CLICK HERE FOR BLOGGER TEMPLATES AND MYSPACE LAYOUTS

الجمعة، 9 أكتوبر 2009

هم كدا واحنا كدا

البوست المرة دى طويل يا شباب معلش استحملوة من وجهه نظرى انه مهم شوية
وبيبين الحياة فى اليابان اكتر بعيدا عن الترفية

هى اليابان نضيفة اوى كدا لية ؟

اقولكم
اليابان نظيفة لسببين فى رايي اولهم ان فى صناديق قمامة فى كل مكان
يعنى لو انت ناوى ترمى حاجة فى الارض مش هترميها وهتلاقى ان صندوق القمامة اقربلك ودا دور الحكومة
ثانيا هم اتربوا على كدا لما كانوا صغيرين كانوا بيلاقوا واحدة واقفة فى الشارع
بتديهم مساكة وجوانتى وكيس يلموا فية اى حاجة تقابلهم ولما يرجعولها الكيس مليان يخدو هدية
ودائما فى ادوات يرمو فيها مستلزماتهم رخيصة الثمن معاهم زى مثلا الطفاية المتنقلة
مش لازم يرمى السيجارة فى الارض او علبة الموز اللى على هيئة صوباع
موز بيتحط جواها عشان تحافظ علية وعشان تخلى القشرة فيها لو مفيش صندوق قمامة قريب منك ودا دور الشعب

هى اليابان بتحترم الاديان ؟
اه جدا غير اى شعب اخر مفيش اصلا سؤال عن الحجاب والاديان
حتى لو هم مستغربين مش بيبان عليهم اكتر شعب بيتاثر فى المشاعر
واكتر شعب مش بيبين مشاعروا وكأنه غير مبالى باختلاف شكلك تمام
ممكن لو اتعرفت على حد يابانى كويس شوية
يسألك الفرق يعنى لية بتلبسى حجاب برة البيت وجواه لا كحب استطلاع
ويتفهم تمام ردك وممكن يتناقش معاكى اكتر بس بايجابية شديدة
غير كدا مفيش اى مشاكل بتواجه حد حتى فى الشغل لو عايزة تشتغلى
يشوفوا امكانياتك اية ولو محتاجينك يشغلوكى بعيدا عن ديانتك وجنسيتك
لو عايزين تعموا مسجد جمعوا فلوس واشتروا ارض وابنوها
او اشتروا بيت مبنى براحتكم زيكم زى اى حد تانى المهم متطلعوش صوت ولا تعملوا دوشة

طيب هم ديانتهم اية ؟
فى يابانين مسلمين وفى يابانين مسيحيين
بس الاغلبية بلا ديانة سماوية فى ديانات تانية غريبة هم معتنقينها
بس فكرهم بصورة عامة انها الديانة حاجة هم حرين فى اختيارها ووقت ما يلاقوا ديانه تعجبهم
بيدخلوا فيها او وقت لما الموضوع دا تتوقف علية حياتهم لكن طول ما الحياة شغالة ممكن يفكروا فية وممكن لا
كان ليا صديقة يابانية يادوب اتعرفت عليا وبعدين هى نزلت مصر
وانا فضلت فى اليابان هى كانت زيارة ورجعت تانى بس على بلد تانية
المهم سألتها انتى ديانتك اية قالتلى بابا وماما ديانتهم كذا بس انا لس مقررتش
هى كانت بتدرس حاجة شبة التاريخ كدا وبتتعرف على الثقافات الاخرى

رمضان فى اليابان عامل ازاى ؟
مختلف يعنى مفيش بتاع قطايف ولا كنافة احنا بنعملهم بنفسنا اختراعات يعنى
زى كل حاجة بنعملها بأيدنا من الالف للياء زى العيش والفول والفلافل وغيرهم
ومفيش اصوات مساجد لان المسجد الوحيد ممنوع صوتة يطلع من جواه لبراه عشان ميزعجش الاخرين
وهو مكرفون بسيط من غرفة الرجال لغرفة السيدات مش اكتر بس فية صلاه وتراويح وصلاه العيد
ولعب بتتوزع على الاطفال وحلويات شرقى ممكن يكون حد لسة راجع من بلدة وجايبها معاه
بنخرج فى العيد خروجة كبيرة مجموعة من العرب والعيد دا كنا جزائرين ومصريين وفلسطنين وسودانين وكان يوم رائع

