CLICK HERE FOR BLOGGER TEMPLATES AND MYSPACE LAYOUTS

الثلاثاء، 24 مارس 2009

لا مؤخذة


لا مؤخذة يا جماعة الموضوع المرة دى غريب
وانا عن نفسى عايزة اكتبة عشان لما ارجع مصر
ويجيلى زهايمر ابقى اقراه ومنساش
مع التاريخ كمان عشان ابقى اعرف الاختراع دة وصل مصر امتى
وبعد قد اية من استخدامة وانتشارة هنا

هو يمكن يكون وصل فعلا خلال السنتين اللى انا قعدتهم هنا
مش عارفة ابقوا قولولى

طبعا عايزين تعرفوا بتكلم عن اية ؟
طيب شفتوا الصورة اللى فوق دى
ايوة عايزة اتكلم عن الحمام اللى فوق دا
واللى فى الصورة دى



دا اكثر من حمام وحل مشاكل كتير لناس كتير
يعنى مثلا الامهات فى الشتاء مش بتقدر تعلم ابنائها التحكم فى دخول الحمام
عشان الجو برد والماية باردة والحمام نفسة بارد

الحمام فية كل دا حتى كمان ممكن تسمع موسيقى وانت فى الحمام
هو مش ممكن هو انت فعلا بتسمع موسيقى وانت فى الحمام

الحمامات فى اليابان منتشرة فى كل مكان وبشكل اكبر من مصر بكتير
الحمام حجمة صغير بس رغم كدا مريح جدا

هو هنا فى فكل مول او محل او حتى فى الشارع
حمامات للسيدات ودا عادى وحمامات للرجالة ودا برضو عادى ومكان للتدخين ودا برضو احتمال يكون عادى
و حمام للاطفال فية زى سرير صغير كدا عشان الاطفال البيبيهات ودا كان اول مرة اشوفة كان هنا فى اليابان
وحمامات صغيرة عشان الاطفال بعد سن سنتين
وحمامات تانية للذوى الاحتياجات الخاصة ودا بقى برضو اول مرة اشوفة فى اليابان

مش عارفة اتكلم فى الموضوع ازاى
:)

بس خلينا نبداء
دا معناه ان كل اللى فات دا مقدمة
اعتبروها مقدمة وتعريف

المهم انا هتكلم عن حمام ذوى الاحتياجات الخاصة لانه جامع لكل الحاجات اللى عايزة اقولها والموجودة فى باقى الحمامات



الباب بيتفتح لوحدة بزرار كدا فى الجنب ومضاء بأخضر او احمر حسب اذا كان فى حد بيستعمل الحمام او لا
الحنفية بتشتغل لوحدها لما بتحط ايدك تحتها وتبطل لما تشيل ايدك
التواليت نفسة مش بارد
الماية دافية فى موسيقى شغالة بتدوس على زرايرعشان تعدل درجة حرارة الماية والتواليت
وزرار اصلا بتدوس علية عشان الماية تطلعلك

يعنى الحكاية كلها عبارة عن يد جنب الحمام
او لوحة معلقة على الحائط لو الحمام قريب من الحائك
فيها 4 زراير بتتظبط منهم كل الحاجات دى
واخيرا لما تقوم الحمام بينضف نفسة بنفسة بس برضو فى ورقم على الحائط
فيها رسومات تشرح لك ازاى انت تنظف قاعدة الحمام قبل ما تقعد
او بعد ما تخلص منعاً لتناقل الامراض

اللسان اللى فى الصورة دى بيطلع وبعد كدا بيدخل تانى لما حضرتك تقوم
ودا برضو منعاً لانتقال الامراض وساعات مش بيكون موجود اصلا


نسيت اقول ان حمام ذوى الاحتياجات الخاصة
دا مش معناه الناس اللى فاقدة حاسة من حواسها او عندها قصور بس
لا دا كمان للاطفال والحوامل وكبار السن
وفية زراير جوة لكل حاجة حتى فى لوحة مكتوبه بطريقة برايل
وفى زرار عشان لو حد حصلة حاجة يدوس علية
وتيجى ممرضة او عامل من المكان اللى فية الحمام
يساعدوة ودا للناس المريضة طبعا

طبعا فى حمامات عادية زى عندنا لوحدها كدا من غير حاجة
وفى حمامات احدث الغطاء بيترفع لوحدوا اول ما تقرب من الحمام مثلا
ولسة فى تطويرات اكتر وتجارب شغالة عشان يتم فصل الحمامات عن الصرف الصحى تمام
وتكون فى اجهزة تعيد تنظيف مياة المرحاض تانى وتصلح تانى للاستخدام فى الحمام



بس خلاص خلصت وعايزة اعرف رأيكم فى الموضوع
ومرة تانية لا مؤخذة يا جماعة بس بجد الموضوع ظاهرة تستحق التفكير فيها
نظرا للحلول اللى لقاها الحمام لكبار السن والحوامل وذوى الاحتياجات الخاصة والاطفال


27 التعليقات:

حسام غانم يقول...

