CLICK HERE FOR BLOGGER TEMPLATES AND MYSPACE LAYOUTS

الثلاثاء، 5 يناير 2010

ستيتة ملكة التدوين , بشمهندش احمد , سفارى


كل سنة وانتم طيبين
2010
سنة جديدة سعيدة عليكم
بالنسبة ليا فيها تحديد مصائر كتير
يارب تكون خير علينا وعليكم
و
تتحقق فيها كل احلامنا و احلامكم

ستيتة


البوست دا كتباه من اسبوع كدا
بس النهاردة ورغم الاجازة الطويلة اللى ادتها لنفسى ومش عارفة اغيرها
لازم ينزل عشان عرفت اية يا شباب
عرفت ان عيد ميلاد دكتورة ستيتة بكره
يعنى عيد ميلاد ملكة التدوين
دكتورينا وحكيمتنا
نصائح من الماظ
رومانسية من الخيال
فكر تانى لاى موضوع مثير للجدل على الساحة
بتدخلك فى دهليز الحدث وتوريك اللى مش شايفة
حد يدخل قلبك على طول من اول تعليق واول بوست تقراهلها
وتبقى مبسوط انك عرفتة وقريتله
حتى لو اختلفت معاه فى الرأى
خالة البعض , ودكتورة البعض , وصديقة البعض
مش هتردد انى اقول عليها سند البعض
فى عالم كنت فكراه افتراضى
لقيتة حقيقة ومن اكبر الحقائق فية بالنسبالى ستيتة
ربنا يسعدك يا ستيتة ويفرح قلبك
وتحققى كل احلامك
وتكونى انتى واسرتك فى احسن حال

بشمهندس احمد

مرة وحد لقيت كل المدونين بينادوا وبيقولوا
البشمهندس احمد اختفى يا رجالة
قلت يمكن غلطوا فى العنوان ولا كان قافل المدونة شوية للتجديدات وفتحها تانى
وبكل ثقة بضغط على اسم مدونتة القيها مقفولة ان ان ااااا
طب لية مشى فى صمت مش يمكن كنا نقدر نقنعة بالبقاء
زى ما عمل مع معظم اللى حصلهم مشاكل فى عالم التدوين وقرروا ينسحبوا
انا بضم صوتى لصوت باقى المدونين يمكن الصوت يعلى وبشمهندس احمد يسمعوا
التدوين دا حريتنا ممكن نأخد منه اجازة بس منسبوش ونهد كيان بنيناه بأفكارنا ونرحل

سافارى

من فترة كدا نزلنا رحنا سافارى
الاطفال طبعا كانوا هيتجننو وبيناموا ويصحوا
يحلموا ان فى الويك اند هيروحوا عند الحيوانات

صحينا بدرى كالعادة
بس انا لحقت نمت لى شوية
مش زى باقى الرحلات كنت اتعلمت بقى

الجديد اننا اجرنا عربية كبيرة تحفة بجد كنا 3 اسر
بس عشنا فيها ولا كأنها شقة استديو صغيرة
حتى انه كان متاح اننا نصلى فيها واحنا واقفين
والاطفال قعدوا فى ارض العربية ونامو كمان وهم بيتفرجوا على الكارتون
المشوار كان طويل على الطريق السريع كالعادة بس محسناش بية
صحيح الصحبة بتفرق جدا

الطريق كان ممتع جدا لان البلد اللى كنا ريحنها فى حضن الجبل وكل شوية الجبل بيقرب
وطبعا انا مقضياه تصوير وكل الصور مطلعتش حلوة عشان من ازاز العربية
بس بعد كدا صورناها من ساقية كبيرة تصيب اللى يركبها بالدوخة والرعب واللى بيصور بفقدان التوازن
وطبيعى الصور دى مش تصويرى لانى كنت مرعوبة فوق
دا تصوير سمسم

نرجع للطريق تانى لا كنا وصلنا خلاص
وحجزنا الباص اللى هيدخل عند الحيونات واللى منه هنقدر نأكل الاسد
واحنا كاكبار اصلا كنا رايحين نأكل الاسد :)

