الكمامات
فى هوجة انفلونزا الخنازير والكلام دا و انتشرها فى اليابان عن طريق طلبة مدارس ثانوى
كان فى مباريات كورة بينهم واتعدوا من بعض يعنى اماكن مزدحمة
قلت خلاص لازم نلبس كمامات حتى سومة وطبعا هى كانت فكراها مناديل وفرحانة بيها
بس اتضايقت لما فضلت على وشها فترة
هى مفيدة صحيح بس بتضايق فى الكلام والتنفس خاصة لما تتلبس فترة طويلة
المهم هنا ثقافة الكمامات عادى يعنى لو حد عندة برد لازم يلبس كمامة عشان ميعديش حد
او لو حد خارج ومش عايز يتعدى بيلبسها عادى
المشكلة مش فى اليابان
ومش فى الكمامات لان مش هى اللى هتمنع المرض بس اهو نعمل اللى علينا
اللى حصل انى كلمت اخواتى فى مصر قلت لهم الامتحانات اوشكت
وهترجعوا تانى للمدرسة والكلية
فياريت تلبسوا كمامات قالوا اوكى وخلص الموضوع
بعدها بيومين الموضوع والاخبار زادت وكنت بكلمهم تانى قلت لهم ها جبتوا كمامات
طبعا قالوا لا طيب لية ؟ انتوا مش خايفين تتعدوا
راحوا قالوا الناس هتتريق علينا
يعنى اية ؟
تعدوا ولا الناس تتريق عليكم ؟
اللى يتريق يتريق المهم فى الاخر تفضلوا كويسين
وانتوا لو رديتوا وقلتوا كدا افضل من المرض هم هيسكتوا
ويمكن يعملوا زيكم
وخلصت معاهم وانا متأكدة انهم مش هيلبسوا كمامات
بس الموضوع فضل فى دماغى
والمرة دى الثقافة ثقافة شعب
عايزة اعرف كل واحد هيعلق
انت ممكن تلبس كمامة عادى وانت نازل الشغل ؟
وانتى نازلة الكلية ؟
وانت بتعمل شوبينج ؟
وانتى مع اصحابك ؟
انا عن نفسى هعلم بنتى تخاف من المرض حتى لو برد
تاخد بالها من نفسها تعمل اللى عليها فى المحافظة على صحتها
والباقى على ربنا بس كلام الناس مش بيجنبنا المرض وانتقال العدوى
مين فيكم ممكن يستخدم كمامة لو جالة برد وعاش حياتة عادى ؟
ومين فيكم فعلا بيلبسها للوقاية خارج البيت
بعد ما سمع عن مرض انفلونزا الخنازير والطيور واى مرض تانى
طيب لو شفتم حد لابس كمامة هل هتتريقوا علية حتى لو فى عقلكم ؟
بجد مستنية اسمع رأيكم ؟
51 التعليقات:
stigmata
وصمة العار
هو ده الموضوع
لو واحد لابس كمامة يبقى مريض والناس تتحاشاه
يبقى بالتالي لو واحد خايف يتعدي مش هيلبس كمامة عشان الناس ميفتكورهوش مريض ويتحاشوه
ولو مريض مش هيلبس
بنظرية أنا ومن بعدي الطوفان
ليه الناس تتريق عليا لما ممكن ميتريقوش عليا
طيب والناس تتعدي ؟
ما يتعدوا وأنا مالي
ثقافة شعب سيء التربية
انا طبعا مش هاتريق وسهل جدا انى البسها فى الشغل والشارع والبيت كمان لو لزم الامر
لكن (وااااه من لكن)
لكن ده كلام نظرى لما نيجى للطبيق العملى بقى
هاعمل زى سومه
لانى جربتها فعلا فى اثناء شغل لى من فتره وكان لبس الكمامات فيه اجبارى
وكنا بنتخنق منها جداااااااااا
خصوصا انى واحده من الناس نفسى ضيق وباتخنق بسرعه
وياستى قل لن يصيبنا الا ما كتب الله لنا
لو لينا نصيب فى حاجه هانشوفها بالكمامه او من غيرها
بصراحة لأ !!!