هطيق ارجع مصر تانى واعيش فيها بعد مستوى الثقافة والاخلاق والنظافة بعد البيئة الانسانية واحترام اداميتى ؟
مش عارفة لما نزلت الاجازة رغم انى كنت مشتاقة جدا لمصر ولاهلى كنت سعيدة لمدة ساعة تقريبا وبعد كدا اتصدمت بأول منظر
وقمامة غير معقولة قدام باب مدرسة :( حاولت اتأقلم وانا شخصيا افرض التغير اللى حصلى على اللى بتعامل معاهم والبيئة حواليا بس احيانا فشلت واحيانا نجحت وقلت يمكن لما استقر اعرف اتصرف احسن واامل دا بس اللى عارفاه بدون شك ان مهما طالت الغربة لازم هرجع لبلدى واهلى لانهم حاجة بتكملنى لا يمكن انفصل عنهم

لية بلدنا كدا واليابان كدا ؟ وكدا دى تختلف عن كدا دى اختلاف نهائى ؟
عشان ثقافة الشعب اليابانى ثقافة متزنة كل الشعب بيتربى على مبداء واحد
عارفين الاطفال كلهم من سن 3 شهور بيتعلموا يعملوا كل حاجة لوحدهم احنا نقول دى مش رحمة بالاطفال وناس بلا مشاعر
اتعامل معاهم وانت تعرف ان دى قمة الرحمة لما تعلم طفلك الاعتماد على النفس واتخاذ قرارات بتخلية مش معقد نفسيا بعد كدا
عشان احنا بنحاول ولما نفشل ونحاول تانى ونفشل بنقول خلاص بقى محنا حاولنا مرتين هم لا بيقوموا ويقعوا 100 مرة ويقولوا لازم ننجح عشان نقدر نعيش بدون اى وسطة ولا كذب ولا نفاق بدون شكوى بس بمجهود ومحاولات رغم انهم مش ازكياء هم بس بيلتزموا بالقوانين الثابتة
عشان هم بيحترموك من غير ما يعرفوك مش بيقولوا واحنا مالنا المهم مصلحتنا تخلص وبينضفوا المكان للى هيجى بعدهم يقعد فيه
يقفوا طوابير اكتر من اللى عندنا بهدوء عشان ميزعجوش اللى وراهم ولا اللى قدامهم
عشان هم عندهم الصح والغلط واضحين اما احنا فالمجتمع منفصل وكل واحد بدماغة وبنقول حرية كلمة بنقولها بدون اى فهم ليها
عشان عندهم وقت الشغل للشغل بس يعنى امانة بيخدوا عليها مرتب يقدروا فى وقت الاجازة يرفهوا بية بدون اى هموم
عشان هم عندهم رصيف 4 متر الناس تمشى علية واحنا معندناش
عشان هم عندهم اشارات مشاه واحنا بنموت وبنرمى نفسنا ونقول بنعدى الشارع
عشان خلال 3 سنين حصل حادثتين فى البلد اللى انا فيها وقصدهم 3000 فى مصر
عشان بيحترموا الكبير فى السن واحتياجاته والصغير وسنة وطفولته واحنا عندنا اطفال شوارع
عشان هم عندهم المطافى كدا

واحنا عندنا المطافى بيفضلوا فى مكانهم من الصبح لبليل لو مكنوش نايمين او بيتكلموا او بيكلوا
عشان هم بيحترموا لغاتهم ولو قعدت سنة تكلمهم انجليزى هيكلموك يابانى برضو لغاية لما تنطق
وقليل اوى اللى يعرف منهم انجليزى وبينطقوة بطريقة غريبة
لكن احنا اللى يعرف عندنا انجليزى هو الافضل والعربى بتاعنا بقى غريب
لان لو خلت عندهم مستشفى اى مستشفى الحكومى زى الخاص زى العيادات
بيشوفوا حالتك الاول بعدين تطلع تدفع وتاخد الدواء مفيش صيداليات ودواء عام وخاطئ ولا حالات بترفضها المستشفايات وهى قادرة تعالجها بس عشان الفلوس اه نسيت التامين الصحى اللى بيخفضلك الفاتورة للضعف برضو فى اى مكان اما الاطفال فالكشف بتاعهم ثابت والحكومة بترجعوا تانى كمان