بس اول ما ركبنا الراجل سواق الباص ادانا اكل الحمار الوحشى وكدا مدناش لحمة نأكل الاسد
وكنا عاملين نتسأل هو فية اية بس متسألناش كتير عشان ابتدينا نستمتع بالطريق
الحيونات منطلقة واحنا محبوسين مفيش غير شباك صغير وحولية شبك دا اللى نقدر نأكل منة الحيونات
ابتدة الطريق بالحمار الوحشى والزرافة اللى كانو حطينلها اكل فوق الباص عشان تقرب ونشوفها واحنا اكلنا الحمار الوحشى طبعا او بالاخص سومة شفتوا الاطفال اخدين كل المميزات

انطلقنا بعد كدا بقى وخلينا نروح للصور
مش هقعد اقول اسماء حيونات وخلاص
الصور اسهل


بعد كدا نزلنا من الباص فى منطقة فيها
حيونات صغيرة زى الغزال واللامة والسناجب
برضو اسيبكم مع الصور


وفى وسطهم وبدون مقدمات
لقينا النمر والاسد فوق رأسنا على طول يفصلنا عنهم ازاز شفاف

طبعا حطينا ايدنا فى ايد الاسود واتصورنا
وكمان لقيناهم حوالينا بس محبوسين وجبنا اكل واكلناهم


على اساس ان خلاص هنركب الباص ونرجع
بس دا محصلش لان الباص اخدنا لمكان تحفة بجد الاسد كان منطلق بدون حواجز

منظر استحالة يتنسى وكمان وهو قاعد تحت الشجر
وحوالية اللبوئات ولا وهو بيتمشى وسط الباصات
وكانوا حاطين لنا لحوم والمقص الكبير اللى بناكلهم بية قدام الكراسى
فأكلناهم وبجد على قد المتعة على قد الخوف رغم كل الحواجز
تحس قد اية الانسان ضعيف وبيخاف من لا شئ هو صنعة لنفسة
الاسد مفروض مش جعان والعربية متقفلة كويس علينا ورغم كدا كنت خايفة

عدى الاسد وقلنا خلاص بقى هنطلع
لقينا الباص رجع بينا تانى من نفس ذات كل الطريق
بس المرة دى غير باقى كل الحيونات اللى شفناها قبل كدا كان فى الفيل بيرقص
اه بجد عمال يحرك رجلية والزلومة وحقيقى بيرقص
حتى سواق الباص اللى بيقول معلومات قال الفيل بيرقص تانجو :)

بس وطلعنا ورحنا الملاهى اللى فى نفس المكان تقريبا الاطفال لعبو شوية
واحنا صورنا من الساقية المناظر الطبيعية اللى فوق شوية دى
وكان فى برضو حيوانات بسيطة زى الخنزير والحصان


ومنها البارك كان بيقفل الساعة بقت 4 العصر
وكان مفروض نبتدى رحلة العودة ودا اللى حصل
وكالعادة فى نهاية اى بوست
هقولكم كان يوم ممتع
مش بس للاطفال ولينا كمان
اتمنى انه يتكرر
واتمنى اكون نقلته ليكم بصورة كويسة
وتكونوا استمتعتم بيه

28 التعليقات:

adel يقول...

كل سنة و انتي طيبة

بحب جدا ااقرا بوستاتك بحس اني اللي عملت الرحلات مش انتي :):)

الصور جامدة جدا :):)
نفسي اعمل سفاري زي ده بس اكيد هترعب لو شفت الاسد ده :):):)

احساس طفلة محبة للرومانسية بس واقعية يقول...

وانت طيب يا عادل

ببقى سعيد ان البوستات بتعجبكم
وببقى بصور صور مخصوص للمدونة
عشان اقدر انقلكم الرحلة كلها

عايزة اقولك الاسد بجد رغم قدر الاستمتاع برؤيتة معرفش لية دون عن باقى الحيوانات بس فعلا شكله مهيب وخاصة وهو برة اى اقفاص وعايش حياتة

دمت بكل خير
يارب السنة الجديدة تكون سعيدة عليك

يوميات شاب منوفى يقول...