مش حألبسها:(
لانى لو منعت العدوى
عن نفسى لانفلونزا الخنازير
والطيور والغربان حتى !حأحمى نفسى
من الاسمده المسرطنة او الاغذية المشعة
او حاجات كتير مالناش يد فيها زى الاشعة الضارة بتاعة الشمس نتيجة
ثقب الاوزون مثلاً!؟
مش استبياع ولا حاجةوالله لكن الاحتياطات او الاساسيات انا بعملها
غسيل ايدى كل شوية ووضع المنديل على
انفى وفمى حين العطس لكن البس الماسك
طول الشغل مثلا لانى خايفة من العدوى
صعب جدااااااااااااااااااااااااا
سلام عليكم
ازيك
انا عن نفسي لو لبستها محدش هيتريق عليا لانه مش هيبان اساسا لاني لبسه نقاب
تاني حاجه بقي
انا لو شفت حد وخصوصا الايام ديه لابس كمامه هقول في عقل بالي والله جدع ( جدعه ) علشان عملت كده
لو كل الشعب يعمل كده
ومحدش يتريق علي حد يبقي جميل اوي
لكن ديه للأسف ثقافة شعب
واحنا بنحاول نغيرها احنا المتعلمين بأننا نغير نفسنا الاول
بس للأسف اكتر حاجه عندنا هنا الرغي من غير فعل
وكمان مش كل متعلم مثقف يسعي للأفضل ومش كل مثقف متعلم
تحياتي
اقولك الصراحه يمكن زمان كنت اتريق بس عارفه انها مهمه
لكن حاليا لو في كمامات ولازم نلبسها انا اول واحده هلبسها ومش هيهمني حد الصحه اهم من كلام الناس
ومش صحتي انا بس
صحه الناس حواليا كمان يعني حتي لو تعبانه هلبسها
انا اليومين الي فاتو كان عندي برد وكنت بكلم ماما واخواتي من ورا المنديل
مش عشاني لا عشانهم يا ريت الناس تفهم ده
ربنا يعفينا من كل مرض
وربنا يبعد عنك كل سوء يا جميله وسعيده اني كلمتك امبارح مع انهم شويه صغنين
حسام
مجاش على بالى ان الناس تتحاشاة انا قلت بس هيتريقوا ويقولوا خايف على نفسة
او يعنى ما الدنيا فيها كتير خايف على نفسك كدا لية او هو احنا مش قد المقام ويعتبروة متكبر مثلا
لكن لدرجة انهم يتحاشوة ويخافوا انه يعديهم
لا واللى عيان ميخفش على الباقى كمان
فعلا ثقافة شعب بس ممكن تتغير
انا مكنتش عندى ثقافة الكمامات او حماية نفسى والاخرين بشكل كويس
لكن اصبحت عندى لما حسيت ان الحكاية عادى مفيهاش احراج وتستحق فعلا
شكرا ليك
نورتنى
عارفة يا عاشقة
اه من لكن دى فعلا
انا ممكن اقول لما اروح مصر هفضل محافظة على الكمامات فى البرد وغيرة
بس لما اتحط فى الظروف مش عارفة قرارى هيكون اية
بصى الكمامات فعلا ساعات بتضايق
بس فى منها انواع وفى انواع خفيفة
واكيد مش هتفضلى كتير لبساها برضو
بس هى حقيقى بتفيد واكيد لو لينا نصيب فى حاجة هتحصلنا بس نكون عملنا اللى علينا
دمتى بكل خير
norahaty
عارفة فى حاجات نقدر نحمى نفسنا منها
بس على الاقل نعمل اللى علينا بالنسبة لباقى الامراض اللى نقدر نتجنبها
ببساطة مش الكمامات بس اللى هتحمينا
قضاء ربنا اكبر من كل شئ
بس الثقافة نفسها بتاعتنا
هل عندنا ثقافة احمى غيرى واحمى نفسى باى شكل من الاشكال
يعنى انتى بتحمى غيرك لما بتستخدمى المنديل
بس تحمى نفسك من حكة او عطس غيرك ازاى ؟ مادام تقدر تحمى نفسك يبق تمام جدا
لية لا بقى ؟
دا سؤالى وكمان لو شفتى حد لابسها هتقولى علية اية ؟
شكرا ليك على التصحيح والتعليق
نورتينى
حواء
طيب جميل كدا انتى تقريبا النقاب عامل عازل كمان ربنا يخميك ويبارك فيك
زى ما قلتى ثقافة شعب مش عايزة تتغير
زيها زى حاجات كتير مش بس بالمتعلمين
لان حتى هم ساعات بيرفضوا تقبل الحاجات اللى زى دى
وسعيدة بتعليقك جدا تقريبا انتى اول حد يقولى انه مش هيتريق على اى حد لابس كمامة وكمان هيحس انه عمل حاجة كويسة
شكرا ليك
مودتى
طبعا مش هتريق على حد لابسها