انا اتأثرت قد اية بثقافة الشعب اليابانى الايجابية ؟
الم وحسرة غريبة اوى
لخبطة جامد جدا
اصل انا من مصر ومن الشعب دا
يعنى اصلا كانت مبتفرقش معايا الزحمة ولا الزبالة اللى منتشرة
ولا بتقزز اوى يعنى من الحشرات اللى فى الشارع مادام بيتى نظيف
ولا بتألم لما اسمع عن حالة سرقة الم ووجع جامد كدا
يمكن عشان مجربتش معنى لما تقع حاجة منى فى الشارع لازم القيها
وكانت خلاص بقول الحمد لله
يمكن عشان مشفتش بلد تانية فيها حشرات اه بس مش مضرة بالعكس الاطفال بتتعلم ازاى تلعب بيها
لانها مش ذباب ولا فئران ولا اشياء اخرى بتجى على القمامة
حشرات من نوع تانى بتيجى بس على الزرع والمناطق الخضراء حشرات احنا منعرفهاش لان مش عندنا زرع وخضرة كتير

من كام يوم شفت برنامج خواطر 5 عن اليابان شفت حلقة عن الامانة واتحسرت اوى لما قارن بين المحفظة اللى سبها بقصد فى شوارع اليابان وازى رجعت ولما سبها تانى فى بلد واضح جدا انها مصر ازاى مرجعتلوش
اصلى جربت الاتنين جربت ازاى ابقى عارفة لو وقعت منى حاجة انى هرجع فى نفس الطريق هلقيها زى ما هى
او هلاقيها فى الشرطة لو بلغت عنها وانى هعامل بأحترام وان محدش هيتريق عليا حتى لو اللى وقع منى كان ورقة او اى شئ بسيط

جربت ازاى هم بيخافوا ان الناس تتقزز لما يسيبوا اى قمامة فى الارض ويشيلوا قاذورات الكلاب ازاى بيراعوا مشاعر ناس ميعرفوهمش شفت دا بعينى ولمستة وتطبعت بيه بعد 3 سنين بس عشتهم فى وسط البلد دى وجربت برضو اشوف القمامة فى كل مكان تحت البيوت وقدام المدارس والمستشفيات لمدة 18 سنة والحمد لله تخلصت من المناظر دى وبقيت بحترم الاخرين حتى لو مش بيحترمونى وبقيت بحتفظ بالقمامة وبقيت بقسمها كمان يعنى زجاج لوحدة وبلستك لوحد والباقى لوحدة وهفضل محافظة على العادات دى حتى فى مصر جربت اركب مواصلات محترمة بمواعيد واماكن نظيفة بالثانية بمحطات معرفوه عارفة انا هركب منين وهنزل فين مع لوحة فيها الرقم اللى هدفعة حسب رقم المحطة اللى ركبت منها اللى بسحب ورقتها وانا بركب الباص من غير ما حد يساعدنى او حد طالع يسحب تذكرتين بدل واحدة

ايوووون هحكلكم حكاية ظريفة اوى من سنة كدا نزلنا مصر اجازة لشهر واحد وقررنا نروح البنك فقعدنا نستنى كتير اوى عقبال ما نادو رقمنا وانا مليت من الانتظار فسمسم قرر يحكلى على موقف حصلة لما راح بنك تانى غير اللى احنا فيه لوحدوا
لقى اية بقى لقى اله بيسحب منها رقم واول ما شباك يفضى بتتعرض الارقام بالترتيب
المهم سمسم كان معاه رقم 500 بيبص فى البنك ملقاش كل اللى فى البنك باللى شغالين يكملوا 500 واحد
لا واللى زاد ان الماكنة كان جنبها واحد بيسحب ويديى للناس الارقام طيب لزمة الماكنة اية بقى
هى مش مفروض تحل محل الشخص اللى شغال دا
المهم برضو استنى سمسم ولقى اية لقى ارقام بتظهر على الشباك ومفيش حد بيروح
وبعد فترة كدا حد كان قاعد جنبه قالوا تأخد الرقم دا اللى هو كان 300 وحاجة
على اساس انه اقرب من 500 ودا كان لان الشخص دا ساحب كذا رقم عشان يخلص بدرى
مش فاهمة ازاى بس حتى استخدم التكنولوجيا بقى فيه تدخل يخليها للاسواء