كل سنة وحضرتط طيبة الصور جامدة اخر تلات حجات الصبيعة فى اليابان شكلها جميلة اوى ويارب ترجعى بلدك بالف خير

احساس طفلة محبة للرومانسية بس واقعية يقول...

شاب منوفى

اليابان بجد جميلة جدا وطبعا الصور دى حاجات بسيطة من اللى الواحد ممكن يشوفة ويقول سبحان الله لما يتفق جمال الطبيعة مع النظام مع النظافة والتطوير والابداع الوقت بيكون ممتع

شكرا ليك نورتنى
وان شاء الله فى القريب العاجل
على مصر التى فى خاطرى وفى دمى :)

خواطر شابة يقول...

عود احمد وحشتنا تدويناتك
كل سنة وانت وكل اسرتك بخير
شكرا على الصور الجميلة حسستينا اننا كنا معك
تمنياتي لك بسنة سعيدة تحققين فيها كل ما تتمنين ان شاء الله

بـــــسمة انـــــــــور يقول...

وحشتينا كتيييييييير

ربنا يسعد يامك دايما يا قمرة

القدر و انا يقول...

يا اجمل عاشقة رومانسية وواقعية
بجد شكرا لك
اخرجتينا من المود السيئ ونقلتينا معاك فى رحلتك الممتعة الى اليابان
شكرا على كرمك الكبير وفسحتك لينا معاك
اد ايه فرقت معايا واسعدتنى
ربنا يبارك لك فى سومة ويسعدكم دايما

mimi يقول...

http://a7walnaaa.blogspot.com/2010/01/blog-post.html

زورينا هنااااااا

كل سنة وأنتي طيبة

والرحلة تحفةةةةةة بجد ما شاء الله

ستيته حسب الله الحمش يقول...

نونو هانم الرومانسية
ميرسي يا قمر
التورتاية الحمرا تجنن وخاصة الساموراي اللي فوقيها :)
الرحلة روعة ما شاء الله
ربنا يهني ايامكم قبل ما ترجعوا لولاد التيت الكبير العظيم المريع
زميل لنا واخد الدكتوراة من اليابان وراح عمل ابحاث الترقية بالكامل في اليابان وحضر عشر مؤتمرات دولية
لما دخل الترقية الجديدة
مجلس الأساتذة الجزم كانوا ها يجيبوا له هارت اتاك وهو مركب رينج في القلب اساسا
اللي قال انت رايح تفبرك لنا وبحوث وجاي
واللي قاله انت مش عملت حاجة للقسم
واللي قاله لما تكبر ابقى اعمل في اللي بعديك اللي بنعمله فيك
اسكتي اسكتي
اي نعم هو خد حقه بالسانه
واحنا أزرناه تمام
بس خليكي مع الأسد الياباني
وربنا يكتب لكل اللي خرج حته عدلة رزق واسع يصونه عن عشرة ابقار مصر :)

لجين أبو الدهب يقول...

رومانسية
انتى فين ياحبيبتى ؟؟
مش لاقياكى خالص ومش فاهمة سر اختفاءك

بجد واحشنى كتيييير
يارب تكونى بخير انتى وسومة

وما شاء الله
الصور رائعة وتدل انها كانت رحلة ممتعة

دمتِ بخير ..

صبرني يارب يقول...