اللي بيعمل كده وبيفكر بالشكل ده حتى لو بينه وبين نفسه يبقى متخلف
بالنسبة إني ألبس أو لأ
بصراحة ماجربتش الموضوع ده قبل كده وانتي نبهتيني ليه
المشكله في أولادي مش هيرضوا وهيقولوا شكلنا هيبقى يضحك
طيب هتناقش معاهم واقنعهم
بس تعرفي الحل إيه؟
إن الإعلام أصلا يوجه الناس لكده ويقول لهم لازم تلبسوا الكممات دي ومن هنا يبدأ إنتشارها
فعلا يا نونو الموضوع صعب
أصلا لو المصريين لبسوا الكمامات كانوا اتطوروا زي اليابانيين من زمااااان
صدقيني الموضوع ده بيوضح إنفتاحهم الفكري وعقلهم واتزانهم
دي مشكلة فكر وثقافة وذكاء
موضوع جمييييييييل
أنا هعمل ثورة بين أهلي ومعارفي علشان نلبس الكمامات دي
أحبك في الله وربنا يحفظكم من هذا المرض
انا ردي نفس رد حسام غانم بالظبط
ربنا يهدي
الشكر لله ثم ليكى انتى
على المدونة اللطيفة دى
استمتعت بالرحلة فى الحديقة
وكمان (الفراخ المتبلة المشوية:)
والفسحة بتاعة حديقة الحيوان اليابانى .الحقيقة مدونة
جميلة وممتعة.اصل انا
احب اوى اتفسح وانا
قاعدة فى مكانى:)
بالنسبة للكمامة على الوجه
فعلا وللاسف ثقافة احمى نفسك
وغيرك مش موجودة عندنا :(
كله هنا الا قليل منهم
بيطبق مبدأ :
انا وبعدى الطوفان:(
كان نفسي أرد عليكي واقولك مش هيهمني واني هتصرف بتحضر وهلبس الكمامه
بس انا متعودش اكدب واحط نفسي في مكان مش بتاعي
للأسف هعترف وهقولك لأ هيهمني
الوضع لما بيكون في تريقه من الناس اللي هوالينا بيكون مقرف جدا جدا جدا
في مجتمعنا مفيش اسهل من التريقه على الناس
ديه هوايه عند ناس كتير لغاية لما الصح بأه غلط وعجب
انا اللي اقدر اقولهوك اني لو شفت حد لابس كمامه هحييه
ولو الشخص ده موجود معايا هلبس معاه واشجعه واستحمل معاه التريقه
المشكله اني معنديش الشجاعه الكافيه للخطوه الأولى ولا اني اقدر استحمل التريقه من الناس لوحدي
مش قولتلك مش هقدر اكدب
امممممممممم
الموضوع محير بجد
بس احنا مش متعودين على ده
انا لو شفت حد اكيد هعذره لان اكيد فى سبب انه عمل كده
بس انا معتقدش انى ممكن البس كمامه
لانى مش بعرف اتنفس كويس وانا لابساها فبقضيها مناديل يعنى افضل ماسكة منديل ووضعاه على انفى بطريقة مؤقتة واشيله وآخد شهيق وارجعه تانى وبعدين ازهق وأختار اقعد لوحدى بعيدا عن التجمعات عشان اعرف اتنفس:)
ده حتى لو انا فى البيت لان تعبى بيبقى وحش اوى وبياخد وقت طويل فعشان كده بحاول اتجنبه قدر المستطاع
هقولك انا بقى أخر اخبار الكمامات فى الحملات بتاعتنا عشان بنتعامل مع الطيور الحيه لازم الدكاتره يلبسوا الكمامات فنزلت انا والدكتوره زملتى من العربيه بيها جرى ورانا الولاد اللى فى الشارع الصغيرين وزفونا بتوع انفلونزا الخنازير جيهم هييييييييه وما مشيوش غير لما الشرطه مشتهم بالعافيه لكن انا برضو ما بتفرقش معايا ولازم البسها فى شغلى لانه مش تهريج
السلام عليكم ورحمة الله وبركاته
أختي العزيزة طفلة
جميل ان نسجل ذكرياتنا مع واقعنا الذي نعيشه .......... والأجمل أن نتعامل مع الأحداث بوعي
حفظكم الله بموفور من الصحة حتي تعودوا سالمين الي ارض الوطن
خالص مودتي وصادق دعائي
انا عن نفسى مش هلبس كمامة وامشى فى الشارع الا لما اتاكد ان فيه خطر فعلا ولكن لو شفت حد لبسها اكيد فى الاول هستغرب بس مش هعلق عادى دى حرية فى انه يحافظ على نفسه من اى مرض
بصراحة لو برد عادى هتكسف جدا البسها.. بس لو فى عدوى منتشرة خطيرة زى انفلونزا الخنازير مش هيهمني تريقة حد ساعتها.
