فى العربية وجاين
وقفلت وانا مرعوبة ولسة بحط الموبيل وهتحرك واذ فجأتن برضو ولا كان اللى فات دا كان زلزال
جة بقى زلزال على حق فتح الدوليب ونزل اللى فيها ووقع كل الازايز
زيت وماية وكل الكوبيات والاطباق والاكل اللى كان على النار وكل حاجة
وانا اتسمرت فى مكانى تحت التلاجة اللى فوقها الميكرويف واذا بى فجأتن برضو
الاقى الميكرويف بيلف وهيقع عليا سندتة بأيدى وانا عينى بتلف تشوف البيت
واللى بيحصل ومش مستوعبة وودنى بتسمع اصوات التكسير
مفكرتش انزل زى منا سامعة الناس بتجرى فى الشارع وعلى السلم
الزلزال هدى شوية لمدة دقيقة رنيت تانى على سمسم ملقتش شبكة (دا مبيحصلش كتير هناك )
وهوب صحى تانى الزلزال بس كونت سبت الميكرويف وقعدت رجلى مكنتش شيلانى من الرعب والقلق
بس سوما وسمسم جم وسوما قعدت تحت التربيزة اللى كانت اتحركت بكرسيها
ومفيش ثوانى وجة زلزال تانى قوى رحنا اخدنا بعضنا ونزلنا الشارع قعدنا نلف شوية
وبين كل خطوة وخطوة نلاقى زلزال ورغم اننا ماشين الا اننا حسينا بيه
وفجأتن برضو السما غيمت واليابانين كل واحد قدام بيته واقف بشنطة الخطر ورديوا
هم عارفين ان فى زلزال هيحصل خلال ال 10 سنين الحالين ابتداء من 2006 وجاهزين
ولو كانت اقتصرت على زلزال كانت هتخلص بسرعة يمكن توابع يوم ولا اتنين
وخساير مصنع وكام عربية ويمكن ناس كبيرة تتوفى بسبب حاجات ضخمة تكون وقعت عليهم حصلت قبل كدا
بس الكارثة الحالية تكمن فى التسونامى هو دا اللى مكنوش عارفينه
وهم شعب روتينى بيتخض بسرعة لو حصلتله مفاجئة ومكنش عامل حسابة
دا لو احنا فى محل والبائعة كلمتنا كلمة وقولنلها مش فاهمين
بتحتاس وتتخض فما بلكم بتسونامى بقى وحرايق ماتو من الرعب والخضة اكتر ما ماتو من الزلزال

المهم رجعت البيت اتطمنت بالناس على الفيس بوك وطمنت ماما واتطمنت منها
وهوب عاشر حصل زلزال رحت نزلت تحت التربيزة لحد مخلصت الفيس بوك والناس والاطمئنانات
ونزلنا تانى بس الجو كان برد فأخدنا العربية ولفينا شوية واحنا هنموت من القلق على باقى العرب اللى هنا
ومفيش شبكة نتكلم ونسأل بس لقينا الاشارات بعضها واقف والنور قاطع فقولنا نرجع احسن
فى حد مصري قريب مننا اسهل حد نتطمن عليه وقد كان وبرضو لقيت هناك مفاجئة بس حلوة المرة دى
لقيت عائلة سوريا وعائلة سودانية وعائلة فلسطينية هناك عندهم اتطمنا على بعض وكل واحد روح بيته
واحنا لسة مرعوبين واليابانين بيطمنونا اكتر وكل الاخبار بتقول فى كارثة تانى فى الطريق كل واحد يعمل احتياطاتة

واخيرا فى اليوم دا انا قعدت افكر و انا بحمد ربنا ان بلادنا امنة ومفيهاش الرعب دا
تلحق كوباية ولا تلاجة من انها تقع عليك وانك تلحق تسندها فى ثوانى مرعبة
من عجز التفكير وفقر اللسان وجحوظ العين فى اذبهلال وانك تنقذ حياتك فى ثانية
ساعات مش بنقدر نتحكم فيها لا اله الا الله قادر على كل شئ ولنا حديث اخر وتكمله لاسبوع الدمار اللى عشناه دا
عودة مزلزلة بس ضرورية