يا جميل انتى فين
اجازة ايه وبتاع ايه عودوا بقى اصل خلاص اتخنقت منكم

ستيته دي حياتي كل سنه وهى طيبه وانتى طيبه يا جميل وسنه سعيده عليكى يارب

والباشمهندس احمد مين تقصدي ؟؟

مش عارفه

بس طبعا باضم صوتي لصوتك انه لاااااااازم يرجع هو دخول الحمام زي خروجه ولا ايه


والرحله بتاعتك تحفه تحفه تحفه

عارفه الشيخ زايد الله يرحمه كان عامل جزيره اسمها صير بنياس

تبع ابو ظبي

بس كانت كلها محميه طبيعيه

بس عشان تروحيها لازم حجز وبتاخدي دور عشان هى كانت معمول فيها استراحات محدوده وبنقعد هناك لمدة 3 ايام
فى ضيافة الشيخ زايد شخصيا

مرتين احجز وما يجيش علينا الدور الا وانا مش فى الامارات لاي سبب

حصل خير مالناش نصيب يعنى

خلاص بقى نبقى نخطف رجلنا لحد اليابان وخلاص

عقبال كل مره يا جميل

الجواز و سنينه يقول...

الصور ممتعه جد
و البوست بجد هايل
و الصور اكتر من رائعه
كل سنه و ستيته طيبه
بجد هيه انسانه هايله
تستاهل كل خير
احلى ما فى التدوين انه عرفنى على ناس كان صعب فى الحياه العاديه انى اعرفهم
يمكن دلوقت بقيت احس بالناس دى مع طول العشره
بجد فيه ناس غاليه عليه اوى
تسلموا كلكم

بنت مصر يقول...

اولا انتي وحشتيني لأقصى درجة يا احساس طفلة

كل سنة وستيتة طيبة وبصحة وهنا

الصور سحفة يا قمرة أكيد في الحقيقه حاجه تانية خالص

محمد ابني فضل يتفرج على الصور لغاية لما حفظتها :))

وحشتيييييييييييني

Lady E يقول...

ما شاء الله

بجد جميلة اوي الصور بتاعت السفاري

انا جيت هنا قبل كده :)

بجد الطبيعة والمخلوقات التانية بتخلي الانسان يقول سبحان الله ويتأمل ويريح عينيه وروحه

تسلم ايدك عالصور وربنا يسعد ايامك

احساس طفلة محبة للرومانسية بس واقعية يقول...

خواطر شابة

شكرا يا قمراية
يارب دائما اصور حاجة تعجبكم
وتعيشكم جو الرحلة

اسعدنى مرورك
سنة سعيدة عليكى
وعلى كل العالم العربى

احساس طفلة محبة للرومانسية بس واقعية يقول...

بسومة

انتى وحشتينى اكتر
فرحت اوى لما لقيتك هنا
وسعيدة ان البوست عجبك

نورتينى

احساس طفلة محبة للرومانسية بس واقعية يقول...

القدر وانا

يااااااااااااااه
على تعليقك
بجد حسسنى ان البوست لية اهمية
مش مجرد صور ممتعة ومكان لطيف
وهو دا اصلا اللى بحس بيه لما نطلع رحلة زى كدا ريفريش للحياة كلها
بجد شكرا ليكى على زيارتك الغالية وكلماتك الجميلة

دمتى بكل خير وسعادة

احساس طفلة محبة للرومانسية بس واقعية يقول...

ميمايا

عووووودى يا ميمايا
اومال مين هيجمعنا ونكون ايد واحدة
ويقول لينا الاخبار السعيدة دى
ويدينا ثواب الدعاء للاخرين من غير سابق معرفة :(

يارب تطمنينا عليكى وترجعى لمدونتك

احساس طفلة محبة للرومانسية بس واقعية يقول...

ستوتة

شفتى التورتة نقتهالك مخصوص
اوعى حد يكون اكل منها غيرك :)

اها يا ستيتة عارفة حكاية الاستمرار فى بلد البحث العلمى فية لسة بحث علمى محصلوش تحول فيزيائى وبقى حاجة تانيه :(

وعارفة الفرق بين بلدنا وهنا وان هنا اكتر راحة وهناك اكثر تعبا بس تقولى اية احنا بصفاتنا زى باقى الشعب المصرى بنحب التعب فى بلدنا احسن من الراحة براها وربنا يكتب لنا ولكل العالم العربى اللى فيه خير ويصلح حال الجميع

نورتينى وخاصة انى عارفة
انك مش بتحبى تعلقى فى المدونة دى :)

احساس طفلة محبة للرومانسية بس واقعية يقول...