والدتى علشان عندها حساسية من التراب كانت بتخرج ايام رياح الخماسين بالكمامة.. وكنت بحسدها على شجاعتها الصراحة بس كنت بتكسف البسها زيها.. مع اني بتعب من التراب جدا.
وعموما اتمنى ان ثقافة الحفاظ على صحتنا وصحة اللى حوالينا تنتشر بشكل كويس فى مصر.
اعتقد فى ظل الوقت بتاع الانفلونزا ده محدش هيتريق
وفعلا ممكن يكون الناس بردو خايفين حد يضحك عليهم ولما يشوفونى لابساها يلبسوها تانى مرة ينزلوا فيها
وبكدة انا بلبسي للكمامة هنشر المنظر ده ومش هيبقي غريب
انا قولت لماما نجيب كمامات واحنا رايحين المطار لانه هيبقي فيه كل الجنسيات بقي والخوف الاكبر بيبقي هناك
قالتلى هم بيوزعوا على اى حد داخل المطار اصلا ...
فالحمدلله
ربنا يرفع البلاء ده عن المسلمين ...
وحشاني :)
انا عمري ما لبستها
وما اعتقد اني ممكن البسها
الا لو كتن في سبب قوي
تقبلي مروري :)
صراحة انا مش هلبسها انا اصلا مش بحب الخنقة اقوم البس كمامة بس لوشفت واحد لبسها طبعا مش هتريق علية
ازيك يا طفلة
اولا بحييكي لي الموضوع ده
وحقولك رأيي بصراحة
انا عن نفسي مش حلبسها
هههههههه
لاسباب كتير اولها انا بتخنق بسرعة والحاجات ديه بتعصبني
ثانيا فكرة ان الناس تتقبلها هنا في مصر صعب
حديكي مثال صغير
في بداية موضوع الانفلونزا اتكلمنا في الشغل عن الموضوع وواحدة من زمايلي قالت ان القبل بين الاصحاب ممكن تنقل العدوا
يعني لما نسلم علي بعض مش لازم "نبوس بعض"كفاية السلام باأيد
الدنيا اتقبلت
هههههههههه
لان الموضوع اتناقش من زاوية تانية
يعني اللي حتعمل كده ممكن حيتقال انها "انفة"
او "متكبرة"
او "بتأرف من الناس"
لكن موضوع العدوي بعدنا عنه نهائي
واتقلب الحوار لمناقشة عاات وتقاليد
نفس الموضوع حيكون علي الكمامة ويمكن اكتر
انتي عارفة لو حد لبسها ونزل بيها الشارع
الناس حتخاف منه وتجري بعيد عنه
حتقول ده جاتله اصابه
ويمكن تقوم حرب اهلية ويطالبو برجمه او عزله
هههههههههه
صقيني
ده غير النظرات اللي بالك فيها
وعلي ايه
نقضيها منايل وخلاص
انا رغيت صح
طب اوكي
حروح اهه
سلام
بنا يستر على مصر الشتاء القادم
وكله هايلبسها غصبعنه من الخوف و الرعب و الدربكه الى هاتحصل لاننا بنخاف و ما بنختشيش
السلام عليكم
أحب أبشر حضرتك ان اصحابى اللى شغالين فى صيدليات فى القاهرة بيقولوا لى ان الكمامات بقت بتتباع بكميات كبيرة جدا دلوقت
فعلا الشعب ابتدى يتغير.. خاصة فى المحافظات الكبيرة
لكن ده مش لكل الناس
دى طبقات معينة بس وأحيانا الأب والأم بيبقوا مؤيدين لفكرة الكمامات بس الأولاد لا..
غير كده بقى موضوع الكمامات ده أصلا موضوع وقائى مش قوى أوى يعنى ومش أساسى هو مجرد إجراء احتياطى على حسب علمى..
كان فى اقتراح حلو اقترحته إحدى السيدات على وزير الصحة ان لبس الكمامات يكون إجبارى فى أماكن معينة زى المترو مثلا..
أنا شايف ان ده اقتراح ممتاز.. لكن وزير الصحة قال لها كلام معناه ان منظمة الصحة العالمية بتنصح بلبس الكمامات من باب ان الناس تبقى مطمنة بس لكن مش إجبارى على حد لأنها مش أساسية...
النقطة التانية بقى..