البوست دا تاعبنى كنت عملاه على انه بوست خفيف
اجاوب فيه على اسألة ناس سألتها واسألة انا ضفتها بس الظاهر المقارنة مش هتنتهى
وكل يوم هتضايق اكتر من اللى قابلوا عارفين انا بكره المقارنة دى
حد عارف سرينا اهرونى بتاعت رافت الهجان هو كان شايف انتقادها لبلدها على انها شبهوا يعنى كره ليها
رغم ان افكارهم كانت مختلفة وبعد كدا فهم انها بتنتقد بلدها عشان عايزاها افضل
مش لانها مش بتحبها اهو انا كدا بالضبط بس بكرة المقارنة
لانها بتخلينى فى صورة اللى مش بيحب بلدة وعايزها وحشة
مع انى بتضايق من المقارنة لانها بتطلع مصر واحشة رغم ان انا بحبها
ونفسى ارجعلها النهاردة قبل بكرة


12 التعليقات:

mimi يقول...

مفيش وجه للمقارنة خاااالص
متحاوليش
وإحنا كده وهنفضل كده ... طول ما كل واحد بيقول يلا نفسي ... وفين مصلحتي وأنا ومن بعدي الطوفان لا هنشوف اشارة مرور بتحترم ولا شارع نضيف ولا مدرسة فيها تواليت أدمي

متتعبيش نفسك وأنتي ونصيبك بقي ترجعي مصر وتكتئبي أو تفضلي في اليابان

وربنا يسترها

احساس طفلة محبة للرومانسية بس واقعية يقول...

يا رافعة من معنوياتى انتى يا ميمايا
انا عارفة صدقينى بس عندى امل مهما حصل مش قلتلك اتعلمت هنا نقوم ونقع 500 مرة ونقول لازم ننجح مش نقول كفاية محاولة والامل انتهى

ما هو مهما طال وجودى فى اليابان ولا غيرها لازم هرجع ما هى بلدنا يعنى هنروح منها فين
ورانا ورانا ولا فيها نافع ولا بعيد عنها نافع نعمل اية ؟

عاشقه الرومانسيه يقول...

كل الحكايه ان فى حكومه بتحترم الشعب
وشعب بيحترم نفسه والاخرين

لما ده يبقى موجود فى مصر
ابقى ارجعى
غير كده خليكى هناك احسن
علشان لو رجعتى هيجيلك اكتئاب

احساس طفلة محبة للرومانسية بس واقعية يقول...

عاشقة انا معاكى ان الشعب والحكومة بيحترموا بعض وبيحترموا انفسهم وثقافتهم وفكرهم واحد مش مقسم
بس ما هو انا مش بأختيارى افضل برة على طول ولا ارجع لان دا امر محسوم وبرضو مش معقول هفضل حاسة انى متغيرة عن شعب بلدى وعندى اشياء افضل ممكن انقلها ان شاء الله لواحد بس من 80 مليون وافضل اتالم من اخبار قتل اخ لاخوة وبلاوى زرقة مخططة بمبى ومنقظة بابرتقالى صعب جدا

عشان كدا المقارنة بالنسبالى مؤلمة
وكل اللى اقدر علية التمسك بايجابيات اتعلمتها ودعاء ربنا يقدم اللى فيه الخير

شكرا ليكى يا قمر :)

شوكولاتة يقول...

إزيك ياقمر مابتجيش عندي من زمان ليه يارب تكوني بخير انتي وسومة وسمسم

عجبتني قوي الحتة دي
ويقولوا لازم ننجح عشان نقدر نعيش بدون اى وسطة ولا كذب ولا نفاق بدون شكوى بس بمجهود ومحاولات

إحنا بقى بنقول
لازم يبقى معانا واسطة وندفع ونترقص على كل وش وشية علشان نعرف نمشي في البلد دي

شايفة الفرق

تسلم إيدك

Soul.o0o.Whisper يقول...