هههههههههه

شكلي كده أول تعليق

هو انت في اليابان دلوقتي ولا إيه ؟

معلش أصلي مش متابع

جامد جدا الحمام ده

الحياة بشكل عام عندهم فيها نضافة كده

احساس طفلة محبة للرومانسية بس واقعية يقول...

اها يا حسام انا يا دوب لسة منزلة البوست اهو دا انا مصدقتش ان حد لحق يرد
شكرا ليك واهلا بيك فى اليابان اقصد فى المدونة انا حاليا فى اليابان اه ونفسى ارجع مصر القيها كويسة

الفكرة فعلا جامدة وتستحق التنفيذ
عشان نحاول نحافظ على الشعب السليم من الامراض اللى عمالة تنتشر

ونكون اكثر نظافة ونظام
شكرا ليك ويارب المدونة تكون عجبتك

ELMASRYA - MRS WRITER يقول...

أقولك على حاجه يا إحساس الطفولة

لو الحمامات دي موجوده في مصر تأكدي إن الناس هتخربها وتدمرها

اليابانيين يستحقوا النضافة دي لأنهم ناس محترمين

تعرفي مثال على صحة كلامي

لما نلاقي هيئة النقل العام جايبة أتوبيسات جديدة وتبقى منورة ونضيفة وزي الفل

على طول وبمجرد ما الشعب يبدأ الإستخدام بتتبهدل الأتوبيسات وبتلاقي تقطيع بآلات حادة في جلد المقاعد

وهتلاقي كتابة شتايم وألفاظ خارجه على أي مكان يصلح لكده

ده غير تكسير في النوافذ والحديد داخل الأتوبيس

حقيقي مصر ماينفعش يكون فيها الحاجات دي

السواد الأعظم من الشعب عايز يتربى ويتعلم من أول وجديد

شكرا لموضوعك اللطيف

احساس طفلة محبة للرومانسية بس واقعية يقول...

مصرية
بس لسة فى ناس كويسة اهو

انا وانتى وبنت مصر وحسام وليدى وكفاية طيبة وغيرهم وغيرهم وناس كتير بحس فيها ان لسة فى امل
عارفة ان اللى انتى بتقولية حقيقة وواقع بس اقصد فى امل اننا نتغير بس عايزين بيئة صالحة وعايزين نتمسك اكتر بدينا عشان نقدر نبدع ونخترع احنا حاجات زى كدا مش بس نتمنى انها توصل عندنا

ربنا يصلح الحال
شكرا ليك
دمتى بود

MǿиY El-Shreef يقول...

ياااه

تخيلي بقى يبى عندنا ده كله

ديته شهر والله زي ما قالت المصريه كده وهتلاقي كل حاجه باظت وخربت

كل حاجه فينا عايزه يتعملها ريلووود

وربنا يكرمنا كده مية قرن ولا حاجه نبقى زي اليابان

تيجي بالسلامه ياااارب

لجين أبو الدهب يقول...

ياحلاوة ياولاد ..

كويس ان الحمامات مش كده فى مصر ..

لحسن لو كانت كده ما كنتش سيبتها وما كنتش طلعت من الحمام .. D:

اهو هو ده اللى يقال عليه بيت الراحة فعلا ..

وانا معامكى يااحساس طفلة ..

احنا شعبنا مش بيخرب والله ده نفسه يتقدم بس اهم حاجة ان الوسيلة تتعمل بقواعد ..

أبسط مثال مكتبة اسكندرية ..

لو دخلتيها تحسيها حتة من اوربا من كتر التنظيم والنظافة ومفتوحة بقى لها سنين والناس محافظة عليها ..

بس ربنا يكرم الدولة ويبطلوا سرقة ويطوروا البلد ..


جزاكِ الله خير حبيبتى احساس طقلة محبة للرومانسية ..

وفى انتظار باقية الاختراعات ..

بنت مصر يقول...

عارفة فيه اعلان عن حمامات بيقول " دا مش حمام دا صالون "

اهو وانا بقرأ الموضوع افتكرت الاعلان ده :)

وفعلا زي ما مصرية قالت ان لو ده جه مصر حيتخرب من اول اسبوووووع على اقصى حد

بجد نفسي اعرف لييييييييه هم كده واحنا كده

MǿиY El-Shreef يقول...