مجرد نصيحة.. اوعى تعلمى بنتك تخاف من المرض أبدا..لازم تعلميها إن المرض ده قدر ربنا سبحانه وتعالى،وان العدوى مجرد سبب لنقل المرض، وإلا فمين اللى عدى أول واحد ييجى له المرض؟! وإن احنا بس بناخد بالأسباب، لكن لو المرض جالنا فعلا، يبقى بلاء ولازم نصبر عليه ونستمتع بغفران الذنوب ورفع الدرجات إن شاء الله..لكن نسأل الله العافية
وأخيرا..كنت هقول لحضرتك يا ريت تشيلى الصورة عشان محدش ياخد سيئات وتشيلى ذنبه لما يبص لشىء محرم انه يشوفه.. بس مش عارف هتعتبريه تدخل ولا ايه.. بس ده والله من باب النصيحة
بارك الله فيكم
بغض النظر عن الكمامات
هتتعبي اوي لو رجعتي تعيشي في مصر يا احساس طفلة في مفاهيم كتير غلط عند الناس
ربنا يستر والمرض ميوصلش مصر
ربنا يحميكم
طيب لو شفتم حد لابس كمامة هل هتتريقوا علية حتى لو فى عقلكم ؟
لأ طبعا بالعكس هحترمه جدا علشانه انسان متحضر
مش عارفة والله يارومانسية ..
بس فى مصر انتشرت على فكرة وناس كتير بقيت تلبسها عادى ..
يابنتى ده الناس قالت لى اتقلبت تجارة وبقيت تتباع ب 5 جنيه واربعة جنيه ..
والمكان اللى انا فيه لما نجى ندخل مول او حاجة بيدهولنا مجانا وكل لناس لابسها عادى ..
وانا بلبسها عادى لان البلد هنا كلها بتلبسها ..
حتى جوزى دايما يضحك ويقولى حاساكى بتلبسيها فرحانة بيها D:
ربنا يحفظلك سومة يارب ويبعدك عن اى ضرر ..
مونى
تمام انا رديت على حسام :)
نورتينى
مصرية
صدقيني الموضوع ده بيوضح إنفتاحهم الفكري وعقلهم واتزانهم
دي مشكلة فكر وثقافة وذكاء
اااااااااااااااه
ما هى دى المشكلة ثقافة الشعب
والمشكلة من عندنا
:(
Nora
وللاسف ثقافة احمى نفسك
وغيرك مش موجودة عندنا :(
كله هنا الا قليل منهم
بيطبق مبدأ :
انا وبعدى الطوفان
دا اسواء من ثقافة الشعب دى اخلاق
ولما المشكلة تبقى فى الاخلاق يبقى خلاص
مبقاش فساد دا بقى انهيار
احمد
انا اللي اقدر اقولهوك اني لو شفت حد لابس كمامه هحييه
ولو الشخص ده موجود معايا هلبس معاه واشجعه واستحمل معاه التريقه
المشكله اني معنديش الشجاعه الكافيه للخطوه الأولى ولا اني اقدر استحمل التريقه من الناس لوحدي
احيك بجد لان دا اللى كنت متوقعاه ان الناس عندها استعداد اصلا على الاقل الشباب بس محتاجين قدوة ومفاهيم صح يلاقوا حد بينفذها
رحيل
يارب يوم تتغير الفكرة وتقررى تلبسيها
بس عامة ربنا يبعد كل شئ خطر وسئ
موناليزا
فبقضيها مناديل يعنى افضل ماسكة منديل ووضعاه على انفى بطريقة مؤقتة واشيله وآخد شهيق وارجعه تانى
ايوة يا موناليزا
ما هو الشهيق والزفير دا
على فكرة الكمامة مش بتخنق اوى يعنى لو الواحد لبسها ساعتين تلاتة مش بتخنق ولا بتضايق زى المناديل ويمكن اخف بس لو فترة كبيرة تجاوزت ال 6 ساعات اكيد هتخنق وطبعا محدش هيقعد 6 ساعات فى مكان واحد ولو حصل اكيد هيكون فى فترات راحة لو شغل او تغير للمكان وساعتها ممكن نرتاح منها 10 دقائق او حاجة دا عن تجربة :)
طوبة ذهب وطوبة فضة
انا برضو ما بتفرقش معايا ولازم البسها فى شغلى لانه مش تهريج
ايوة مش تهريج
اروحنا مش تهريج صح اي نعم مش هنمنع قدرنا بس سيدنا محمد كان بيعمل اللى علية هو والصحابة ويتوكلوا على الله ليس التوكل على الله وحده بدون جهد
ثقافة مجتمع بس الاصرار يقدر يغيرها
ربنا يكرمك
هذه حياتي
والأجمل أن نتعامل مع الأحداث بوعي
ايوة منين نجيب الوعى ولسة طوبة فضة وطوبة ذهب بتقولك جريوا وراها وزفوهم ( وش مندهش ) دا حتى مفيش وعى الحرية الشخصية
ربنا يصلح الحال
ايوشة
انا عن نفسى مش هلبس كمامة وامشى فى الشارع الا لما اتاكد ان فيه خطر فعلا ولكن لو شفت حد لبسها اكيد فى الاول هستغرب بس مش هعلق عادى دى حرية فى انه يحافظ على نفسه من اى مرض
ايوشة دا كان مرض مميت ولسة انفلونزا الطيور فى مصر عندنا 80 حالة يمكن زادزا مات منهم اكتر من 20 خطر اية اكتر من كدا
بس الجميل فى تعليقك الحرية الشخصية
وبجد لو مقدرناش نعمل الحاجة كاملة ونتقبل الثقافة دى يبقى جميل اننا نحتفظ بحرية الناس وحقهم
بس المشكلة ان مش كل الناس كدا للاسف
ربنا يبارك فيك ويحميك من كل شر
منوش
الدتى علشان عندها حساسية من التراب كانت بتخرج ايام رياح الخماسين بالكمامة.. وكنت بحسدها على شجاعتها الصراحة بس كنت بتكسف البسها زيها.. مع اني بتعب من التراب جدا.