فعلا ...

هى أولا و أخيرا ثقافة شعب




و احنا كناااااااااااااااا كدا
و ربنا ييسر بئا و نرجع كدا



دمتى بكل الخير

م/ محمد صالح يقول...

عندك حق فى كل كلمة لكن ياترى نقدر نتغير
اعتقد الاجابة بكل بساطه اة نقدر نحاول نكون احسن منعملش إلا اللى يخلينا افضل نحاول نتعلم نصح نحاول ننفع بلدنا نتقدم نطور لو كل واحد حاول يعمل كده بالتأكيد هنكون افضل انا انتى وكل اللى عاوز البلد دى تكون احسن لازم يحاول ويحاول كتير

حـــــــــــب الملائكه يقول...

السلام عليكم
انا اول مرة ازروك
انا مع احترامى ليكي
ماينفعش نقارن
بصي
انا بس هاقولك عامل واحد بس
فيه كام بلد دخلت مصر ؟؟ومن امته ومصر مستقرة ؟؟
احنا اللى مستعجلين
احنا بطبعنا مستعجلين
بصي
احنا عددنا كبير جدا ً
وبصي
ربنا لازم يديهم عشان وقت الحساب مايبقاش حد عنده اى حجه
وبعدين ربنا لما بيحب حد بيبتليه
وكمان بصي للفرق الكبير بقي
احنا مسلمين
وهما !!!!!!
احنا عندنا شرع ودين ومبادئ
انا طولت اسف
بصي انا لاشيخ ولا حاجه
سلام
عودة الجزااااار للملعب

احساس طفلة محبة للرومانسية بس واقعية يقول...

شيكولاتة

انا بدخل كل 3 اسابيع مرة
لان سوما مطلعة عينى
ومش مديانى مساحة اتواجد فيها
على الجهاز تمام

اما عن البوست ففعلا اختلاف التفكير هو اساس الفرق بينا وبين اليابان يعنى نبداء بنفسنا عشان بلدنا تكون افضل ياريت نقدر

نورتينى يا احلى شيكولاتة :)

احساس طفلة محبة للرومانسية بس واقعية يقول...

سووول

نرجع فين عمرك شفتى حد بيرجع لوراء او يتمنى يرجع وراء :(

يعنى حتى الرجوع صعب
دمتى بكل ود يا قمر

احساس طفلة محبة للرومانسية بس واقعية يقول...

محمد صالح

اكيد لو احنا عمالنا كدا وفكرنا بأيجابية هنقدر نعمل حاجة ونقنع اللى حوالينا يكونوا افضل بس احنا نفكر ممكن نعمل اية

شكرا ليك

احساس طفلة محبة للرومانسية بس واقعية يقول...

حب الملائكة

انا بقارن عشان تبقى بلدى افضل عشان انا اتعلمت فى 3 سنين بس من عمرى ازاى احترم واقدر الاخرين ونفسى كل شعبى يتعلم دا

بقارن عشان هم مش مسلمين صحيح بس عندهم من الامانة والصدق والاحترام والنظافة والنظام ما يكفيهم لان يكونوا مسلمين ونحن لا رغم ان العكس هو اللى مفروض يحصل زى ما حضرتك قلت يعنى هم مسلمين بلا اسلام نقصهم توحيد وصوم وصلاة بس احنا نقصنا كتير رغم اننا موحدين وبنصوم وبنصلى دا حتى فى رمضان كان فى قضية الاشهار بالفطار فى بلدنا اللى هى مسلمة حضرتك سمعت عنها !؟

بقارن عشان هم بلدهم اصغر بكتير من مساحة بلادنا ومعندهومش موارد اصلا بس رغم كدا فى نظافة وصناعة وزراعة فوق ما خيالنا يحلم لبلدنا

بأختصار عشان شايفة بلاد غير مسلمة حالها كدا رغم قلة الامكانيات وبلدنا رغم عددنا ومساحتنا وامكانيتنا حالها كدا

شكرا لزيارتك واتمنى يظل التواصل دائما