لووووووووجى

انا برضو اللى اختفيت
لا انا هنا اهو شوية اجازة :)

الحمد لله احنا بخير يارب تكونى انتى وماما بخير

الرحلة كانت بجد هايلة ومرهقة جدا من كتر ما هى ظريفة وصحبتها حلوة
يارب حياتك كلها تكون حلوة يا قمر

نورتي المدونة بعد الغياب

احساس طفلة محبة للرومانسية بس واقعية يقول...

صبصب

عارفة احنا عالم نخنق ازاى اصلا نبعد عن التدوين مش عارفة بس كلمة فى سرك احنا بنتابع من بعيد :)

ستيتة محدش يعرفها ولو حتى قرالها سطر مش بوست ولا تعليق كامل وميحبهاش
ربنا يبارك لها فى اسرتها ويسعدها :)

البشمهندس احمد ابو العلا
مختفى ولا نعلم اين هو
يارب يكون بخير وحد يطمنا علية
وهو يرجع بالسلامة لمدونتة

سمسم ورالى المكان على جوجل ايرس بجد هايل هو برضو عاش فى الامارات سنتين وعارف فيها وبيقول انها اليابان على اصغر وافضل كمان لان مفيهاش مساؤى اليابان اللى حى اللغة والحلال والحرام فى الاكل وبجد من كتر ما سمعت عنها نفسى اروحها

وبعدين انا مستعدة بس انتى انوى واخطفى رجليكى بسرعة لحسن متلحقنيش انا كلها شهرين واخطف رجلى على مصر برضو :)

شكرا يا صبصب
مودتى

احساس طفلة محبة للرومانسية بس واقعية يقول...

الجواز وسنينه

التدوين دا عالم رائع
مش افتراضى او وهمى هو يمكن مش حقيقة كاملة بس ممتعة وفى ناس فى النص لا تقدر بكل الواقعية اللى احنا عايشنها
ربنا يسعدك ويسعد ستيتة ويسعد كل انسان لية فكر واخلاق حميدة موجود فى العالم دا

سعيدة ان الرحلة عجبتك
اسعدتنى زيارتك

احساس طفلة محبة للرومانسية بس واقعية يقول...

بنت مصر

وحشاكى اية بقى
احنا تخطينا وحشانى دى
دا انتى بقالك كتيييييييييير مختفية ولا عارفة اوصلك بس لينا حساب على فكرة

الحقيقة لا كانت ممتعة فوق الوصف ومحمد لية عندى فديوهات تجنن بس لية هو والاولاد
انتى لا :)

يلا ظبطى مواعيدك
عشان انا مفتقداكى جدا

احساس طفلة محبة للرومانسية بس واقعية يقول...

ليدى

ايوة يا ليدى يريح عنية وروحة وفكرة
وحياتة كلها يبتديها من الاول
اكنة لسة بيفتح المحل وت المغرب فى الصيف وبيرش ماية :) على رواقة كدا

ربنا يكرمك يا قمراية
ويوفقك فى حياتك
مبسوطة ان البوست عجبك

كفايـة طيبـة يقول...

جميلة جدا

بقالى فترة كبيرة نفسي اخرج خروجة صباحية كدة فى مكان مفتوح :)

وحشتيني جدا على فكرة

MaNoOoSh يقول...

كل سنة وانتى طيبة يا نونو
وحمدا لله على سلامتك ولو انى جاية متأخر قوووووي

حسام غانم يقول...

أنا عايز أروح اليابااااااااااان


سنة سعيدة إن شاء الله

وكل سنة ود ستيتة طيبة

سوبيا يقول...

يانهااااااااااااااااااااااااااااار

بأه انا بؤول هي احساس مختفية ليه
الائيكي هنا

ينفع كدا
ماشي ماشي

:(