ربنا يبارك فى ولدتك
رفعت من معنوياتى
دى مش بس شجاعة دى ثقافة
وصليلها تحياتى بجد
ربنا يخليهالك
كل طيبـة
انا قولت لماما نجيب كمامات واحنا رايحين المطار لانه هيبقي فيه كل الجنسيات بقي والخوف الاكبر بيبقي هناك
قالتلى هم بيوزعوا على اى حد داخل المطار اصلا
ايوة ايوة ايوة كدا :)
مامتك دى من الاول قلت عندها حق
وكلامها صح الصح فاكرة
سلميلى عليها جامد
ربنا يحميكم
اقصوصه
انا عمري ما لبستها
وما اعتقد اني ممكن البسها
الا لو كتن في سبب قوي
اقصوصه مش عارفة بس اللى عرفتة ان انفلونزا الخنازير ومن قبلة الطيور كانوا خطر ومميتين ومش بعيد عن اى حد وسهل جدا الاصابة بيهم :( ربنا يحميك
يوميات شاب منوفى
هى مش خنقة اوى على فكرة
:)
وردة
ان الموضوع اتناقش من زاوية تانية
يعني اللي حتعمل كده ممكن حيتقال انها "انفة"
او "متكبرة"
او "بتأرف من الناس"
لكن موضوع العدوي بعدنا عنه نهائي
واتقلب الحوار لمناقشة عاات وتقاليد
هاهاهاهاهاهاهاهاها بقى كل دا على القبل
بنهار ملون بألوان الطيف الشعب مش قادر يحمى نفسة فقط بمنع السلام والاكتفاء بكلمة السلام عليكم
هو مش دا يعتبر سلام برضو :(
بيبيرس
ربنا يستر على مصر الشتاء القادم
وكله هايلبسها غصبعنه من الخوف و الرعب و الدربكه الى هاتحصل لاننا بنخاف و ما بنختشيش
ساعات الكلام دا بنطبق فعلا علينا
انا عن نفسى ملبستش الكمامة الا لما حسيت بالخطر بيقترب على بعد مدينتين تلاتة مننا
:) برضو الدم جوانا مصرى
مجرد مدونة
اولا جميل تعليقك جدا
وسعيدة انى اعرف ان المبيعات زادت بالشكل دا الاباء ممكن يكونوا عارفين الخطر فين بالضبط بس الابناء بيكونوا بيفكروا فى شكلهم قدام اصحابهم وكم التريقة اللى هيخدوها وهو دا اللى اتربوا واتعودوا علية للاسف
تانى حاجة
انا هعلم بنتى تعمل اللى عليها وتحمى نفسها وبعد كدا الباقى على ربنا بس عشان لا قدر الله لو حصل حاجة تبقى فاهمة انها عملت اللى عليها ومتندمش وتقول لو
عشان لو شافت حد بيحمى نفسة من المرض متتريقش علية
وتبقى تحترم خصوصيتة وحريتة الشخصية دا اضعف الايمان يعنى لو هى مش حابة تحمى نفسها مادام فى خطر يبقى على الاقل تتقبل تصرف ورأيي الاخرين وهو دا المعنى اللى خلف الكلام لان زى ما قلت الكمامات مش بتمنع المرض لكنها من اسس الحماية يبقى لية لا
وفى نفس الوقت انا ليا حريتى غيرى لية حريتة ويجب احترامها
ثالثا
تم تغير الصورة بصورة طفلة
شكرا ليك
ليدى
الظاهر كدا يا ليدى
الظاهر ان الثقافة اتغيرت لما عشت فى مجتمع يحمل ثقافة تانية بس دا ميمنعش ان حقى انى اعيش فى بلدى وبحريتى وليس ما يفرضة عليا المجتمع
مادام اللى بعملة ليس خارج حدود الدين ولا يضر غيرى فى شئ
شكرا ليك
لوجى
اللى عرفتة انك مش فى مصر
بعد ما كنت فرحت وكان نفسى اسالك انتى عايشة فين فى مصر فين المكان اللى بحس انه شبنا اوى دا :)
بس طلع مش فى مصــــــــــر للاسف
ربنا يحميكم
معتقدش انى ممكن البس
انا اصلا عايش فى حى شعبى