اه صحيح .. البلوج اتعملها ري ديزاين صح

مبرووووك

مممووواه

احساس طفلة محبة للرومانسية بس واقعية يقول...

مونى

وهو انا هقعد هنا 100 قرن
هاهاهاهاهاهاهاها
:)
أنا نفسى بجد نكون افضل
ونقدر قيمة الحاجات والفلوس اللى بتدفع فيها ونكون شعب منظم ونظيف وذو عقلية بنائة مش مدمرة

تسافرى بالسلامة يا جميل
اوعى تنسينا فى الدعاء

احساس طفلة محبة للرومانسية بس واقعية يقول...

عندك كل الحق يا لوجى
احنا شعب ينقصة القواعد والعقاب اذا ملتزمش بالقواعد عشان نحافظ على بلدنا

بتفكرينى بكلمات عمرو اديب
احنا محتاجين اللى يكسر الاشارة يعدم فى ميدان عام وبعدها محدش هيكسر الاشارة
ودا نبقى خسرنا فرد واحد وانقذنا الاف الاشخاص من كثير من الحوادث
رأي صائب 100%

بتنورتينى

احساس طفلة محبة للرومانسية بس واقعية يقول...

بنت مصر

انا اللى خلينى اكتب الموضوع ان قريت بوست قبل كدا عند خيخة واى كلام عن ابنها شريف وازاى كانت بتعلم يتحكم فى دخول الحمام بس الجو كان برد

حسيت ان فعلا الاختراع مش اى كلام ومفيد للاطفال والكبار والسيدات الحوامل وذوى الاحتياجات الخاصة

مش مجرد حمام وبيت راحة دا حاجة طبيعية عند كل الناس ولازم تكون مريحة ونظيفة والانسان ميتضايقش وهو داخل المكان دا

الظريف بقى ان القاعدة واليد اللى بتظبط درجات الحرارة بيتباعوا لوحدهم وبيتركبوا على اى حمام اجبلك واحدة وانا جية :)

احساس طفلة محبة للرومانسية بس واقعية يقول...

مونى اه عملت نيو لوك
يارب يعجبك واكيد هتلاقى
جديد فى المدونة كل شوية

نورتينى يا قمر
:)

غير معرف يقول...

ياخررابي ايه التكنولوجيا دي

دي اليابان يابنتي ام التكنولوجيا والتطور ايه نيجي جنمبها

يابختك اكيد شايفة حاجات تجنن هناك

مش بحسدك طبعا انا بقر بسسس ههههههههه

ربنا يوفقك ويرجعك بالسلامة

لو عايزة ترجعي يعني انا لو منك اعيش هناك العمر كله هههههههه

بالتوفيق يارب

احساس طفلة محبة للرومانسية بس واقعية يقول...

نوارة

فى حاجات كتير هنا تجنن فعلا

وتغيظ ساعات وتفرس ساعتين

وطول الوق بتمنى بلدنا تكون كدا

عشان تكون بيئة صالحة لينا ولأولادنا

استنى بطلى قر دلوقتى شوية

لغاية لما تشوفى البوستات السلبية للبلد دى

وبعدها قوليلى لسة بتقرى ولا لا

نورتينى يا قمر

تامر علي يقول...

والله شعب يستحق النعمة أما عندنا فالناس بتقطع سماعات التليفونات العامة (مش فاهم ليه لحد دلوقتي) وادخل الكابينة الاقي سلك بدون سماعة :)فما بالك بالحمام ... الحمامات أسوء مكان عندنا (حتى في الأماكن المحترمة شكلياً ) بيكون شيء مقزز جداً دخول حمامات عامة مهما يكن المكان ... عدا بعض الفنادق اللي فيها عمال خاصة بالحمامات ... يعني هتلاقي عبارات بذيئة على ظهر الباب وأرقام تليفونات ورسومات خارجة وسب وقذف ... الناس عندنا أمخاخهم هي اللي عاوزة تنضف وبعدين الحمامات تنضف لوحدها بعدين :)

والله نفسي ازور اليابان وآكل سوشي وادلق الساكي في الأرض واصارع بتوع السومو واركب عربية لكزس واصطاد سمك مشوي ... يالا مش مهم أدينا قاعدين

موضوع تحفة بجد :)

عمك ياض يقول...

بجد ماشاء الله اول البلوج جامده جداااا وجديده

بالنسبه لموضوع الحمام ده بجد ماشاء الله فعلا حاجه مبهره التكنولوجيا اللي بيستثمروها في كل حاجه
وشئ رائع جدا بجد مراعتهم لذوي الاحتياجات الخاصه والاطفال وكل الاهتمام ده

وبالنسبه للحنفيه اللي بسنسور دي الوحيده اللي موجوده في مصر في بعض الاماكن النادره جدا.. بس هي عامه منتشره اكتر في الدول اللي عندها فقر في المياه.. لانها بالطريقه دي بتوفر مايه كتير جدا لان الماء مش بينزل الا لما تكون اليدين موجوده في الحوض

بوست جامده ماشاء الله :)

احساس طفلة محبة للرومانسية بس واقعية يقول...