شكر لكل الناس الل سألت عليا
ام احلى بنات
ايوشا
كل الطيبة
صبصب
ليدى اللى مش عايزة تكبر
سارة
عادل
سالى
ليس فقيرا من يحب
محمد غالية
محاسن صابر
محمد عرفة
موناليزا
نور
دعاء عويضة
نورهاتى
فتافيت

Mohamed mak
حروف
مورا موى
استاذ عمرو
لو حولت انقل الاسامى من الفيس بوك مش هعرف لان فى ناس معرفهاش اصلا سألت بجد كانوا صبرى فى الاسبوع دا ومعرفش من غير سؤالهم كنت هعمل اية كل حد سأل وكل حد جيت على بالة ومعرفش ولا لحق يسأل كل حد دعالى الف الف الف شكر متحرمش من اجمل صحبة رغم فقر علاقاتى بيهم الا ان تأثيرهم مهم جدا فى حياتى الف شكر ربنا ميحرمنيش منكم يا ورود بلوجر كله

ونكمل البوست اللى جى ان شاء الله

13 التعليقات:

Momo يقول...

منتظرة الجزء التانى

ربنا يحفظكم من لحظات الرعب دي ومش تعيشوها تانى يارب

حمداالله على سلامتكم

gogo!sf يقول...

يا حبيبتى الحمد لله انك بألف خير
وربنا يقويكى على كم الرعب اللى شوفيه ده انا كنت هموت اصلا وانتى بتحكى وعينى دمعت وحاجات كده

ربنا يرجع لاهلك ولناسك على خير بأذن الله
جوجو

ستيتة يقول...

والله يا نونو زلزال اليابان المرة دي آية بكل معنى الكلمة
آية من آيات قدرة الله
وآية في سرعة الناس دي في التفاعل انقذ ناس برضه

بعد الشر يعني تخيلي شيء بالقوة دي في مصر
يخلي مصر على القواعد بمعنى الكلمة

بعد زلزال اليابان بقيت اقول
اللي ياربي ما عمرهم أهلونا لكارثة طبيعية
طب نعمل ايه
الآمان نوصل له ازاي وامر الله نافذ نافذ

بلدنا تقريبا خايفة تكلمنا عن الكوارث الطبيعية من باب ياراجل تف من بؤك

حمد لله على سلامتكم ولا آرانا الله فيكم مكروه ابدا

سوبيا يقول...

حمد الله عالسلامة يا جميلة
ربنا يحفظك ديما انتي وكل اللي بتحبيهم

غير معرف يقول...

ام سومة الحبيبة
ربنا يحميكم يابنتى من الكوارث
والله جيتى فى بالى على طول اول ماسمعت الخبر
ودعيت كثير ان ربما يحميكم انتوا واللى زيكم
تحياتى وخدى بالكم من نفسكم

مامة مازن يقول...

الحمد لله ان اطمئنينا عليكى وعلى اسرتك الصغيرة ربنا يطمنا عليكوا يارب
ربنا معاكواويعديها على خير

حسام غانم يقول...

حمد الله عالسلامة يا ستي

معلش جت متأخرة

Unknown يقول...

الف حمدلله على
سلامتكم كلكم ربنا
يكتبلكم السلامة يارب
أنتم وكل الناس.مسنظرينك
ياطفلة فى الجزء التانى
وبلاش كسل:)

شوكولاتة يقول...

وحشتيني جدا جدا واعذريني اني مش بسأل عليكي من زمان بس مكنتش لاقية لينك المدونة خالص يارب تكونوا كلكم كويسين وتكون دي اخر لحظة صعبة في حياتك

تحياتي

Emtiaz Zourob يقول...

ألف الحمدلله على السلامة ..

هذه اول زيارة لي للمدونة وان شاء الله من المتابعين لكل جديد ، في انتظار البوست القادم ان شاء الله ..

دمت بخير انت وأحبائك .

لا تسألونى من أنا يقول...

ربنا يحميكم ويطمنا عليكم ويسترها على كل المصريين ويرجعكم بلادكم بالف خير

قلب ارهقته الاحلام يقول...

الحمد لله انكم بخير ربنا يحفظم ويرجعكم سالمين ان شاء الله
وحشتينيييي جدااااااا انا عارفه ان انا ال كنت مختفيه :)

بس بجد وحشتيني وكلكم وحشتوني

يارب تكوني بخير

Tamer Nabil Moussa يقول...

حمد الله على سلامتك انت والاسرة

مع خالص تحياتى