تخيلى البس كمامة
هيقولك ده مريض
اضربووووووه
يإما
هيقولك
ده خايف يتعدى منا .. هوه احنا كفرة ولا ايه
اضربوووه
وانا اصلا مش عايز اضرب يعنى
^_^
وزى ماحضرتك عارفة
ثقافة شعبنا عالية اوى
ربنا يبارك في حضرتك
يا جماعة مدوناتنا كلنا مسروقة
واحنا قاعدين مش حاسين بحاجه
لازم يكون لينا موقف
بصراحه صديقتنا طفلة صاحبة مدونة
احساس طفلة محبة للرومانسية بس عاطفية
هى اللى نبهتنى لده
بشكرها جدا
كلنا نعمل اى حاجه ونبلغ بعض
مممممممم في الواقع أريد ان أنوه عن نقطة قد تبدو مهمة
نحن كشعوب قدر لنا أن نعيش في كنف دول نامية لها تقاليد وأعرف حتى في الأمراض...وفي المقابل شعوب أخرى تعيش في كنف دول متقدمة ومتحضرة
وكلاهما يعيش..ما أقصده أن التأقلم يأتي حتى مع المرض ولا أعني أن نستهتر ولكن ربما يباغتنا المرض أثر بالرعب والهواجس بعد ارتداء الكمامة لان الامر ببساطة..غريب علينا حتى وان كان المرض عتي
دمتي بخير وسلامة
الحارة سد
يجماعة احنتا لية بنحب نكبر المواضيع دى قوى كدا لا خنازير ولا قطط حتى ثم انا لو جالى حد وعرفت ان عندة انفلونزا الضفاعد حتى مش هلبس اى حاجة وعلى راى كاتب هنا ردة كان تمام اسمة حسام عانم هعقول زى ما قال ثقافة شعب سىء التربية ومش سى التربية دا الفكر والابداع كمان
وخلونا نقولها با اليابانى
هوا كوتش وا مو تسو كي
هنجواااا كوماتسو هوكو وا موكو وا
الكمامات دي هتتفرض خلاص بعد وصول المرض لمصر والموسسات هتجبر الموظفين عليها ...إحنا كده مبنجيش الا بالأمر الواقع والثقافة يغيرها الإعلام أو الحكام مش فارقة ...إنما وعي وكلام من ده ..... أبداً على جثتنا :)
حاولي متقارنيش كتير بين المصريين واليابانيين في السلوك العام .... فأنا وإن كنت أعتقد أن اليابانيين أجلاف وليس عندهم حس انساني (من خلاح احتكاكي البسيط بهم ) لكن كسلوكيات عامة تصب في المصلحة فلا يوجد أدنى مقارنة بينهم وبين ال...... اللي عندنا :)
تحياتي :)
Mo7ammed
سواء حى شعبى او لا
حتى لو الثقافة اختلفت
احنا لو عملنا الصح وتحملنا عشانة
مش الضرب طبعا :) بس حتى السخرية
المهم اننا نعمل اللى علينا ونحمى نفسنا
الناس مش هتفيدنا لما يصابنا اى مرض
الثفاقة مش هتتغير الا لو حد حاول وتحمل بجد
نورتنى
مجرد مدونة
شكرا ليك
دمت بكل خير
حارة سد
ليس تأقلم او دولة نامية ومتقدمة
بس ثقافة ممكن متكونش فى المرض دا او غيرة بس فى حاجات تانية فى حياتنا بنعملها لازم نبطلها وحاجات مش بنعملها افضل لنا لو عملناها الموضوع دا بس اثار مناقشة ثقافة شعب دون التدخل فى حكومات ودول
شكرا ليك
مهو لاننا فى بلد بتحكمها المظاهر
بقي كل تصرف او فعل محسوب عليك
الدنيا هنا شكل والعالم كله شكل
وبعدين شعبنا ماشي ببركة الدعا
يقولك يا عم سيبها على الله
وادينا عايشين
هى دى مصر
وهما دول ناسها
مش هيتغيرو
:)
صعبة أوي موضوع الكمامات دي
لكن والله لو الموضوع زاد عن حده
هلبس كمامه
بس يعني هخلي خروجي في أضيق الحدود