تامر على
عندك حق طبعا وفعلا عجبنى رأيك الشعب هو اللى محتاج عملية غسل دماغ وبعدها نبقى نغسل احنا بنفسنا بلدنا كلها

على فكرة انت كدا عايز رحلة سياحية لليابان مش اقامة لان الرحلة تقدر تعمل كل دا فيها لكن اقامة معناها مسؤليات اكتر وحاجات تانية اهم

تأكل سوشى دى سهلة

تدلق الساكى معناها انك محتاج تشتريها الاول

تصارع السومو يبقى هيشلوك من على الارض بسرعة وهتطير منهم

تركب عربية لكزس انا مقدرش اقولك عشان مليش فى العربيات

تصطاد سمك مشوى بقى دى غريبة خالص
بتتعمل ازاى دى حد بيشوى سمك وبعدها يعلقة فى الصنارة :)

شكرا على مرورك و رأيك فى البوست
نورتنى

احساس طفلة محبة للرومانسية بس واقعية يقول...

عمك ياض

سعيدة جدا جدا بتعليقاتك
واعجابك بالمدونة

بالنسبة للحنفية انا مأخدتش بالى من حكاية توفير الماية بس اعجبت بيها لانها سهلة الاستخدام وخاصة للاطفال وذوى الاحتياجات الخاصة

وهم هنا عاملين حسابهم فى كل حاجة
ومستخدمين التكنولوجيا فى تسهيل وتوفير حياة افضل

شكرا ليك

عمك ياض يقول...

مدونه متميزه بجد ماشاء الله
مستنين البوستات الجديده :)

رحلتنا في الحياة يقول...

ههههههههههههه تقدم بردو لا بجد عجبنى اوى الحمام ده وخصوصا موضوع الممرضة ده

الفقيرة إلى الله أم البنات يقول...

بصى يا حبيبتى فى الله احساس طفله
الحقيقه اجمل شئ فى الغرب احترامه اصحاب الظروف الخاصه بمختلف احتياجاتهم
واما عندنا نبقى نهتم بالطبيعين..يمكن نهاتم باصحاب الظروف الخاصه


نفسى زيك زى كتيير ان حالها يتصلح
بس فى مثل صينى بيقول
السلم بينظف من فوق مش من تحت

ربنا يهون عليك غربتك ويرد رد جميل

احساس طفلة محبة للرومانسية بس واقعية يقول...

عمك ياض
انتظر جديد المدونة
سعيدة انها عجبتك
نورتنى

احساس طفلة محبة للرومانسية بس واقعية يقول...

ايوشة

فعلا عجبتنى عشان كدا قررت اكتبها للذكرة فى المدونة وسعيدة ان الموضوع عجبك

اسعدنى ردك

احساس طفلة محبة للرومانسية بس واقعية يقول...

الفقيرة الى الله

هم فعلا هنا بيعملوا حساب اللى ليهم ظروف خاصة اولا وبيجددو ويطوروا لراحتهم بعد كدا الناس الطبيعين بيستفيدو منها

اللى ناقصنا بجانب اخلاق الشعب
العلم والتطوير واستخدام عقولنا وخلق تكنولوجيا جديدة تفيد الناس

ردك ومرورك دا لية معنى كبير اوى عندى
يارب تنورينى دائما

القدر و انا يقول...

احساس طفلة
ليه يا حبيبتى تعملى فينا كده
دا احنا اهلك وناسك برضه
كل المدونين والمدونات سيصابو بالامساك بعد بوسنك ده
تحياتى لك

احساس طفلة محبة للرومانسية بس واقعية يقول...

القدر وانا

تصدقى مكنش قصدى خالص

وش برئ

لو كنت اعرف ان البوستات والكلام عن اليابان هيتعبكم كدا

صدقينى مكنتش كتبت
موعدكيش اوى يعنى انا طفلة وممكن ارجع فى كلامى
:)

بس هيهون عليكم لما تعرفى ان من مصر لليابان 12 ساعة طيران

ومن اليابان لمصر 15 ساعة طيران

يعنى قمة الملل

يلا حاجة تضايق فى العلاقة بين مصر واليابان عشان متزعلوش ولسة البوستات اللى جية هخليها مساؤى اليابان

:)
نورتينى

احلام جوليا يقول...

بصراحة حاجة جميلة جدا خلتينا نتمنى نعيش باليابان