وهلبسها بس لما أتعامل مع الناس
حبيبتى ازيك وازى سومة العسولة دى
مرحبا بيا هنا صح واللا ايه هههههههه
شوفى زوجى بيعمل فى احدى شركات الادوية وبيقول فى اقبال كبير جدا على الكمامات دى وبتتباع زى البلح فى رمضان الناس بتشتريها كتير وباى ثمن
الناس فعلا خايفه اكتر من خوفها من انفلونزا الطيور بجد
طبعا هنلبسها اكيد مفيهاش كسوف دى ولا مراعاة لكلام الناس ناس مين دا المفروض كله يعمل كده
ولو شفت حد لابسها هقول والله جدع وخلاص اكيد اكيد كلنا هنلبسها
ربنا يستر
بصراحه مش عارفه اقولك ايه فى امراض غريبه اوى ابتدت تظهر الفترة دى
وكلها امراض خطيرة اكيد فى حاجه غلط لان ربنا غضبان علينا اوى
الواحد دلوقتى بقى خايف يسلم على حد علشان العدوى وفى ناس كتير فعلا بيمشوا بالكمامات بجد شىء لا يطاق ان الواحد يمشى وهو خايف تجيله عدى من مجرد النفس او اللمس
بس هقول ايه
ربنا يرحمنا برحمته
اشكرك ياقمر على مضوعك ده
وفى انتظار كل جديد منك
اختك نور
السلام عليكمـ
اولا احب احيكي علي مدونتك المتميزه والرائعه :) تنقلت فيها واستمتعت كثيرا سلمت يداك واسعدك الله دائما ...
موضوع الكمامات دا في الاول الناس بتستغرب من المنظر بس بعد كدا هيتعودا عليه بل وهيقلدوا دا لاني شفت دا في مترو الانفاق مجموعه بنات كانوا لابسينها ووجدت ان فيه ناس بتسالهم شارينها منين وبكام يعني يعني ماكنوش مستغربين اوي لكن في الشوارع مش عارفه ايه الوضع بالضبط ..
انا معاكي طبعا في الموضوع دا ( الوقايه خير من العلاج )
بس مش دا الحل الاساسي والوحيد الامراض ديه اللي ظهرت وانتشرت هي بسبب ذنوبنا الكثيره وربنا عز وجل بيقول ( ظَهَرَ الْفَسَادُ فِي الْبَرِّ وَالْبَحْرِ بِمَا كَسَبَتْ أَيْدِي النَّاسِ لِيُذِيقَهُمْ بَعْضَ الَّذِي عَمِلُوا لَعَلَّهُمْ يَرْجِعُونَ) .. الحل اننا نرجع لله عز وجل ..
وعلينا بالدعاء ( بسم الله الذي لا يضر مع اسمه شئ في الارض ولا السماء ) ..
سلمت يداك وسعدت بمروري لديك ..
دمت بخير ..
السلام عليكم
اول مره اشوف البلوج الجميل ده
وبالنسبه للكمامات دي ثقافه ايجابيه بنفتقد اليها بمعنى ان اللي مش عايز يأذي الناس بيلبسها او مش عايز يتأذي برده بيلبسها واحنا كشعب مصري للاسف بنفتقد للثقافه دي مع عدم انكار الجوانب الايجابيه في الثقافه
اريجاتو على البوست
بصراحة انا كنت عايزة البسها و انا و في المطار لقيت ناس كتير اوي لبساها بس بعدين لقيت عادي يعني و محدش بيلبس كمامات و لا غيره
بس ماعتقدش ان الكمامات هيا الهتمنع المرض طب انفلونزا الخنازير بقولوا ممكن تتنقل عن طريق اللمس يعني انتي لو لمستي حاجة في الشارع كان لامسها مصاب ممكن تتعدي يغني نلبس جوانتي كمان هوا كلو مكتوب
مش قصدي ان الواحد ميحميش نفسه باي حاجة و يقول ماهو لو كتوبلنا هنمرض بس لا يعني الاحتياط بس على الاخر
انا عن نفسي البس ممات في التجمعات الكبيرة اوي او لو في عمرة او حج انما اما انزل الشارع في العادي معتقدش
إرسال تعليق